សិល្បៈជាតិ៖ នៅពីក្រោយជោគជ័យដ៏ត្រចះត្រចង់ឈ្នះបានតំណែងម៉ូដែលទាំងការប្រកួតផ្នែកបុរសនិងផ្នែកនារី ដោយ ធិ ធារ៉ា ឈ្នះបានតំណែងលំដាប់រងទីមួយ Mr Classy International 2024 និង ម៉ៅ នីង ឈ្នះបានតំណែងលំដាប់រងទីពីរ Miss Classy International 2024 មានរឿងរ៉ាវជាច្រើនដែលហ្វេនៗមិនបានដឹង។
ពេលត្រលប់មកដល់ទឹកដីសុវណ្ណភូមិប្រកបដោយសុខសុវត្ថិភាព បន្ទាប់ពីបានចាកចេញពីប្រទេសកំណើតឆ្ពោះទៅកាន់កោះបាលីទឹកដី ឥណ្ឌូណេស៊ី ដើម្បីប្រកួតប្រជែងក្នុងកម្មវិធីប្រកួតម៉ូដែលកម្រិតអន្តរជាតិ Classy Model International កូនខ្មែរ៣រូបមាន លោក យន់ វុទ្ធី ដែលជា National Director ឬអ្នកគ្រប់គ្រងថ្នាក់ជាតិ លោក ធិ ធារ៉ា ម្ចាស់តំណែង 1st Runner Up Mr. Classy International និងកញ្ញា ម៉ៅ នីង ម្ចាស់តំណែង2nd Runner Up Miss Classy International បានប្រាប់អ្នកសារព័ត៌មានជុំវិញការប្រកួតនិងការខិតខំប្រឹងប្រែងជាច្រើនទម្លាំងអាចឈ្នះតំណែងជូនជាតិ ជាពិសេសគឺការលំបាកមួយចំនួន ដោយមានពេលខ្លះដាច់ទាំងបាយក្រហាយទាំងទឹកផងដែរ។
សូមជម្រាបជូនថាកម្មវិធី Classy Model International 2024 ដែលប្រទេសឥណ្ឌូណេស៊ី ធ្វើជាម្ចាស់ផ្ទះនេះ មិនមែនជាការប្រកួតបែបជាលក្ខណៈ Beauty Pageant របៀបដើរម៉ូដ ឆ្លើយសំនួរ យកអ្នកមានសម្រស់ស្រស់ស្អាត ឬស្រស់សង្ហានោះឡើយ ប៉ុន្តែកម្មវិធីនេះគេផ្ដោតជាចម្បងទៅលើការដើរបង្ហាញម៉ូដ ឬនិយាយបានថាជាការប្រកួតជ្រើសរើសរកម៉ូដែលផ្នែកបុរសនិងម៉ូដែលផ្នែកនារី៕
