សិល្បៈជាតិ៖ តារា២ដួង គឺកញ្ញា ស៊ីន យូប៊ីន និងកញ្ញា ស៊ីន ជេននី កំពុងតែដើរបង្អួតរាងយ៉ាងស្អាតនៅក្នុងកម្មវិធីមហោស្រពភាពយន្តក្រុងកាន នាប្រទេសបារាំង យ៉ាងណាមិញឱកាសមាសលើកនេះ ត្រូវបានស្រីស្អាតប្រកាសថាគឺបងស្រីជាអ្នកផ្ដល់ឱ្យ។
កម្មវិធីមហោស្រពភាពយន្តលើកទី៧៧ នាទីក្រុងកាន ប្រទេសបារាំងកំពុងតែប្រព្រឹត្តិទៅយ៉ាងរលូន និងអធិកអធម ដោយមានការចូលរួមពីកំពូលតារាភាពយន្ត ផលិតករ ល្បីៗ និងផលិតករវ័យក្មេងមកពីបណ្ដាប្រទេសផ្សេងៗជាច្រើន មកជួបជុំគ្នាដើម្បីផ្លាស់ប្ដូរបទពិសោធ។ ក្នុងចំណោមតារាដ៏ច្រើនកកកុះនោះ ក៏មានកូនខ្មែរ ដែលជាតារាសម្ដែង២ដួងកំពុងឆក់បានចំណាប់អារម្មណ៍ពីខ្សែភ្នែកអន្តរជាតិនោះគឺ កញ្ញា ស៊ីន យូប៊ីន ដែលជាបងស្រីច្បង និងកញ្ញា ស៊ីន យូប៊ីន ដែលជាប្អូនស្រី។ ខណៈដែលបងប្អូនស្រី ត្រកូល ស៊ីន មួយគូនេះ ក្នុងឋានៈជាតារាតំណាងប្រទេសកម្ពុជា ដើរលើកម្រាលព្រំក្រហមនៃមហោស្រពដ៏ធំនេះ ងាកមកដឹងពីចំណាប់អារម្មណ៍ផ្ទាល់ខ្លួន ក្នុងឋានៈជាដួងតារាទើបនឹងរះថ្មី ប៉ុន្តែបែរជាទទួលបានឱកាសដ៏វិសេសវិសាលនេះ ត្រូវបានកញ្ញា ជេននី ទម្លាយមកក្រៅដោយមិនលាក់លៀមថា បើសិនត្រឹមតែកេរ្តិ៍ឈ្មោះបទពិសោធ ខ្លួន ម្ល៉េះសម មិនទាន់អាចឈានដល់ចំណូលកំពូលនេះ នៅឡើយ ប៉ុន្តែអាស្រ័យដោយមានការជ្រោមជ្រែង និងផ្ចុងផ្ដើមពីបងស្រីទើបខ្លួនទទួលបានឱកាសនេះ។ នេះបើតាមការលើកឡើងរបស់កញ្ញា ជេននី នៅលើបណ្ដាញសង្គមកាលពីរាត្រីថ្ងៃអាទិត្យទី១៩ ខែឧសភា ឆ្នាំ២០២៤ ម្សិលមិញនេះ៖
«កម្រាលព្រំដែលស្ថិតក្នុងក្តីស្រមៃមនុស្សជាច្រើនរួមទាំងខ្ញុំដែរ វាដូចជាក្តីស្រមៃតែវាជាកាពិតដែលពេលនេះជើងខ្ញុំជាន់លើកម្រាលព្រំមួយនេះហើយ។ ខ្ញុំទទួលស្គាល់ថានាងខ្ញុំជារលកក្រោយបើតាម credit គឺនៅមិនទាន់គ្រប់គ្រាន់អាចបំពេញក្តីស្រមៃឈរនៅទីនេះដោយខ្លួនឯងបានទេដោយសារឥទ្ធិពលរបស់មនុស្សស្រីដ៏ពូកែម្នាក់នេះទើបខ្ញុំទទួលបាននៅសំណាងមួយនេះ▪︎▪︎▪︎▪︎ទាំងអស់គ្នាអាចនិងវាយតម្លៃមនុស្សស្រីម្នាក់នេះបែបណាក៏បានព្រោះអ្នកទាំងអស់គ្នាមិនបាននៅក្បែរនាងនិងមិនបានស្គាល់ពីបេះដូងដ៏ធំរបស់នាងចំពោះប្រទេសរបស់នាងទេហើយឥទ្ធិពលខ្មែរនៅលើឆាកអន្តរជាតិមិនបាននៅក្រោមប្រទេសណាមួយណាឡើយព្រោះនាងមិនព្រមជាដាច់ខាត។ទទួលបានសំណាងនៅលើកនេះ ខ្ញុំនិងប្រើសំណាងនេះ បង្កើតទៅជាឱកាសអោយខ្លួន ហើយសន្យានិងត្រឡប់មកឈរនៅទីនេះម្តងទៀតនៅឆ្នាំណាមួយដោយខ្លួនឯង។ អរគុណកម្លាំងនៃការគាំទ្ររបស់បងប្អូនទាំងអស់គ្នា។ 77th annual Cannes film festival»
គួរដឹងថា កញ្ញា ស៊ីន យូប៊ីន និងកញ្ញា ស៊ីន ជេននី កំពុងតែត្រៀមស្នាដៃដ៏ល្អឯកថ្មីមួយទៀតដែលស្នាដៃរឿងភាគថ្មីនោះ កញ្ញា យូប៊ីន បានបញ្ចេញថ្វីដៃក្នុងនាមជាអ្នកដឹកនាំដំបូង ដោយមានប្អូនស្រី ស៊ីន ជេននី ជាតួស្រី នៅក្នុងភាពយន្តភាគប្រចាំស្ថានីយទូរទស្សន៍ ភីអិនអិន រឿង «លួចស្នេហ៍គូដណ្ដឹង២»៕
