ក្រុមកីឡាអេឡិចត្រូនិក See You Soon ផ្នែកបុរស ដែលជាក្រុមកីឡាករជម្រើសជាតិកម្ពុជា Angkor Warriors បានបញ្ចប់បេសកកម្មក្នុងការប្រកួតជម្រុះតំបន់អាស៊ីអាគ្នេយ៍ ដំណើរឆ្ពោះទៅកាន់ការប្រកួតកីឡាអេឡិចត្រូនិកពិភពលោក លើកទី១៦ ឆ្នាំ២០២៤ វិញ្ញាសា Mobile Legends: Bang Bang ត្រឹមវគ្គ Semi Final បន្ទាប់ពីចាញ់ម៉ាឡេស៊ី ក្នុងលទ្ធផល ២ ទល់នឹង ១។
ក្នុងការប្រកួតវគ្គជម្រុះ GROUP STAGE ក្រុមកីឡាអេឡិចត្រូនិកកម្ពុជា See You Soon ផ្នែកបុរស ធ្វើបានល្អ និងមានកៅអីឡើងទៅកាន់វគ្គPlayoff ក្នុងការប្រកួតជម្រុះតំបន់អាស៊ី ដោយត្រូវបន្តជួបក្រុមតំណាងមកពីប្រទេសម៉ាឡេស៊ី។
ឆ្លងកាត់ការប្រកួតវគ្គសន្សំពិន្ទុ ពូល A របស់ក្រុមកីឡាករជម្រើសជាតិកម្ពុជា Angkor Warriors 🇰🇭 វិញ្ញាសា Mobile Legends: Bang Bang ផ្នែកបុរស យើងទទួលបានលទ្ធផលឈ្នះ៣ និងចាញ់១ ដោយមាន ៩ ពិន្ទុ ឈរលេខរៀងទី២។ ដោយឡែកសម្រាប់លទ្ធផលនៅវគ្គ Semi Final ក្រុមកម្ពុជា បានបរាជ័យក្រោមថ្វីដៃរបស់ក្រុមមកពីម៉ាឡេស៊ី ក្នុងលទ្ធផល ២-១ កាលពីល្ងាចថ្ងៃទី២៥ ខែមិថុនា ឆ្នាំ២០២៤។
រំលឹកថា ក្រុម See You Soon តំណាងឲ្យកម្ពុជា ក្នុងនាមជាក្រុមអ្នកចម្បាំងអង្គរ (Angkor Warriors) ទៅចូលរួមប្រកួតជម្រុះតំបន់អាស៊ី ដើម្បីស្វែងរកកៅអីទៅកាន់ការប្រកួតកីឡាអេឡិចត្រូនិកពិភពលោក លើកទី១៦ ឆ្នាំ២០២៤ (IESF – International Esports Federation 16th World Esport Championship 2024) វិញ្ញាសា Mobile Legend: Bang Bang នៅរាជធានីរីយ៉ាត ប្រទេសអារ៉ាប៊ីសាអ៊ូឌីត។
ស្របតាមការយកចិត្តទុកដាក់របស់សហ័ន្ធកីឡាអេឡិចត្រូនិកពីភពលោក ចំពោះការអភិវឌ្ឍន៍ប្រព័ន្ធអេកូកីឡា IESF និងសហព័ន្ធកីឡាអេឡិចត្រូនិកអារ៉ាប៊ីសាអូឌីត ដែលគ្រោងនឹងដាក់ប្រាក់រង្វាន់សរុបចំនួន ១លានដុល្លារអាមេរិក ($1.000.000) ។ ការបង្កើនប្រាក់រង្វាន់នេះគឺដើម្បីលើកកម្ពស់ស្មារតីនៃការរួបរួមប្រកួតប្រជែងបីបណ្ដាលប្រទេសដែលជាសមាជិត កាន់តែខ្លាំងក្នុងចំណោមអត្តពលិកទាំងអស់។
គួរដឹងថា សម្រាប់ប្រាក់រង្វាន់ជើងឯកពិភពលោកនេះ បានកើនឡើង ១០ដងចាប់តាំងពីការចាប់ផ្ដើមដំបូងនៅឆ្នាំ២០២១ ហើយនឹងបន្តកើនឡើងជាបន្តបន្ទាប់នាពេលអនាគត។ សម្រាប់ការប្រកួតជើងឯកពិភពលោកកីឡា Esports ដែលគ្រោកនឹងប្រព្រឹត្តទៅនៅទីក្រុងរីយ៉ាដ ប្រទេសអារ៉ាប៊ីសាអូឌីត ចាប់ពីថ្ងៃទី១១ ដល់ថ្ងៃទី១៩ ខែវិច្ឆិកា ឆ្នាំ២០២៤៕
