សិល្បៈជាតិ៖ សិល្បករចម្រៀង ជើងចាស់ លោក សុះ ម៉ាច បានចេញមកបង្ហាញចំណាប់អារម្មណ៍និងដង្ហើយសុំយ៉ាងទទូចឱ្យមានការផ្ដល់ជូននូវគ្រឿងឥស្សរយស្តិ៍ ដល់តន្ត្រីករ សិល្បករជើងចាស់ដែលបានបម្រើនៅក្នុងវិស័យនេះជាយូរឆ្នាំ ដើម្បីផ្ដល់តម្លៃនិងកិត្តិយសជូនពួកគាត់សម្រាប់ជីវិតចុងក្រោយ។
ថ្លែងតាមរយៈបណ្ដាញសង្គមហ្វេសប៊ុក ភ្ជាប់ជាមួយនឹងរូបថតមួយសន្លឹកជាមួយនឹងអតីតតន្ត្រីករ ទូច សាគុណ ដែលបច្ចុប្បន្នបានចូលនិវត្តន៍ ហើយកំពុងរស់នៅបាត់ដឹង ពឹងលើប្រាក់ខែមន្ត្រីចូលនិវត្តន៍ចិញ្ចឹមជីវិត លោក សុះ ម៉ាច បានអំពាវនាវ សុំឱ្យមានការស្រាវជ្រាវ ផ្ដល់គ្រឿងឥស្សរយស្ដិ៍ដល់ពួកគាត់ដើម្បីជាការលើកទឹកចិត្ត សម្រាប់ជីវិតចុងក្រោយពួកគាត់ ព្រោះលោកមានក្ដីបារម្ភខ្លាំងដោយវ័យរៀមច្បងទាំងអស់នោះកាន់តែជ្រាលជ្រេទៅហើយ។
លោកបានលើកឡើងយ៉ាងដូច្នេះថា៖ «ថ្ងៃនេះមកជួបអតីតតន្ត្រីករ រៀមច្បងដែលបម្រើជាតិក្នុងវិស័យសិល្បៈអស់រយៈពេល៣៤ឆ្នាំរួមជាមួយអ្នក សិល្បៈដទៃ រួមជំនាន់នៅវិទ្យុជាតិ។តម្ត្រីករ ហ្គីតាបាសដ៏ល្អឆ្នើមម្នាក់នេះគឺលោក ទូចសាគុណខ្ញុំធ្លាប់ស្គាល់និងច្រៀងក្នុងបារជាមួយគាត់កាលពី ៣០ឆ្នាំមុន លោកជាប្អូនបង្កើតរបស់លោកទូចសាលីម្ចាស់បទ ភក្តីស្នេហ៍។ ឥឡូវកម្សត់លាក់ខ្លួននៅបាត់ដឹង គ្មានអ្វីពឹងក្រៅពីពឹងលើប្រាក់ចូលនិវត្តន៍។បើនិយាយពីគ្រឿង ឥស្សរិយយសថ្នាក់ជាតិដូចអ្នកសិល្បៈជំនាន់ចាស់ថ្មីដទៃដែលទើបទទួលបានពីសម្តេចបវរធិបតីនាយករដ្ឋមន្ត្រី គឺគ្មានសោះ តែធ្លាប់ទទួលដែរពីក្រសួងព័ត៌មានគឺឯកឧត្តមខៀវកាញារឹទ្ឋ។សម្រាប់យោបល់របស់ខ្ញុំគួរតែផ្តល់ជូនពួកគាត់ដែលបម្រើជាតិក្នុងវិស័យសិល្បៈយូរបែបនេះក៏ជាការលើកទឹកចិត្ត ព្រោះវ័យរបស់ពួកគាត់កាន់តែចាស់និងជរាហើយ មិនគួរមើលរំលងឡើយ។គួរតែស្រាវជ្រាវរកពួកគាត់មកផ្តល់កិត្តិយសសម្រាប់ជីវិតចុងក្រោយផងចុះវាជាគំរូល្អដល់អ្នកជំនាន់ក្រោយផងដែរ។ខ្ញុំសូមទោសបើខ្ញុំសរសេរប៉ះពាល់អារម្មណ៍លោកអ្នក ទាំងនេះជាការចូលរួមសំណូមពរក្រើនរំឮកប៉ុណ្ណោះ។»
អ្វីដែលជាការស្នើសុំនិងលើកឡើងរបស់លោក សុះ ម៉ាច នេះក៏មានការគាំទ្រនិងយល់ស្របច្រើនពីសំណាក់អ្នកគាំទ្រ និងមិត្តសិល្បករមួយចំនួនផងដែរ ព្រោះគេដឹងថាព្រឹទ្ធាចារ្យដែលជា តន្ត្រីករក្ដី សិល្បករក្ដី សុទ្ធសឹងតែបានលះបង់ច្រើនដើម្បីបុព្វហេតុនៃការថែរក្សាសិល្បៈ វប្បធម៌ និងតូរ្យតន្ត្រីរបស់ខ្មែរយើងដើម្បីទុកជាកេរមរតកសម្រាប់យុវជនជំនាន់ក្រោយ៕