ក្លិបបាល់ទាត់វិសាខា សមាជិកពានរង្វាន់លីគកំពូលកម្ពុជា Cambodian Premier League បានធ្វើដំណើរបោះជំរំហ្វឹកហាត់ និងប្រកួត Pre-Season នៅប្រទេសថៃ ចាប់ពីថ្ងៃទី១១-២១ ខែកក្កដា ឆ្នាំ២០២៤ ដើម្បីត្រៀមប្រកួតរដូវកាលថ្មី ឆ្នាំ២០២៤/២៥ ខាងមុខ ព្រមទាំងទទួលបានការស្វាគមន៍យ៉ាងកក់ក្ដៅនៅទីនោះថែមទៀតផង។
បើយោងតាមការចេញផ្សាយនៅក្នុង App របស់ក្លិបបាល់ទាត់វិសាខា បានបញ្ជាក់ថា៖«ក្នុងនាមក្រុមក្មេងខ្ចី ដែលបានកសាងនូវសមិទ្ធផលជាច្រើន សម្រាប់ការប្រកួតប្រជែងក្នុងប្រទេស និងលើឆាកអន្ដរជាតិ ក្រោមទស្សនៈវិស័យដ៏វែងឆ្ងាយ និងច្បាស់លាស់របស់ថ្នាក់ដឹកនាំក្លិប ដែលមានលោកជំទាវ កែ សួនសុភី ជាប្រធានក្លិប ដំណើរ Pre-Season នេះ បានទទួលការស្វាគមន៍យ៉ាងកក់ក្ដៅពីភាគីថៃ និងបានចាត់ទុក វិសាខា គឺជាក្លិបលំដាប់កំពូលមួយនៅកម្ពុជាទៀតផង»។
តាមគម្រោងក្នុងដំណើរ Pre-Season ត្រៀមរដូវកាលថ្មីនេះដែរ វិសាខា មានការប្រកួតហ្វឹកហាត់មួយចំនួន ជាក់ស្ដែងការប្រកួតដំបូង ជាមួយក្រុម Pattaya United FC កាលពីថ្ងៃទី១៣ ខែកក្កដា វិសាខា បានទទួលជ័យជម្នះ ២-១ ។ ចំណែកនៅសល់ ៤ប្រកួតទៀត រួមមានថ្ងៃទី១៦-កក្កដា ត្រូវជួបក្រុម Samut Prakan City FC, ថ្ងៃទី១៧-កក្កដា ត្រូវជួបក្រុមខ្លាំងថៃ BG Pathum United និងថ្ងៃទី២០-កក្កដា មានការប្រកួតហ្វឹកហាត់ ២ប្រកួត រួមមានជួបក្រុម BFB Pattaya City FC ពេលព្រឹក និងជួយក្រុម Chanthaburi FC នាល្ងាច ។
ក្លិបបានបញ្ជាក់ទៀតថា៖«ទាំងអស់នេះ ឆ្លុះបញ្ចាំងឲ្យឃើញពីការយកចិត្តទុកដាក់របស់ថ្នាក់ដឹកនាំក្លិប ពិសេសលោកជំទាវប្រធានក្លិប ចំពោះក្រុមការងារគ្រូ និងកីឡាករ ដើម្បីត្រៀមខ្លួនបានកាន់តែប្រសើរ សម្រាប់ការប្រកួតរដូវកាលថ្មី តាមរយៈការបោះជំរំហ្វឹកហាត់ក្រៅប្រទេស ក៏ដូចជាការប្រកួតលក្ខណៈកម្ដៅសាច់ដុំ ឬប្រកួតហ្វឹកហាត់ ជាមួយក្រុមបរទេសនាពេលនេះ ។ ពួកយើងសង្ឃឹមថា ផ្អែកលើការយកចិត្តទុកដាក់នេះ ក្រុមទាំងមូល នឹងព្យាយាមសម្រេចបាននូវសមិទ្ធផលមួយដ៏ល្អប្រសើរជូនក្លិប អ្នកគាំទ្រ ពិសេសជូនថ្នាក់ដឹកនាំក្លិបរបស់យើង នារដូវកាលថ្មីខាងមុខ»។
ក្លិបកីឡាបាល់ទាត់ វិសាខា គឺជាក្លិបដំបូងគេ និងជាក្លិបបាល់ទាត់តែមួយគត់នៅប្រទេសកម្ពុជា ដែលបានគ្រងជើងឯកពានរង្វាន់សម្ដេចអគ្គមហាសេនាបតីតេជោ ហ៊ុន សែន ៣រដូវកាលជាប់គ្នា គឺនៅឆ្នាំ២០២០, ២០២១ និង២០២២។
បច្ចុប្បន្នវិសាខា ក៏ជាក្លិបលេចធ្លោរមួយ ដែលមានហេដ្ឋានរចនាសម្ព័ន្ធដ៏សម្បូរបែប ទំនើប និងស្ដង់ដារ សម្រាប់បម្រើឲ្យការបណ្ដុះបណ្ដាល អភិវឌ្ឍន៍ និងបម្រើឲ្យការប្រកួត ទាំងក្របខណ្ឌជាតិ និងអន្ដរជាតិទៀតផង ពិសេសកីឡដ្ឋានព្រីនស៍ ដែលទើបទទួលរៀបចំការប្រកួតកីឡាស៊ីហ្គេម លើកទី៣២ ផ្នែកបាល់ទាត់បុរស កាលពីឆ្នាំ២០២៣ កន្លងទៅជាដើម៕
