ក្រុមបាល់ទះនារីប្រេស៊ីល និងជប៉ុន កក់កៅអីវគ្គពាក់កណ្ដាលផ្ដាច់ព្រ័ត្រ នៃព្រឹត្តិការណ៍ប្រកួតពានរង្វាន់បាល់ទះផ្នែកនារីកម្រិតពិពភលោក FIVB Volleyball Women’s Nations League ឆ្នាំ២០២៤ នៅវគ្គ ៨ក្រុមចុងក្រោយ។
![](https://cdn.troryorng.com/wp-content/uploads/2024/06/21133701/ghrete.jpg)
មុនឡើងមកកាន់វគ្គនេះក្រុមបាល់ទះនារីជប៉ុន បានយកឈ្នះក្រុមនារីចិន ក្នុងលទ្ធផល ៣-០ (21–25, 21–25, 22–25) ខណ:ក្រុមបាល់ទះនារីប្រេស៊ីល បានយកឈ្នះក្រុមនារីថៃ ក្នុងលទ្ធផល ៣-០ (25–21, 25–20, 25–23)។
ដោយឡែកសម្រាប់មួយគូទៀត គឺរង់ចាំមើលប្រកួតរវាង ក្រុមបាល់ទះនារីអ៊ីតាលី ត្រូវជួប សហរដ្ឋអាមេរិក វេលាម៉ោង ៥:០០នាទីល្ងាច ក្រុមបាល់ទះនារីប៉ូឡូញ ត្រូវជួប តួកគី វេលាម៉ោង ៨:៣០នាទីយប់ ថ្ងៃទី២១ មិថុនា ២០២៤ ក្រុមដែលឈ្នះ នឹងដឹកដៃគ្នាឡើងទៅជួបនៅវគ្គពាក់កណ្ដាលផ្ដាច់ព្រ័ត្រ នៅថ្ងៃទី២២ មិថុនា។
![](https://cdn.troryorng.com/wp-content/uploads/2024/06/21133719/546fdgs-1.jpg)
ព្រឹត្តិការណ៍ ប្រកួតពានរង្វាន់បាល់ទះកម្រិតពីភពលោកFIVB Volleyball Women’s Nations League ឆ្នាំ២០២៤ ត្រូវបានរៀបចំឡើងដោយសហព័ន្ធកីឡាបាល់ទះអន្តរជាតិ ដែលប្រព្រឹត្តិទៅនៅទីក្រុងបាងកក ប្រទេសថៃ ដោយបានចាប់ផ្ដើមដំណើរការប្រកួតពីថ្ងៃទី១៤ ឧសភា រហូតដល់ថ្ងៃទី២៣ មិថុនា ២០២៤។
ក្នុងមានក្រុមមកពី ១៦ប្រទេសចូលរួម ប្រកួតប្រជែង មានដូចជា៖ ប្រេស៊ីល, ប៊ុលហ្គារី, កាណាដា, ចិន, សាធារណរដ្ឋដូមីនីកែន, បារាំង, អាល្លឺម៉ង, អ៊ីតាលី, ជប៉ុន, ហូឡង់, ប៉ូឡូញ, ស៊ែប៊ី, កូរ៉េខាងត្បូង, តួកគី, សហរដ្ឋអាមេរិក និងថៃ។
![](https://cdn.troryorng.com/wp-content/uploads/2024/06/21133725/rtgsdgs.jpg)
ពានរង្វាន់ FIVB Volleyball Women’s Nations League ត្រូវបានរៀបចំឡើងចាប់ពីឆ្នាំ២០១៨មក ខណៈឆ្នាំដំបូង និងឆ្នាំទី២ ធ្វើឡើងនៅប្រទេសចិន ហើយក្រុមជម្រើសជាតិអាមេរិក ឈ្នះជើងឯកទាំង២លើក ស្របពេលឆ្នាំ២០២០ កន្លងទៅត្រូវបានរំសាយចោលដោយសារស្ថានភាពរីករាលដាលនៃជំងឺកូវីដ-១៩។
លុះដល់ឆ្នាំ ២០២១ ធ្វើនៅប្រទេសអ៊ីតាលី ជើងឯកបានទៅលើក្រុមជម្រើសជាតិអាមេរិកដដែល ចំ ណែកឯឆ្នាំ ២០២២ ធ្វើនៅប្រទេសតួកគី ជើងឯកបានទៅលើក្រុមជម្រើសជាតិអ៊ីតាលី និង ចុង ក្រោយឆ្នាំ ២០២៣ ធ្វើនៅប្រទេសអាមេរិក ជើងឯកបានទៅលើក្រុមជម្រើសជាតិតួកគី៕
![](https://cdn.troryorng.com/wp-content/uploads/2024/06/21133739/rtyrtue-1024x576.jpg)
![](https://cdn.troryorng.com/wp-content/uploads/2024/04/27142737/Troryorng-Telegram-1-1024x126-1-1-1-1.jpg)