សិល្បៈជាតិ៖ ជាមហាកិត្តិយសមួយដែលកូនខ្មែរ៤រូប សម្រេចបានជោគជ័យសម្រាប់ពាក់កណ្ដាលឆ្នាំ២០២៤ នេះ ដោយបុគ្គលល្បីនិងមានប្រជាប្រិយទាំង៤ដួងនោះ បានទទួលកិត្តិយសឡើងទទួលពានរង្វាន់នៃកម្មវិធី HOFS AWARDS 2024 (Hall of Fame in Singapore 2024)។
កាលពីថ្ងៃទី២៤ ខែឧសភា កន្លងទៅនៅក្នុងកម្មវិធីប្រគល់ពានរង្វាន់ដ៏ធំមួយនាប្រទេសសិង្ហបុរី ដែលបានប្រារព្ធឡើងនៅ The Ritz-Carlton Millenia ដោយកម្មវិធីនេះមានគោលដៅប្រគល់រង្វាន់ដល់អ្នកមានសមត្ថភាពខ្លាំងពូកែទាំងផ្នែកជំនួញនិងសិល្បៈ ដូចជា ធុរជន បុគ្គលមានឥទ្ធិពលលើបណ្ដាញសង្គម និងអ្នកផលិតមាតិកា នៅអាស៊ីអាគ្នេយ៍។
នៅក្នុងចំណោមពានរង្វាន់សរុបចំនួន ២២រង្វាន់ ចែកចេញជា ១៣ប្រភេទនោះ កូនខ្មែរដែលជាតារាសម្ដែង អ្នកផលិតមាតិកា និងជាអតីតបវរកញ្ញាលំដាប់អន្តរជាតិ បានទទួលមហាកិត្តិយសដ៏ឧត្តុង្គឧត្តមនេះមានដូចជា កញ្ញា ស៊ីន យូប៊ីន លោក ខាត់ វ៉ៃហាំង លោក រ៉េននី ដារ៉ា និងកញ្ញា សំណាង អេលីណា។
តារាខ្មែរទាំង៤ ដួងដែលទទួលបានពានរង្វាន់នៅក្នុងឆ្នាំ២០២៤ នេះ មាន៣ដួង ដែលទទួលពានរង្វាន់នៅក្នុងផ្នែកតែមួយដូចគ្នានោះគឺ កញ្ញា ស៊ីន យូប៊ីន លោក ខាត់ វ៉ៃហាំង និងកញ្ញា សំណាង អេលីណា ដោយទទួលបានពានរង្វាន់ The Iconic Figure of Social Media ដែលពានរង្វាន់នេះផ្ដល់ជូនដល់បុគ្គលមានសមត្ថភាពច្រើនផ្នែក មានស្នាដៃ មានការបំផុសគំនិតល្អៗដល់អ្នកដទៃ ហើយមានការទទួលស្គាល់ពីសាធារណជនបានច្រើនជាងគេ ចំណែកលោក រ៉េននី ដារ៉ា ទទួលបានពានរង្វាន់នៅក្នុងផ្នែក Lifestyle influencer hall of fame ដែលជាពានរង្វាន់ផ្ដល់ដល់បុគ្គលល្បីដែលមានរបៀបរបបរស់នៅបានល្អនិងលេចធ្លោជាងគេ។
ឆ្លៀតនៅក្នុងឱកាសដ៏ថ្លៃថ្លានោះដែរ តារាសម្ដែងឆ្នើម ដែលទទួលបានឱកាសក្លាយជាអ្នកដឹកនាំរឿងថ្មោងថ្មី សម្រាប់ភាពយន្តទូរទស្សន៍ ភីអិនអិន ខណៈឡើងថ្លែងពីចំណាប់អារម្មណ៍របស់ខ្លួន កញ្ញាបានលើកយកនូវចំណុចល្អៗពីប្រទេសកម្ពុជាដែលជាប្រទេសកំណើតរបស់ខ្លួន មិនថាទីតាំង ភូមិសាស្ត្រ និងការប្ដេជ្ញាចិត្តខ្ពស់របស់កម្ពុជាក្នុងវិស័យវិនិយោគ ក្នុងគោលដៅទាក់ទាញវិនិយោគិនបរទេសឱ្យចាប់អារម្មណ៍ដាក់ទុនវិនិយោគនៅកម្ពុជា។
សូមជំរាបជូនថា នេះគឺជាឆ្នាំទីពីរហើយ ដែលកំពូលតារាសម្ដែងជាដៃគូដ៏ស័ក្ដិសមបានបណ្ដើរគ្នាទៅទទួលពានរង្វាន់ HFOS នៅប្រទេសសិង្ហបុរី ខណៈដែលទាំង រ៉េននី ដារ៉ា និងស្រីស្អាត សំណាង អេលីណា បានទទួលពានរង្វាន់នៃវេទិកានេះជាឆ្នាំដំបូង៕
