ថ្មីៗនេះពោលគឺនៅថ្ងៃទី២០ ខែឧសភា កញ្ញា ប៉ុន សុរ៉ាវត្តី ឬនាងប្រហុក ពីភាពយន្តភាគប្រហុកស្រែស្នេហ៍ខ្ញុំ បានចែករំលែកដំណឹងដ៏រីករាយ ព្រោះតួឯកស្រីទាំងក្នុងភាពយន្ត និងក្នុងជីវិតពិតរូបនេះ ទើបតែត្រូវបានបុរសសង្ហាជាគូស្នេហ៍លុតជង្គង់សុំរៀបការកណ្ដាលចំណោមមនុស្សនាប្រទេសកូរ៉េខាងត្បូង។
តារាស្រីដែលកំពុងត្រៀមខ្លួនកាត់សំលៀកបំពាក់កូនក្រមុំ បានថ្លែងពីក្ដីរំភើបរបស់ខ្លួនប្រាប់អ្នកគាំទ្រតាមរយៈបណ្ដាញទំនាក់ទំនងសង្គមហ្វេសប៊ុកថា ដំបូងឡើយកញ្ញា មិនបានដឹងទេថានឹងត្រវគូស្នេហ៍សុំរៀបការ ថែមទាំងលើកឡើងទៀតថា គូស្នេហ៍កញ្ញា ធ្វើឱ្យកញ្ញាយំ ប៉ុន្តែជាទឹកភ្នែកនៃក្ដីរំភើប «អារម្មណ៍មួយដែលនឹកស្មានមិនដល់ទេ ថាគាត់បានសុំខ្ញុំរៀបការនៅទីនេះ។ គាត់បានធ្វើអោយខ្ញុំយំ យំព្រោះសេចក្ដីរំភើបដែល គាត់បានសម្រេចក្ដីស្រមៃមនុស្សស្រីម្នាក់នេះ ក៏ដូចជាគ្រប់គ្នាចង់បាន ចង់លឺ ពាក្យនេះ ពីមនុស្សដែលខ្លួនស្រលាញ់ អរគុណបង សម្រាប់ក្ដីស្រលាញ់រហូតមកដល់ពេលនេះ Love you babe» បន្តមកទៀតកញ្ញាក៏បានបន្ថែមផងដែរថា កញ្ញារំភើបខ្លាំង រហូតដល់យំ ព្រោះតែរកពាក្យអ្វីនឹងមកបរិយាយបាន៖ «គ្មានពាក្យបរិយាយទេ ដឹងត្រឹមតែរំភើប អ្នកណាមិនយំបើលេង Surprised សុំរៀបការ នៅជុំវិញមនុស្សឡើងច្រើន»
គួរដឹងថាតារាសម្ដែងវ័យក្មេងរូបស្រស់ប្រិមប្រិយរូបនេះ កំពុងតែជិតមានចំណងដៃថ្មីសម្រាប់អ្នកគាំទ្ររបស់ខ្លួនតាមរយៈរឿង «ប្រហុកស្រែស្នេហ៍ខ្ញុំ វគ្គ២» ដោយរឿងភាគថ្មីនេះ នឹងមានបញ្ចាំងនៅលើកញ្ចក់ទូរទស្សន៍ភីអិនអិន។បើងាកមកកាលបរិច្ឆេទនៃអាពាហ៍ពិពាហ៍ខ្លួន នឹងគូស្នេហ៍ ស្រីស្រស់រូបនេះនឹងមិនទាន់បានទម្លាយឱ្យអ្នកតាមដាននិងគាំទ្របានដឹងនោះឡើយ៕