អន្តរជាតិ៖ ដូចអ្នកគាំទ្រមួយចំនួនបានដឹងហើយថា Selena Gomez បានប្រកាសពីទំនាក់ទំនងខ្លួននិងគូស្នេហ៍ដែលជាផលិតករតន្ត្រីលោក Benny Blanco កាលពីអំឡុងខែ មិថុនា ឆ្នាំ២០២៣ មកដល់ ឆ្នាំ២០២៤ ខែមិថុនា ពោលគឺ ១ឆ្នាំគត់ នៃទំនាក់ទំនងស្នេហានេះ ប៉ុន្តែជារឿយៗរូបសម្រស់សង្សារតារាស្រីរូបនេះ តែងតែត្រូវបានសាធារណជនរិះគន់ ដោយលើកឡើងជាដដែលៗថា លោកមិនសង្ហា មិនស័ក្តិសមជាមួយនឹង Selena នោះឡើយ។
ត្បិតថាមានការរិះគន់ច្រើនទៅលើបុរសជាសង្សាររបស់ខ្លួនក្ដី ប៉ុន្តែមិនអាចធ្វើឱ្យតារាចម្រៀង Selena Gomez រង្គោះរង្គើផ្លូវចិត្តនោះឡើយ ហើយថែមទាំងចេញមុខការពារនិងឆ្លើយតបជួសមុខសង្សារខ្លួន ទៅកាន់មតិរិះគន់មួយចំនួនដែលអ្នកគាំទ្រខ្លះ បានវាយប្រហារទៅលើមុខមាត់របស់លោក Benny ថែមទៀតផង។
ខ្លឹមសារដែល Selena តបទៅកាន់អ្នករិះគន់ មានអត្ថន័យយ៉ាងដូច្នេះ៖ «ខ្ញុំមិនយល់ទាល់តែសោះ ប្រសិនបើអ្នកទាំងអស់គ្នាបារម្ភខ្វាយខ្វល់ពីខ្ញុំ គួរណាស់តែអ្នកទាំងអស់គ្នាដឹងថា នេះគឺជាសេចក្ដីសុខរបស់ខ្ញុំ។ អ្នកទាំងអស់គ្នា អាចនិយាយអ្វីបានតាមចិត្តដែលអ្នកទាំងអស់គ្នាចង់ តែខ្ញុំនឹងមិនឱ្យពាក្យសម្ដីអស់ទាំងនោះរបស់អ្នករាល់គ្នា មកត្រួសត្រាយខ្សែជីវិតរបស់ខ្ញុំឡើយ ខ្ញុំឆ្អែតឆ្អន់ហើយ»
ជាការពិតណាស់ ត្បិតថាតារាជាបុគ្គលសាធារណៈ ជាមនុស្សរបស់មហាជន ប៉ុន្តែតារាក៏មានចិត្តមានបេះដូង មានការស្រលាញ់ខឹងស្អប់ដូចគ្នា យើងមិនអាចបង្គាប់បញ្ជាឱ្យតារាឬសិល្បករដែលយើងស្រលាញ់ធ្វើតាមអ្វីដែលយើងចង់បាននោះឡើយ ព្រោះជីវិតរបស់គេ ជម្រើសរបស់គេ យើងដែលជាអ្នកគាំទ្រមានសិទ្ធិព្រួយបារម្ភ ប៉ុន្តែគ្មានសិទ្ធិហាមឃាត់ ឬចង់ឱ្យតារាធ្វើតាមចិត្តយើងចង់បាននោះទេ មនុស្សម្នាក់ៗមានសិទ្ធិសម្រេច និងចំណង់ចំណូលចិត្តខុសៗគ្នា៕