បាត់ដំបង÷ សមត្ថកិច្ចបញ្ជូនមនុស្ស ៦នាក់ទៅតុលាការ ក្រោយការបង្ក្រាបករណីគ្រឿងញៀនច្រើនកញ្ចប់ និងអាវុធខ្លី ២ដើម កាលពីម៉ោង ៩:០០នាទីយប់ថ្ងៃទី ២៨ ខែឧសភា ឆ្នាំ ២០២៤ ត្រង់ចំណុចភូមិកាច់រទេះ ឃុំកំពង់ព្រៀង ស្រុកសង្កែ ខេត្តបាត់ដំបង។
តាមនគរបាលជំនាញបានប្រាប់ឲ្យដឹងថា ការបង្ក្រាបបទល្មើសជាក់ស្តែងនេះ ដំបូងឃាត់ខ្លួនជនសង្ស័យបានចំនួន ២នាក់។ ក្រោយការសាកសួរកម្លាំងបង្ក្រាបឈានដល់ការបង្ក្រាបជនសង្ស័យបានចំនួន ៤នាក់បន្ថែមទៀត ក្នុងភូមិសាស្ត្រចំនួន ២ផ្សេងគ្នា ក្នុងឃុំកំពង់ព្រៀង ស្រុកសង្កែ និងភូមិចំការឫស្សី សង្កាត់ព្រែកព្រះស្ដេច ក្រុងបាត់ដំបង ខេត្តបាត់ដំបង។
ក្នុងប្រតិបត្តិការណ៍នេះ កម្លាំងសមត្ថកិច្ចដកហូតវត្ថុតាងរួមមាន ថ្នាំញៀនប្រភេទមេតំហ្វេតាមីន ហៅម៉ាទឹកកក ICE ចំនួន ០៦ ថង់ ទម្ងន់ ៨៤,៨៨ក្រាម រួមទាំងកាំភ្លើងខ្លីចំនួន ០២ដើមផងដែរផលិតនៅប្រទេសតៃវ៉ាន់ និងប្រទេសអាមេរិក សំបកគ្រាប់កាត់ចំនួន ០៣, កាណុងកាំភ្លើង តចំនួន ០២ និងសម្ភារសម្រាប់កែច្នៃអាវុធមួយចំនួនទៀត។ ជនសង័្សយ ក៏ដូចជាវត្ថុតាង ត្រូវបានផ្នែកជំនាញ កំពុងរៀបចំសំណុំរឿងបញ្ជូនទៅ តុលាការអនុវត្តទោសតាមផ្លូវច្បាប់៕
អត្ថបទ៖ ដំបងក្រញូង
