សិល្បៈជាតិ៖ នៅថ្ងៃទីអាទិត្យទី២៦ ខែឧសភា ឆ្នាំ២០២៤ នាអគារស.ស.យ.ក ក្រុមយុវជនល្ខោនខោល និងរបាំបុរាណជំនាន់ថ្មីដឹកនាំដោយ លោកគ្រូ ហង់ ភូមិរ៉ា បានរៀបចំពិធីសំពះគ្រូល្ខោនខោលនិងរបាំបុរាណ ប្រពៃណី។
កម្មពិធីសំពះគ្រូប្រចាំឆ្នាំនេះ ដែលបានផ្ដួចផ្ដើមឡើងដោយលោក គ្រូ ហង់ ភូមិរ៉ា ហៅយាយកន្តែរ៉ែ នេះមានការចូលរួមជ្រោមជ្រែងពីក្រុមការងារសហភាពសហព័ន្ធយុវជនកម្ពុជា លោកគ្រូអ្នកគ្រូសាស្ត្រាចារ្យសាកលវិទ្យាល័យភូមិន្ទវិចិត្រសិល្បៈនិងសាលាមធ្យមវិចិត្រសិល្ប: និងបងប្អូនតំណាងមន្ទីរវប្បធម៌និងវិចិត្រសិល្បៈនិងក្រុមសិល្បៈផ្សេងៗផងដែរ។
ការរៀបចំកិច្ចពិធីនេះបានបង្ហាញពីសេចក្ដីដឹងគុណ កតញ្ញូចំពោះគ្រូបាអាចារ្យ ដែលបានលះបង់កម្លាំងញើសឈាមចូលរួមបង្ហាត់បង្រៀនដល់សិស្សរបស់ខ្លួនឱ្យបានចេះចាំ និងមានភាពស្ទាត់ជំនាញ ដែលជាចលនាមួយដ៏សំខាន់នៅក្នុងការរក្សានិងផ្ទេរនូវចំណេះដឹង ជំនាញវិជ្ជាជីវៈដល់អ្នកជំនាន់ក្រោយដែលជាកុលបុត្របន្តវេន ដូចទៅនឹងការលើកឡើងរបស់ទំព័រហ្វេសប៊ុក ទេពបទុមវង្ស ពិណពាទ្យ Orchestra បានសរសេរថា៖ «វប្បធម៌រីករស់ព្រោះមានសន្តិភាព វប្បធម៌ជ្រួតជ្រាបរៀបចំផ្សព្វផ្សាយ វប្បធម៌អប់រំជុំញាតិជិតឆ្ងាយ វប្បធម៌រីកសាយដោយយេីងគាំពារ។»
