មុននេះបន្តិច តារាចម្រៀង និងពិធីការនី ថ្វីមាត់ឆ្នើម កញ្ញា សុភក្ដ្រ កុសុម៉ា បានបង្ហោះចែករំលែករឿងមួយដែលធ្វើឱ្យអ្នកដែលបានឃើញហើយ អាណិតផង និងលួចអស់សំណើចផង ដោយសារតែតារាស្រីរូបនេះត្រូវបានសត្វឃ្មុំទិចរហូតហើមមុខ ហើមមាត់អស់។
នៅរសៀលថ្ងៃទី២៨ ខែឧសភា ឆ្នាំ២០២៤ កញ្ញា កុសុម៉ា បានចែករំលែករឿងឃ្មុំទិចមុខខ្លួននៅលើបណ្ដាញសង្គម ជាមួយនឹង Caption ខ្លីៗថា៖ «ជាតិមុនប្រហែលខ្ញុំជាឃ្មុំហើយ បានជាជាតិនេះឃ្មុំមានការស្រលាញ់ខ្ញុំជាខ្លាំង។ ឃ្មុំនៅចោមរោម ចុះទំរាំ………»
យ៉ាងណាមិញចំពោះមូលហេតុដែលបណ្ដាលឱ្យសត្វឃ្មុំទិច កញ្ញា ដល់ថ្នាក់ហើមមុខហើមមាត់នោះ ត្រូវបានកញ្ញាទម្លាយថា មកពីម្ដាយកញ្ញា ចង់ពិសារឃ្មុំ ប៉ុន្តែមិនបានប្រាប់ពីដើមចមបន្ថែមទៀតឡើយថា ធ្វើបែបម៉េចបានជាឃ្មុំទិច ហើយឃ្មុំទិចប៉ុន្មានទ្រនិចនោះ។