ផ្កាក្ងោករីកសំពោងព្រោងព្រាតនៅតាមដងវិថីតូចធំ និងជំនីរភ្នំក្នុងក្រុងកែប។ ទិដ្ឋភាពដ៏មនោរមនេះ មួយឆ្នាំមានតែម្ដង ហើយក៏មិននៅយូរប៉ុន្មានទៀតដែរ ផុតខែមិថុនានេះ ផ្កាក្ងោកនឹងរុះរោយជាបណ្ដើរ។ ប្រសិនបើមានពេលគួរទៅទស្សនាកម្សាន្តឲ្យបានសប្បាយ និងថតរូបទុកជាអនុស្សាវរីយ៍។
ខេត្តកែប ជាខេត្តតូចមួយជាប់មាត់សមុទ្រ មានស្រុកមួយ គឺស្រុកដំណាក់ចង្អើរ និងក្រុងកែប។ មានឆ្នេរខ្សាច់ពីរ គឺឆ្នេរស្រី-ស នៅក្នុងក្រុងកែប និងឆ្នេរធម្មជាតិអង្កោល ក្នុងស្រុកដំណាក់ចង្អើរ ចម្ងាយពីក្រុងកែបជិត១គីឡូម៉ែត្រ។ ខេត្តកែបសម្បូរដោយរុក្ខវិថី (ផ្លូវអមដើមឈើ) និងតីរវិថី (ផ្លូវមាត់សមុទ្រ ឬផ្លូវមាត់ទឹក)។ ភ្នំជាប់នឹងសមុទ្រគ្របដោយព្រៃឈើក្រាសឃ្មឹក នាំឲ្យអាកាសធាតុត្រជាក់ល្មម។
ដោយ៖ ឈិន ធារ៉ាត់
