បន្ទាប់ពីបានរួមចំណែកជាមួយវិស័យបាល់ទាត់កម្ពុជា អស់រយពេលជាច្រើនឆ្នាំរួចមកពេលនេះកីឡាករបរទេស ៣រូបបានទទួលសញ្ជាត់ខ្មែរជាផ្លូវការ គឺទី១ កីឡាករ Yudai Ogawa មានដើមកំណើតជប៉ុន ទី២ កីឡាករ Privat Mbarga មានដើមកំណើតកាមេរូន និងកីឡាករ Hikaru Mizuno ដើមកំណើតជប៉ុន។
កាលពីយប់ថ្ងៃទី១១ ខែកក្កដា ឆ្នាំ២០២៤ កន្លងទៅ ក្លិបបាល់ទាត់ព្រះខ័នរាជស្វាយរៀង បានប្រកាសពីកីឡាករជនជាតិជប៉ុន Hikaru Mizuno ទទួលបានសញ្ជាតិខ្មែរ និងជាកីឡាករទី៣ ត្រៀមជួយជម្រើសជាតិកម្ពុជា ប្រកួតពានរង្វាន់នានាខាងមុន។
កីឡាករ Hikaru Mizuno បច្ចុប្បនេះមានវ័យ៣២ ឆ្នាំ ចូលរួមក្នុងវិស័យបាល់ទាត់នៅកម្ពុជាដំបូងនៅឆ្នាំ២០១៦ កាលនោះរួមគេចូលរួមជាមួយក្លិបបាល់ទាត់ព្រះខ័នរាជស្វាយរៀង។
មុនចូលរួមប្រកបអាជីបនៅលីគកំពូលកម្ពុជា កីឡាករដែលមានវ័យ៣២ឆ្នាំរូបនេះធ្លាប់ចូលរួមជាមួយក្លិបបាល់ទាត់ FC Ryukyu លីគទី៣របស់ប្រទេសជប៉ុន ចន្លោះឆ្នាំ២០១៤ ក្រោយមកនៅឆ្នាំ២០១៥ រូបគេបានទៅប្រកបអាជីបជាមួយក្លិបបាល់ទាត់ Albirex Niigata Singapore លីគកំពូលរបស់សិង្ហបុរី បង្ហាញខ្លួនបាន ២៧ប្រកួត រកបាន២គ្រាប់ក្នុងនាមជាកីឡាករខ្សែបម្រើប្រយុទ្ធ។
នៅឆ្នាំ២០១៦ កីឡាករ Hikaru Mizuno បានផ្ទេមកចូលរួមជាមួយក្លិបព្រះខ័នរាជស្វាយរៀង បង្ហាញខ្លួនបាន៤៥ប្រកួត រកបាន៦គ្រាប់។ នៅឆ្នាំ២០១៧ ដល់ឆ្នាំ២០២១ បានចូលរួមជាមួយបឹងកេត ឆ្នាំ២០២២ ទៅស្វាយរៀងវិញ ហើយឆ្នាំ២០២៣-២៤ ត្រូវបានក្លិបគិរីវង់សុខសែនជ័យ ខ្ចីជើង១រដូវកាល បង្ហាញខ្លួន១៥ប្រកួតរកបាន១គ្រាប់។
សូមរំលឹកថា ក្រៅពីកីឡាករ Hikaru Mizuno ក៏មានកីឡាករចូលសញ្ជាតិ២រូបទៀត ក្នុងនោះរួមមាន កីឡាករ Yudai Ogawa ជនជាតិជប៉ុន សញ្ជាតិខ្មែរ និង Privat Mbarga ជនជាតិកាមេរូន សញ្ជាតិខ្មែរដែលអ្នកទាំងពីររូបនេះត្រូវបានសហព័ន្ធបាល់ទាត់កម្ពុជា ប្រកាសជាផ្លូវការកាលពីពេលកន្លងទៅ។
សម្រាប់កីឡាករ Yudai Ogawa ត្រូវបានសហព័ន្ធបាល់ទាត់កម្ពុជា ប្រកាសចូលសញ្ជាតិជាផ្លូវការ នៅថ្ងៃទី៦ ខែតុលា ឆ្នាំ២០២៣ កន្លងទៅ បង្ហាញខ្លួនបាន៧ប្រកួតរកបាន១គ្រាប់ ឱ្យក្រុមជម្រើសជាតិកម្ពុជា។
ខណៈកីឡាករ Privat Mbarga ត្រូវបានប្រកាសជាផ្លូវការនៅថ្ងៃទី៨ ខែកក្កដា ឆ្នាំ២០២៣ ប៉ុន្តែរូបគេមិនទាន់បានបង្ហាញខ្លួនឱ្យក្រុមជម្រើសជាតិកម្ពុជា នៅឡើយទេ៕
