សិល្បៈជាតិ៖ ឆ្លងកាត់ការប្រកួតដ៏ស្វិតស្វាញជាច្រើនសប្ដាហ៍ ទីបំផុត បេក្ខជន នាង សម្បត្តិ បានក្លាយជាម្ចាស់ពាន Road 2 the Star រដូវកាលទី៣ ក្រោមការជួយបង្ហាត់បង្ហាញនិងជ្រោមជ្រែងពីគណៈកម្មាករទាំង៣រូបមាន លោក នីកូ កញ្ញា ស៊ីន យូប៊ីន និង លោក P-sand។
កាលពីថ្ងៃទី៣០ ខែមិថុនា ឆ្នាំ២០២៤ កម្មវិធីប្រកួត Road 2 The Star រដូវកាលទី៣ បានឈានមកដល់វគ្គផ្ដាច់ព្រ័ត្រ ក្រោយឆ្លងកាត់ការប្រកួត ពីមួយសប្ដាហ៍ដើម្បីដុះខាត់ និងជ្រើសរើសយកបានបេក្ខភាពឆ្នើមលើឆ្នើម កាន់ពានជាម្ចាស់ពាននៃកម្មវិធី Road 2 the Star ទីបី។ នៅរាត្រីផ្ដាច់ព្រ័ត្រក្នុងចំណោមភ្ញៀវកិត្តិយសនិងអ្នកគាំទ្រដ៏ច្រើនកុះករ បេក្ខភាពខ្លាំង៣រូបបានឈានមកដល់វគ្គផ្ដាច់ព្រ័ត្រ ប៉ុន្តែមានតែបេក្ខភាពម្នាក់គត់ដែលអាចក្លាយជាម្ចាស់ពាននៃកម្មវិធី។
ទីបំផុតបេក្ខជនដែលមានសំឡេងបោះឆ្នោតគាំទ្រយ៉ាងច្រើនលើសគេ ហើយបានក្លាយជាម្ចាស់ពានទី៣ គឺបេក្ខជននាងសម្បត្តិ ដែលមានលេខសម្គាល់ RS-03 ខណៈដែលបេក្ខជន RS-01 ទទួលបានចំណាត់ថ្នាក់លេខ២ រីឯបេក្ខភាព និងលេខ៣ បានទៅលើបេក្ខជន RS-06 ផាមមី។
សម្រាប់បេក្ខជន នាង សម្បត្តិ ធ្លាប់ឈ្នះបេះដូងអ្នកគាំទ្រ និងមានហ្វេនៗស្រលាញ់ ចូលចិត្តយុវជនមុខសង្ហារូបនេះច្រើនលើសលប់ម្ដងហើយ ព្រោះធ្លាប់បានចូលរួមប្រកួតនៅក្នុងកម្មវិធីលំដាប់អន្តរជាតិ The Voice Cambodia រដូវកាលទី៣ ប៉ុន្តែកាលនោះ មិនអាចឈោងចាប់ដល់ក្ដីសុបិន ក្លាយជាម្ចាស់ពាន ដោយរបូតពានឱ្យទៅ យុវតី លឹម សេរីហាន់នីកា យ៉ាងណាមិញ បរាជ័យពីអតីតកាល គ្រាន់តែជាចំណុចចាប់ផ្ដើមនៃជោគជ័យនៅក្នុងបច្ចុប្បន្នកាលនេះប៉ុណ្ណោះ ព្រោះសម្បត្តិនៅតែមិនបោះបង់ចោលការតស៊ូ ព្យាយាម និងពិសោធន៍ឱ្យមនុស្សជុំវិញខ្លួនបានមើលឃើញថា សម្បត្តិ មានទេពកោសល្យ និងសម្បត្តិភាពគ្រប់គ្រាន់ក្នុងការក្លាយជាម្ចាស់ពាននៃកម្មវិធី Road 2 the Star រដូវកាលទីបី។
