សម្តេចធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាស នៅថ្ងៃ ទី៦ខែមិថុនាឆ្នាំ២០២៤នេះថា ព្រែកជីកហ្វូណនតេជោ នឹងបើកការដ្ឋាននៅថ្ងៃទី៥ ខែសីហា ឆ្នាំ២០២៤នេះ។
ការប្រកាសរបស់សម្តេចប្រមុខរាជរដ្ឋាភិបាលនេះធ្វើឡើងនាឱកាសដែលសម្តេចអញ្ជើញសម្ពោធដាក់ឱ្យប្រើប្រាស់កំពង់ផែពហុបំណងកំពត ដែលសាងសង់រួចរាល់ដំណាក់កាលទី១ តម្លៃប្រមាណ ១៤០លានដុល្លារអាមេរិក។
ក្រសួងសាធារណការ និងដឹកជញ្ជូន បានគូសបញ្ជាក់ថា គម្រោងព្រែកជីកហ្វូណនតេជោ គឺជាគម្រោងប្រវត្តិសាស្ត្រលើកទី១ ក្នុងវិស័យដឹកជញ្ជូនផ្លូវទឹករបស់កម្ពុជាដើម្បី តភ្ជាប់ ប្រព័ន្ធទន្លេមេគង្គ និងផ្លូវសមុទ្រ។ ព្រែកជីកនេះ មានប្រវែងប្រមាណ ១៨០គីឡូម៉ែត្រ ចាប់ផ្តើមពីព្រែកតាកែវនៃទន្លេមេគង្គ ឆ្លងកាត់តាម ព្រែកតាឯកនៃទន្លេបាសាក់ រួចចូលតាមព្រែកតាហ៊ីងនៃទន្លេបាសាក់ស្រុកកោះធំ និង បន្តរហូត ដល់ សមុទ្រ ខេត្តកែប ដោយឆ្លងកាត់ខេត្តចំនួន៤ រួមមាន៖ ខេត្តកណ្តាល ខេត្តតាកែវ ខេត្តកំពត និង ខេត្ត កែប ដែលមាន ប្រជាជន សរុបប្រមាណ ១,៦លាននាក់ រស់នៅអមសងខាង ផ្លូវទឹក នេះ។
គម្រោងព្រែកជីកតភ្ជាប់ពីទន្លេទៅកាន់សមុទ្ររបស់កម្ពុជានេះបានបង្កនូវក្តីបារម្ភដល់ប្រទេសជិតខាងគឺវៀតណាមផងដែរ ដោយសារប្រទេសនេះមានការបារម្ភថា គម្រោងនេះនឹង ជះឥទ្ធិពលអវិជ្ជមានដល់បរិស្ថាន និង ប្រព័ន្ធទឹកនៃទន្លេមេគង្គ ជាពិសេសទឹកទន្លេខាង ក្រោម ដែលហូរពីកម្ពុជា ទៅវៀតណាម៕
![](https://cdn.troryorng.com/wp-content/uploads/2024/06/06105127/image-150-1024x711.png)
![](https://cdn.troryorng.com/wp-content/uploads/2024/06/06105232/image-151-1024x683.png)
![](https://cdn.troryorng.com/wp-content/uploads/2024/06/06105311/image-152-1024x683.png)