ភ្នំពេញ៖ ថ្មីៗនេះមានក្រុមអនាមិក បានធ្វើការវាយប្រហារលើអង្គភាពអនុវត្តច្បាប់គ្រឿងញៀន ពិសេសមន្ទីរប្រឆាំងគ្រឿងញៀន ដោយបានបង្កើតហ្វេសបុកក្លែងក្លាយ ផ្សព្វផ្សាយនូវព័ត៌មានមិនពិត និងខំមិន (Comment) ក្នុងផេកហ្វេកប៊ុករបស់ថ្នាក់ដឹកនាំ បង្កឱ្យមានការភ័ន្តច្រឡំរបស់សាធារណជនមកលើអង្គភាពអនុវត្តន៍ច្បាប់។
ជាក់ស្តែង គណនីហ្វេសប៊ុកក្លែងក្លាយ ឈ្មោះ Chean Dorn បានបង្ហោះខ្លឹមសារថា មេធំគ្រឿងញៀន ក្លិប ថាំងហ៊ួយ ឈ្មោះ លី ភីនជាំង (LI PINJIANG) ជនជាតិចិន ត្រូវបានដោះលែងដោយរលូនដោយថ្នូរជាការបង់លុយចំនួន (៥០ម៉ឺនដុល្លារអាមេរិក) ឲ្យទៅខាងមេមន្ត្រីមន្ទីរប្រឆាំងគ្រឿងញៀន ក្រោយឃាត់ខ្លួនកាលពីយប់ថ្ងៃទី៣១ ខែមីនា ឆ្នាំ២០២៤ នៅទីតាំងយីហោ ថាំង ហ៊ួយ ក្លិប ស្ថិតនៅផ្លូវ១០៣ សង្កាត់បឹងត្របែក ខណ្ឌចំការមន រាជធានីភ្នំពេញជាមួយនឹងគ្រឿងញៀន (៧គីឡូក្រាម)។
ជុំវិញការផ្សាយព័ត៌មានខាងលើនេះ ក្រុមការងារប្រតិកម្មរហ័សមន្ទីរប្រឆាំងគ្រឿងញៀន សូមធ្វើការបំភ្លឺជូនសារធារណជនឱ្យបានជ្រាបថា កាលពីថ្ងៃទី០១ ខែមេសា ឆ្នាំ២០២៤ វេលាម៉ោង ០២ និង០៥នាទី កម្លាំងជំនាញនៃមន្ទីរប្រឆាំងគ្រឿងញៀន សហការជាមួយកម្លាំងជំនាញនៃស្នងការដ្ឋាននគរបាលរាជធានីភ្នំពេញ ដោយមានការដឹកនាំសម្របសម្រួលដោយលោក គឹម ហុងសាន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានស្រាវជ្រាវបង្ក្រាបករណីរក្សាទុក ជួញដូរ ចាត់ចែង សម្រួលឱ្យប្រើប្រាស់ និងប្រើប្រាស់ដោយខុសច្បាប់នូវសារធាតុញៀន នៅចំណុចទីតាំងក្លិបកំសាន្ត ថាំងហ៊ួយក្លិប-KTV ផ្ទះលេខ៦៧ ផ្លូវលេខ១០៣ ភូមិ៨ សង្កាត់បឹងត្របែក ខណ្ឌចំការមន រាជធានីភ្នំពេញ ជាលទ្ធផល៖បានឃាត់ខ្លួនមនុស្ស សរុបចំនួន ១១១នាក់ (ស្រី៤២នាក់) ក្នុងនោះជនជាតិខ្មែរ ១៤នាក់ (ស្រី៦នាក់), ជនជាតិចិន ៥៤នាក់ (ស្រី៩នាក់) ជនជាតិវៀតណាម ៣៩នាក់ (ស្រី២៧នាក់) ជនជាតិកូរ៉េ ២នាក់ និងជនជាតិម៉ាឡេស៊ី ២នាក់ និងចាប់យកវត្ថុតាងគ្រឿងញៀន ៦ គីឡូក្រាម ៣៨៨.៥៧ក្រាម។
ឆ្លងតាមការស៊ើបអង្កេតសមត្ថកិច្ចជំនាញយើង បានរកឃើញ មានអ្នកពាក់ព័ន្ធការប្រើប្រាស់គ្រឿងញៀនចំនួន ៣០នាក់ ស្រី១៦នាក់(ជនបរទេសចំនួន ២៨នាក់(ស្រី១៤នាក់) ក្នុងនោះ ជនជាតិវៀតណាម ២២នាក់(ស្រី១៣នាក់) ជនជាតិចិន ៥នាក់(ស្រី១នាក់) និងជនជាតិម៉ាឡេស៊ី ១នាក់ បណ្តេញចេញពីប្រទេសកម្ពុជា និងជនជាតិខ្មែរចំនួន ២នាក់(ស្រី២នាក់) បញ្ជូនទៅមជ្ឈមណ្ឌលព្យាបាល និងស្តារនីតិសម្បទា)។
ចំណែកជនសង្ស័យចំនួន ១៥នាក់ ស្រី៤នាក់ ពាក់ព័ន្ធបទល្មើសជួញដូរ រក្សាទុក ចាត់ចែង សម្រួលឱ្យប្រើប្រាស់ និងប្រើប្រាស់ដោយខុសច្បាប់នូវសារធាតុញៀន(បានបញ្ជូនទៅសាលាដំបូងរាជធានី ភ្នំពេញ ចោទប្រកាន់តាមផ្លូវច្បាប់ ។ ដោយឡែកមនុស្សចំនួន ៦៦នាក់ ស្រី២២នាក់ ក្នុងរង្វង់ប្រតិបត្តិការ ក្នុងនោះ ក៏មាន ឈ្មោះ លី ភីនជាំង (LI PINJIANG) ភេទប្រុស ជនជាតិចិនផងដែរ ពុំមានការពាក់ព័ន្ធបទល្មើសគ្រឿងញៀន ធ្វើកិច្ចសន្យា-អប់រំ អញ្ជើញអាណាព្យាបាលមកទទួលយកទៅលំនៅដ្ឋានវិញ។
ក្រោយការស៊ើបអង្កេត និងតាមការស្តាប់ចម្លើយឈ្មោះ លី ភីនជាំង (LI PINJIANG) និងជនសង្ស័យពាក់ព័ន្ធបទល្មើសចំនួន ១៥នាក់ខាងលើ ព្រមទាំងឈ្មោះ លី ភីនជាំង (LI PINJIANG) ពុំមែនជាមេខ្លោងគ្រឿងញៀនទេ ឬជាប់ពាក់ព័ន្ធបទល្មើសនោះទេ ដោយសារវត្ថុតាងគ្រឿងញៀន ដែលសមត្ថកិច្ចចាប់យក ពុំបានចាប់យក ផ្ទាល់ពីឈ្មោះ លី ភីនជាំង (LI PINJIANG) នោះទេ ហើយពុំមែនជាម្ចាស់វត្ថុតាងគ្រឿងញៀននោះដែរ។ ឈ្មោះ លី ភីនជាំង (LI PINJIANG) បានចូលរួមធ្វើជាសាក្សី នៅក្នុងកំណត់ហេតុចាប់យកវត្ថុតាងនៅកន្លែងកើតហេតុតែប៉ុណ្ណោះ។ ឈ្មោះ លី ភីនជាំង (LI PINJIANG) ពុំមែនជាម្ចាស់ទីតាំង ឬជាបុគ្គលិកបំរើការងារនៅក្នុង KTV ថាំងហ៊ួយនេះទេ តាមការពិតឈ្មោះនេះជាភ្ញៀវ មកកំសាន្តនៅក្នុងទីតាំងខាងលើ ចំពេលសមត្ថកិច្ចយើងចុះបង្ក្រាប។
ជុំវិញការបង្រ្កាបករណីខាងលើនេះ គេឃើញមានសារព័ត៌មានអនឡាញមួយ ឈ្មោះ BDN TV Online ចុះផ្សាយកាលពីថ្ងៃទី១៨ ខែមេសា ឆ្នាំ២០២៤ ដោយចោទប្រកាន់ថា សមត្ថកិច្ចបានដោះលែងមេខ្លោងគ្រឿងញៀនឈ្មោះ លី ភីនជាំង (LI PINJIANG) ជនជាតិចិន បន្ទាប់ពីបង្ក្រាបនៅក្នុងក្លិបថាំងហ៊ួយ។
បន្ទាប់ពីទទួលបានឃើញការចុះផ្សាយនេះភ្លាម មន្ទីរប្រឆាំងគ្រឿងញៀន បានទាក់ទងទៅកាន់សារព័ត៌មាន BDN TV Online អញ្ជើញតំណាងមកអង្គភាពដើម្បីឆ្លើយបំភ្លឺ ដោយបានបញ្ជាក់ថា សារព័ត៌មាន BDN TV Online ចុះផ្សាយនេះ គឺពុំមានប្រភពព័ត៌មានច្បាស់លាស់ទេ គ្រាន់តែឃើញរូបថតឈ្មោះ លី ភីនជាំង(LI PINJIANG) មានដាក់វត្ថុតាងគ្រឿងញៀននៅខាងមុខ និងឃើញដៃមានជាប់ខ្នោះ សន្និដ្ឋានជាមេខ្លោងតែម្តង។ ជាមួយគ្នានេះនៅថ្ងៃទី២៤ ខែមេសា ឆ្នាំ២០២៤ សារព័ត៌មាន BDN TV Online ក៏បានបង្ហោះព័ត៌មានបំភ្លឺវិញថា ជនជាតិចិនឈ្មោះ លី ភីនជាំង (LI PINJIANG)មិនមែនជាមេខ្លោងគ្រឿងញៀននោះទេ ការផ្សព្វផ្សាយរបស់ខ្លួន ជាការយល់ច្រឡំ។
លុះនៅថ្ងៃទី២២ ខែមេសា ឆ្នាំ២០២៤ គណនីហ្វេសប៊ុកឈ្មោះ Chean Dorn បានយករូបភាព និងវីដេអូដែលសារព័ត៌មានអនឡាញ BDN TV Online ផ្សាយគ្មានការពិតនោះ យកទៅផ្សាយបន្ត ដែលនាំឱ្យមានការយល់ច្រឡំជាថ្មី ហើយបានដាក់ចំណងជើងថា៖ មេធំគ្រឿងញៀន ក្លិប ថាំងហ៊ួយ ឈ្មោះ លី ភីនជាំង (LI PINJIANG) ជនជាតិចិន ត្រូវបានដោះលែងដោយរលូន ដោយថ្នូរជាការបង់លុយចំនួន (៥០ម៉ឺនដុល្លារអាមេរិក)ឲ្យទៅខាងមេមន្ត្រីមន្ទីរប្រឆាំងបទល្មើសគ្រឿងញៀន ក្រោយឃាត់ខ្លួនកាលពីយប់ថ្ងៃទី៣១ ខែមីនា ឆ្នាំ២០២៤ នៅទីតាំងយីហោ ថាំង ហ៊ួយ ក្លិប ស្ថិតនៅផ្លូវ ១០៣ សង្កាត់បឹងត្របែក ខណ្ឌចំការមន រាជធានីភ្នំពេញ ជាមួយនឹង គ្រឿងញៀន(៧គីឡូក្រាម)។
ភ្លាមនោះ ក្រុមការងារប្រតិកម្មរហ័សមន្ទីរប្រឆាំងគ្រឿងញៀន បានធ្វើការស្រាវជ្រាវហ្វេសប៊ុកឈ្មោះ Chean Dorn ទើបបង្កើតឡើងរយៈពេលខ្លី គឺនៅថ្ងៃទី១៩ ខែមេសា ឆ្នាំ២០២៤ (ក្រោយ១ថ្ងៃប៉ុណ្ណោះបន្ទាប់ពីព័ត៌មានត្រូវបានផ្សាយលើ BDN TV Online) ហើយម្ចាស់ហ្វេសប៊ុកនេះ ក៏មិនបានបង្ហាញអត្តសញ្ញាណច្បាស់លាស់ថែមទៀត។ ដូច្នេះតាមការសន្និដ្ឋានហ្វេសប៊ុកឈ្មោះ Chean Dorn យករូបភាព និងវីដេអូ គ្មានការពិតមកបង្ហោះនោះ គឺជាគណនីហ្វេសប៊ុកក្លែងក្លាយ បង្ហោះព័ត៌មានក្នុងចេតនាមួលបង្កាច់បង្ខូចកេរ្តិ៍ឈ្មោះលើថ្នាក់ដឹកនាំនៃមន្ទីរប្រឆាំងគ្រឿងញៀន។
ទើបនៅថ្ងៃទី០៨ ខែឧសភា ឆ្នាំ២០២៤ មន្ទីរបានស្នើសុំសហការពី ឯកឧត្ដម ឧត្ដមសេនីយ៍ឯក អគ្គស្នងការរងនគរបាលជាតិ ទទួលផែនប្រឆាំងបទល្មើសបច្ចេកវិទ្យា ជួយស្រាវជ្រាវហ្វេសប៊ុកឈ្មោះ Chean Dorn បន្ត ដោយកំណត់អត្តសញ្ញាណជន ដែលបង្កើតគណនីហ្វេសប៊ុកក្លែងក្លាយនេះមានឈ្មោះ ងន សុងឆាយ ភេទប្រុស អាសយដ្ឋាន ភូមិថ្នល់បំបែក ឃុំទឹកវិញ ស្រុកស្អាង ខេត្តកណ្ដាល នឹងបានអញ្ជើញឈ្មោះ នង សុងឆាយ ឱ្យចូលបំភ្លឺនៅថ្ងៃទី៣០ ខែឧសភា ឆ្នាំ២០២៤។ ហើយតាមការឆ្លើយបំភ្លឺរបស់ឈ្មោះ នង សុងឆាយ ថាខ្លួនពុំមែនជាម្ចាស់ ឬអ្នកប្រើប្រាស់គណនីហ៊េសប៊ុក ឈ្មោះ Chean Dorn នោះទេ ហើយពុំមានការជាប់ពាក់ព័ន្ធនឹងការចុះផ្សាយ និងComment ចូលគេហទំព័រហ្វេសប៊ុកផ្លូវការបស់ថ្នាក់ដឹកនាំនោះទេ។
ដូចនេះ មន្ទីរប្រឆាំងគ្រឿងញៀន សូមបដិសេធទាំងស្រុងនូវការចុះផ្សាយរបស់គណនីហ្វេសប៊ុក ឈ្មោះ Chean Dorn ដែលបានចោទប្រកាន់មកលើអង្គភាពមន្ទីរប្រឆាំងគ្រឿងញៀន។ មន្ទីរប្រឆាំងគ្រឿងញៀន បន្តសហការជាមួយសមត្ថកិច្ចពាក់ព័ន្ធ ដើម្បីស៊ើបអង្កេត ស្រាវជ្រាវរក មុខសញ្ញាដែលកាន់កាប់ ឬប្រើប្រាស់ហ្វេសប៊ុកឈ្មោះ Chean Dorn ដើម្បីយកមកផ្តន្ទាទោសតាមច្បាប់។ ប្រសិនជាសាធារណជនណា អាចផ្តល់ព័ត៌មានសម្ងាត់ពីអត្តសញ្ញាណម្ចាស់គណនីហ្វេសប៊ុក Chean Dorn នេះបាន មន្ទីរប្រឆាំងគ្រឿងញៀន នឹងផ្តល់រង្វាន់ជាទីគាប់ចិត្ត និងរក្សាការសម្ងាត់ជូន៕
អត្ថបទ៖ ចតុមុខ
