សិល្បៈជាតិ៖ តារាសម្ដែងរូបសង្ហាលោក សេង មង្គល បានប្រញាប់ប្រញាល់ចេញមកបង្ហោះសារភ្លាមៗ ក្រោយពិនិត្យឃើញថារូបភាពនិងឈ្មោះរបស់លោកត្រូវបានជនអនាមិក យកទៅប្រើប្រាស់ដើម្បីបង្កើតគណនីនៅលើបណ្ដាញទំនាក់ទំនងសង្គមហ្វេសប៊ុក។
នៅម៉ោងប្រមាណជាជិត១ រសៀល ថ្ងៃទី៣០ ខែមិថុនា គណនីផ្លូវការរបស់តារាសម្ដែង សេង មង្គល ដែលមានសរសេរជាភាសាអង់គ្លេស Mongkul seng Real បានចេញមកចែករំលែកនិងការពារកិត្តិយសកេរ្តិ៍ឈ្មោះ ក៏ដូចជាផ្សព្វផ្សាយឱ្យសាធារណជនទូទៅបានដឹង និងចៀសវាងចាញ់បោកជនអនាមិកដែលមានគោលដៅនិងគំនិតទុច្ចរិត ក្នុងអំពើឆបោកណាមួយនោះ។ លោក សេង មង្គល បានបង្ហោះរៀបរាប់នៅលើគណនីរបស់ខ្លួនយ៉ាងដូច្នេះថា៖ ថ្មីៗទៀតហើយ។ ជំរាបសួរអ៊ំពូមីងបងប្អូនទាំងអស់គ្នាដោយសារតែមួយរយៈនេះមានជនមិនស្គាល់មុខបានបន្លំខ្លួនធ្វើជាខ្ញុំដោយប្រើឈ្មោះហ្វេសប៊ុក Bong Mongkul បានឆាតទៅខ្ចីលុយមនុស្សដែលស្គាល់គ្នាជាមួយខ្ញុំក្នុងបែបផែនខលវីដេអូហើយយកវីដេអូឡាយរបស់ខ្ញុំបន្លំសំលេងដើម្បីធ្វើជាខ្ញុំ ហើយក៏មានករណីឆ.បោ.កមួយចំនួនទៀត ដូច្នេះខ្ញុំបាទ សេង មង្គល សូមបញ្ជាក់ទៅកាន់បងប្អូនទាំងអស់គ្នាថាហ្វេសប៊ុករបស់ខ្ញុំមានចំនួន2 គឺ អាខោន Mongkul Seng Real និងផេក Seng Mongkul សេង មង្គល។ ក្រៅពីនេះមិនមែនជារបស់ខ្ញុំនោះទេ។ ជាចុងក្រោយលោក សេង មង្គលបានបញ្ជាក់ទៀតថា ប្រសិនបើមានរឿងហេតុអ្វីកើតឡើងក្រៅពីឈ្មោះទាំង2ខាងលើនេះ ខ្ញុំបាទសូមមិនទទួលខុសត្រូវនោះឡើយបញ្ជាក់ជាថ្មីអខោនខាងក្រោមនេះមិនមែនជារបស់ខ្ញុំទេ ព្រមទាំងដាក់ Hashtag បញ្ជាក់ទៀតថា៖ ប្រយ័ត្នចាញ់បោកគេណាបងប្អូន។
មែនទែនទៅករណីឆបោក ដោយប្រើប្រាស់រូបភាព ឈ្មោះ របស់តារាៗទៅលើជនរងគ្រោះមានកើតឡើងជារឿយៗ ហើយមានតារាប្រុសស្រី និងជនរងគ្រោះមិនតិចនោះឡើយ ដែលធ្លាក់ខ្លួនទៅជានុយនៃទង្វើអបាយមុខមួយនេះ ត្បិតថាមានការប្រកាសផ្សព្វផ្សាយច្រើនពីតារាមួយចំនួន ដែលជាជនរងគ្រោះក្រោមរូបភាពគេយករូបភាពខ្លួនទៅប្រើប្រាស់បោកអ្នកដទៃក្នុងរូបភាពផ្សេងៗព្យាយាមប្រកាស ឱ្យសាធារណជនបានដឹងពីល្បិចកលទុច្ចរិតទាំងនោះក្ដី ប៉ុន្តែនៅតែមានជនរងគ្រោះមួយចំនួននៅតែលង់ជឿ និងចាញ់បោកជនអនាមិកទាំងនោះ។
គេសង្ឃឹមថា តទៅថ្ងៃមុខ នឹងមិនមានជនរងគ្រោះណាមួយ ត្រូវចាញ់បោក បាត់បង់លុយ កាក់ ទ្រព្យរបស់ ដោយសារតែអំពើឆបោកណាមួយនោះទៀត។ មុននឹងជឿឬសម្រេចចិត្តផ្ញើឬផ្ទេរប្រាក់ឱ្យនរណាម្នាក់ គួរតែមានការពិគ្រោះយោបល់ ឬប្រឹក្សាពីមនុស្សជុំវិញខ្លួន ឱ្យបានប្រាកដប្រជា ជាមុនសិន ដើម្បីរំដោះខ្លួនឱ្យរួចផុតពីការចាញ់បោកគេ៕