សិល្បៈអន្តរជាតិ៖ តារាសម្ដែង Huang Xiaoming អតីតស្វាមីតារាសម្ដែងស្រី Angelababy ត្រូវបានគេមើលឃើញថាបានបណ្ដើរមិត្តស្រីនាង Yeke ក្រោយពីឡើងទទួលពានរង្វាន់ Best Actor Award រួច។
កាលពីថ្ងៃអង្គារ តារាសម្ដែងវ័យ៤៧ ឆ្នាំ និង មិត្តស្រីទទួលបាននូវការចាប់អារម្មណ៍ច្រើននៅលើបណ្ដាញសង្គម ក្រោយក្រុមកាសែតរបស់ Sohu បានថតឆ្មក់បានរូបភាពលោកក្រោយឈ្នះពានរង្វាន់ក្នុងកម្មវិធី Shanghai International Film Festival រួចបានបណ្ដើរគ្នាត្រសងជាមួយនឹងមិត្តស្រី ក្រោយចប់កម្មវិធីប្រគល់ពានលោកបានចាកចេញពី ស៊ាងហៃ ដោយមានមិត្តស្រីចាំទទួលស្វាគមន៍លោកនៅព្រលានយន្តហោះ ជាមួយនឹងបាច់ផ្កា ដើម្បីជាការសាទរជោគជ័យរបស់លោក។
លោក Huang និងកញ្ញា Ye បានរក្សាចំណងស្នេហ៍យ៉ាងរឹងមាំអស់រយៈពេលជាងមួយឆ្នាំហើយ ដោយថ្មីៗនេះ កញ្ញា Ye ចាប់ផ្ដើមបង្ហាញខ្លួនទៅលេងលោកដល់កន្លែងថត និងជួបជុំញ៉ាំអាហារជាមួយនឹងមិត្តភក្ដិរបស់លោក។ រំលឹកឡើងវិញ ចំណងស្នេហ៍របស់អ្នកទាំងពីរនេះទទួលបានការចាប់អារម្មណ៍ច្រើនពីហ្វេន ដោយមានមនុស្សមិនតិចទេដែលបានចោទប្រកាន់ថាកញ្ញា Ye គឺជាជនទីបី ដែលចូលមកធ្វើឱ្យគ្រួសារដ៏មានសុភមង្គលរវាង Huang Xiaoming និង Angelababy ដើរដល់ផ្លូវបំបែក៕
