ផ្លរីដា៖ អភិបាលរដ្ឋ Florida លោក Ron DeSantis បានប្រកាសដាក់រដ្ឋក្នុងភាពអាសន្ន កាលពីយប់ថ្ងៃពុធ (ម៉ោងក្នុងស្រុក) ដែលបណ្ដាលមកពីទឹកជំនន់ ដោយសារភ្លៀងធ្លាក់ខ្លាំង សម្រាប់តំបន់មួយចំនួន។ នេះបើយោងតាមការចេញផ្សាយដោយសារព័ត៌មាន ABC News នាថ្ងៃសុក្រ ទី១៣ ខែមិថុនា ឆ្នាំ២០២៤។
តំបន់មួយចំនួនដែលរងគ្រោះធ្ងន់ដោយសារជំនន់ទឹកភ្លៀងមានដូចជា៖ Broward, Collier, Lee, Miami-Dade និង Sarasota។
![](https://cdn.troryorng.com/wp-content/uploads/2024/06/13102357/KETSCS22YZCTHGK256Q2SFHSAU.webp)
![](https://cdn.troryorng.com/wp-content/uploads/2024/06/13102408/SARASOTA-FLOODING-SOE.webp)
បើតាមនាយកដ្ឋានអាកាសធាតុជាតិ នៅទីក្រុងម៉ៃអាមី បានឱ្យដឹងកាលពីល្ងាចថ្ងៃពុធ ថា ផ្នែកខ្លះនៅក្នុងតំបន់ Broward និង Miami-Dade រួមទាំងតំបន់ Hallandale និង Hollywood កំពុងរងការវាយប្រហារដោយគ្រោះទឹកជំនន់ដែលគំរាមកំហែងដល់អាយុជីវិតមនុស្ស សត្វ រួមទាំងប៉ះពាល់ដល់ផ្ទះសម្បែង អាជីវកម្ម និងផ្លូវថ្នល់។
ជាមួយគ្នា អភិបាលក្រុង Fort Lauderdale លោក Dean Trantalis ធ្លាប់បានប្រកាសដាក់រដ្ឋក្នុងភាពអាសន្ន ដោយសារតែ «ភ្លៀងធ្លាក់ខ្លាំងជាបន្តបន្ទាប់» ដែលបានជន់លិចផ្លូវសំខាន់ៗផងដែរ។
![](https://cdn.troryorng.com/wp-content/uploads/2024/06/13102423/1-13.jpg)
![](https://cdn.troryorng.com/wp-content/uploads/2024/06/13102439/2-7.jpg)
លោក Trantalis បាននិយាយនៅលើប្រព័ន្ធផ្សព្វផ្សាយសង្គមថា «បុគ្គលិកគ្រប់គ្រងគ្រាអាសន្នរបស់យើង កំពុងតាមដានយ៉ាងដិតដល់នូវស្ថានភាព នៅទូទាំងទីក្រុង»។ លោកបន្ថែមថា «យើងនឹងពង្រាយភ្នាកងារ និងសម្ភារៈជួយសង្រ្គោះដូចជាទូក និងកាណូត ដើម្បីឆ្លើយតបតាមតម្រូវការនានា»។
ទឹកភ្លៀងកម្រិតរហូតដល់ ១៧៧មិល្លីម៉ែត្រ បានធ្លាក់នៅទូទាំងតំបន់ Broward និង Miami-Dade គិតត្រឹមរសៀលថ្ងៃពុធ ខណៈគេព្យាករ ថា ភ្លៀងធ្លាក់ក្នុងកម្រិតធ្ងន់ធ្ងរជាងនេះ នឹងវាយប្រហារជាបន្តទៀត។
![](https://cdn.troryorng.com/wp-content/uploads/2024/06/13102445/Capture.jpg)
ដោយឡែក អត្រាភ្លៀងធ្លាក់នៅ Fort Lauderdale/Hollywood បានឈានដល់ ១០១មិល្លីម៉ែត្រក្នុងមួយម៉ោង នៅថ្ងៃដដែលនោះ ខណៈតំបន់ Sarasota ក៏មានអត្រាភ្លៀងធ្លាក់ជិត ១០០មិល្លីម៉ែត្រក្នុងមួយម៉ោងផងដែរ។
យ៉ាងណាម៉ិញ មន្រ្តីក្នុងតំបន់មិនទាន់មានសេចក្ដីរាយការណ៍ទាក់ទងអំពីការបាត់ខ្លួន ឬ មានអ្នកណាបាត់បង់ជីវិតដោយសារគ្រោះទឹកជំនន់នេះនៅឡើយទេ ខណៈការព្យាករបានបង្ហាញថា ភ្លៀងនឹងបន្ដធ្លាក់សម្រាប់តំបន់ភាគខាងត្បូងនៃរដ្ឋ Florida រហូតដល់ល្ងាចថ្ងៃសុក្រ នេះបន្ដទៀត ដោយទឹកភ្លៀងអាចមានកម្រិតពី ១៥ ទៅ ២០អ៉ីញ៕
![](https://cdn.troryorng.com/wp-content/uploads/2024/04/27142737/Troryorng-Telegram-1-1024x126-1-1-1-1.jpg)