គិតចាប់តាំងពីឆ្នាំ ២០១៧ មកដល់ឆ្នាំ ២០២៤ នេះ យន្តការច្រកចេញចូលតែមួយ ដែលរាជរដ្ឋាភិបាលបានបង្កើតឡើង ដើម្បីសម្រួលដល់ការផ្ដល់សេវារដ្ឋបាលនៅតាមរដ្ឋបាលថ្នាក់ក្រោមជាតិ មានរយៈពេល៧ឆ្នាំហើយ។ ប៉ុន្តែបើគិតពីដំណើរការពេញលេញតែម្ដង គឺនៅត្រីមាសទី៤ នៃឆ្នាំ ២០១៨ ឯនេះ។ ហើយបច្ចុប្បន្នយន្តការច្រកចេញចូលតែមួយ ដែលដំណើរការបានរលូន និងល្អប្រសើរនោះគឺនៅថ្នាក់ រាជធានី ខេត្ត និងក្រុង ស្រុក ខណ្ឌ។ ដោយឡែកនៅថ្នាក់ឃុំសង្កាត់ហាក់នៅមិនទាន់ល្អប្រសើរនៅឡើយ តែយ៉ាងណារាជរដ្ឋាភិបាលតាមរយៈក្រសួងមហាផ្ទៃ និងក្រសួងស្ថាប័នពាក់ព័ន្ធនៅតែបន្តជំរុញឲ្យយន្តការច្រកចេញចូលតែមួយនៅថ្នាក់រដ្ឋបាលឃុំសង្កាត់ គ្របដណ្ដប់នៅទូទាំងប្រទេស តាមដំណាក់កាលៗ។
យោងតាមការបញ្ជាក់របស់ឯកឧត្ដម សន ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ បានឲ្យដឹងថា គិតចាប់តាំងពីត្រីមាសទី៤ឆ្នាំ ២០១៨រហូតដល់ដាច់ឆ្នាំ ២០២៣ អង្គភាពច្រកចេញចូលតែមួយ រាជ ខេត្ត បានផ្ដល់សេវាជូនប្រជាពលរដ្ឋចំនួន ៣ ២២៥ ២៦៧ សេវា និងទទួលបានចំណូលពីសេវាទាំងនោះ ចំនួន ៤៥៤ ៤៩៥ ៨៩៥ ៥៥១ រៀល ស្មើនឹងប្រាក់ដុល្លារ ១១៣ ៦២៣ ៩៧៩ ដុល្លារ។
ក្នុងរយៈពេលដូចគ្នា ការិយាល័យច្រកចេញចូលតែមួយនៅតាម ក្រុង ស្រុក ខណ្ឌ បានផ្ដល់សេវាជូនប្រជាពលរដ្ឋចំនួន ១៥ ០៧៣ ២០៨ សេវា និងទទួលបានចំណូលពីការបង់ថ្លៃសេវាចំនួន ១៥៩ ៣៩៧ ៥៥០ ៧៦០ រៀល បើគិតជាប្រាក់ដុល្លារប្រមាណជា ៣៩ ៨៤៩ ៣៨៧ ដុល្លារ។
ប្រសិនបើ គិតជាមធ្យមចំណូល ដែលបានពីសេវាច្រកចេញចូលតែមួយ ក្នុងមួយឆ្នាំៗ ខ្ទង់ ២០លានដុល្លារនៅថ្នាក់រាជធានី ខេត្ត និង ៥លានដុល្លារនៅថ្នាក់ ក្រុង ស្រុក ខណ្ឌ។ ចំណូលទាំងនេះ ប្រមាណជា ៨០ ទៅ៩០ភាគរយត្រូវយកទៅប្រើប្រាស់សម្រាប់ការអភិវឌ្ឍនៅក្នុងដែនរដ្ឋបាលសាមីនីមួយៗ ហើយ១០ ទៅ២០ ភាគរយ សម្រាប់បែងចែកទៅកាន់មន្ត្រីដែលបម្រើការនៅក្នុងរដ្ឋបាលសាមីទាំងនោះ។
រាជរដ្ឋាភិបាលបានបង្កើតយន្តការច្រកចេញចូលតែមួយ សម្រាប់ការផ្ដល់សេវារដ្ឋបាលនៅថ្នាក់ក្រោមជាតិ នៅខែកុម្ភៈ ឆ្នាំ ២០១៧ ដែលយន្តការនេះបែងចែកជាបីថ្នាក់គឺ អង្គភាពច្រកចេញចូលតែមួយនៅរដ្ឋបាលរាជធានី ខេត្ត ការិយាល័យច្រកចេញចូលនៅតាមក្រុង ស្រុក ខណ្ឌ និងយន្តការច្រកចេញចូលតែមួយនៅតាមឃុំ សង្កាត់។
យន្តការច្រកចេញចូលតែមួយបង្កើតឡើង ដើម្បីលើកកម្ពស់គុណភាព ប្រសិទ្ធភាព ប្រសិទ្ធផល តម្លាភាព និងគណនេយ្យភាព នៃការផ្ដល់សេវារដ្ឋបាលនៅរដ្ឋបាលថ្នាក់ក្រោមជាតិ តាមរយៈការប្រមូលផ្ដុំការផ្ដល់សេវារដ្ឋបាលលើវិស័យនានានៅកន្លែងតែមួយ ដើម្បីបង្កលក្ខណៈងាយស្រួល និងឆ្លើយតបទាន់ពេលវេលាទៅនឹងតម្រូវការរបស់ប្រជាពលរដ្ឋ។
អត្ថបទ៖ ឈិន ធារ៉ាត់