ក្រុមហ៊ុនបាល់ទាត់ខេមបូឌានព្រីមៀរលីគ ដែលគ្រប់គ្រងទៅលើការប្រកួតពានរង្វាន់បាល់ទាត់លីគកំពូលកម្ពុជា Cambodian Premier League, Cambodian League Cup, Cambodian Super Cup និង Cambodian League 2 បានប្រកាសពីកាលបរិច្ឆេទនៃទីផ្សារដោះដូរកីឡាករដល់ក្លិបជាសមាជិករបស់ខ្លួនហើយ ដើម្បីត្រៀមដំណើរការរដូវកាលថ្មីឆ្នាំ២០២៤-២៥ នាពេលឆាប់ៗខាងមុខនេះ។
បើតាមសេចក្តីជូនដំណឹងរបស់ក្រុមហ៊ុនខេមបូឌានព្រីមៀរលីគ បានបញ្ជាក់ថាកាលបរិច្ឆេទ នៃការផ្ទេរកីឡាករជាតិ និងកីឡាករអន្តរជាតិលើកទី១ មានរយៈពេល២ខែ ពោលគឺក្លិបទាំងអស់ជាសមាជិកអាចចុះឈ្មោះ ឬ ដកកីឡាករចេញពីក្រុមរបស់ខ្លួន ជាផ្លូវការ ចាប់ផ្តើមថ្ងៃទី១ ខែមិថុនា ឆ្នាំ២០២៤ ដល់ថ្ងៃទី៣១ ខែកក្កដា ឆ្នាំ២០២៤។
កាលពីរដូវកាលចាស់កន្លងទៅក្រុមហ៊ុនខេមបូឌានព្រីមៀរលីគ បានអនុញ្ញាតិឱ្យក្លិបជាសមាជិកអាចចុះបញ្ជីកីឡាករយ៉ាងតិចចំនួន១៨នាក់ និងយ៉ាងច្រើន៣៥នាក់ ដោយក្នុងនោះអនុញ្ញាតឱ្យក្លិបនីមួយៗប្រើប្រាស់កីឡាករបរទេសបានចំនួន៦នាក់ ក្នុងនោះដាច់ខាត១នាក់ជាពលរដ្ឋក្នុងតំបន់អាស៊ាន (ASEAN Quota) ១រូបជាពលរដ្ឋក្នុងទ្វីបអាស៊ី (AFC Quota) និង៤នាក់ផ្សេងទៀតជាកីឡាករមកពីប្រទេសសមាជិករបស់សហព័ន្ធកីឡាបាល់ទាត់អន្តរជាតិ (FIFA Quota)។
ការផ្ទេរកីឡាករជាតិ និងកីឡាករអន្តរជាតិលើកទី២ ពោលគឺនៅពាក់កណ្តាលរដូវកាល ក្លិបជាសមាជិកអាចដោះដូរកីឡាករជាពលរដ្ឋខ្មែរបានចំនួន ៦រូប និងកីឡាករអន្តរជាតិ (FIFA) ចំនួន៣រូប។
តើចង់ឱ្យក្លិបដែលអ្នកគាំទ្រនាំចូលកីឡាកររូបណាខ្លះ?
