បញ្ចប់ជាស្ថាពរហើយសម្រាប់កម្មវិធីប្រកួតប្រជែងម៉ូដែលកម្រិតអន្តរជាតិ Mr and Miss Classy Model International 2024 កាលពីរាត្រីថ្ងៃអាទិត្យទី ១៩ ខែឧសភា ដែលប្រទេសឥណ្ឌូណេស៊ីធ្វើជាម្ចាស់ផ្ទះ។ ជាថ្មីម្ដងទៀត ដែលកូនខ្មែរ២រូប គឺ បុរសសង្ហា ធិ ធារ៉ា និង កញ្ញា ម៉ៅ នីង មិនធ្វើឱ្យអ្នកគាំទ្រខ្លួនខកបំណង ព្រោះចេញទៅប្រកួតនៅឆាកអន្តរជាតិលើកនេះ ទទួលបានលទ្ធផលជាផ្លែផ្កាដូចៗគ្នា។
បន្ទាប់ពីចាកចេញពីមាតុប្រទេសទៅប្រកួតនៅលើឆាកអន្តរជាតិ ទាំង ធារ៉ា និង ម៉ៅ នីង បានប្រឹងប្រែងបញ្ចេញអស់កម្លាំងកាយចិត្ត មិនគិតថ្ងៃឬយប់ធ្វើយ៉ាងណា បំពេញគ្រប់វិញ្ញាសារដែលកម្មវិធីដាក់ឱ្យដោយយកចិត្តទុកដាក់ និងបានល្អប្រសើរ។ ទីបំផុតការខិតខំប្រឹងប្រែងរបស់អ្នកទាំងពីរបានហុចផលជាផ្លែផ្កា ទោះជាមិនមែនជាម្ចាស់មកុដ ប៉ុន្តែតំណែងលំដាប់រងទីមួយ ឬចំណាត់ថ្នាក់លេខ២ របស់ ធិ ធារ៉ា និង លំដាប់រងទីពីរ ឬចំណាត់ថ្នាក់លេខ៣ របស់ ម៉ៅ នីង នៃកម្មវិធីកម្រិតអន្តរជាតិលើកនេះ ក៏អាចបញ្ជាក់ឱ្យឃើញពីសមត្ថភាពដ៏ពេញលេញរបស់បេក្ខភាពតំណាងកម្ពុជាយើងនៅលើឆាកអន្តរជាតិផងដែរ។
បើតាមការឱ្យដឹងពី ធារ៉ា រូបនេះមិនភ្លេចថ្លែងអំណរគុណមនុស្សសំខាន់ៗដែលបានផ្ដល់ឱកាសនិងលើកទឹកចិត្តដល់ខ្លួនតាំងពីមុនការប្រកួតរហូតដល់ចប់ការប្រកួត បន្ថែមលើសពីនោះម្ចាស់តំណែងលំដាប់រងទីមួយនេះ ក៏មិនភ្លេចអរគុណទៅកាន់អ្នកគាំទ្រនិងប្រជាជនកម្ពុជាទាំងអស់នោះដែរ។
ងាកមក លោក យន់ វុទ្ធី ដែលជា អ្នកគ្រប់គ្រងថ្នាក់ជាតិ វិញ ក៏បានថ្លែងអំណរគុណចំពោះស្ថាប័នប្រកួតដើរបង្ហាញម៉ូដ Classy Model International ដែលបានផ្តល់ពិន្ទុយ៉ាងសុក្រឹត្យ និងមើលឃើញពីតម្លៃនៃការខិតខំប្រឹងប្រែងរបស់បេក្ខជនកម្ពុជា ហើយសម្រេចឱ្យបេក្ខភាព ធិ ធារ៉ា និងកញ្ញា ម៉ៅ នីង ឈ្នះតំណែងលំដាប់រងទីមួយនិងលំដាប់រងទីពីរនៃកម្មវិធី។ អ្នកគ្រប់គ្រងវ័យក្មេងដែលបានបង្កើតកម្មវិធី DIANO Fashion Model សន្យាថាខ្លួននឹង លើកស្ទួយក៏ដូចជាជំរុញគ្រប់សព្វបែបយ៉ាង ពោលគឺធ្វើយ៉ាងណាឱ្យកម្ពុជាឆ្ពោះទៅលើឆាកអន្តរជាតិ។ លោកក៏បានសំណូមពរឱ្យពលរដ្ឋកម្ពុជាចូលរួមគាំទ្រកម្មវិធី និងមាតិកាល្អៗ មិនបំពុល ឬអសីលធម៌ក្នុងសង្គម ដើម្បីជាចំណែកមួយជួយបន្សាបគំនិតអវិជ្ជមានចូលទៅក្នុងផ្នត់គំនិតរបស់យុវជនជំនាន់ក្រោយ។
សូមជម្រាបជូនថា ម្ចាស់តំណែងថ្មោងថ្មី ទាំងពីររូប និងអ្នកគ្រប់គ្រងថ្នាក់ជាតិ របស់កម្ពុជា នឹងធ្វើដំណើរនិវត្តន៍មកដល់មាតុភូមិកម្ពុជា នាព្រលានយន្តហោះអន្តរជាតិនៅថ្ងៃទី២១ ខែឧសភា វេលាម៉ោង៨យប់៕