ក្រុមមកពីលីគកំពូលកម្ពុជា មានព្រះខ័នរាជស្វាយរៀង ភ្នំពេញក្រោន បឹងកេត និងវិសាខា សុទ្ធសឹងតែរកបានជ័យជម្នះដូចគ្នា នៃពានរង្វាន់សម្តេចតេជោ ហ៊ុន សែន (Hun Sen Cup) ជើងឯកថ្នាក់ជាតិ លើកទី១៩ ឆ្នាំ២០២៥-២៦ ប្រកួតជើងទី១ ខណ:គ្រាប់ស៊ុតបញ្ចូលទីគ្នាសរុបមានចំនួន ៣២គ្រាប់ បញ្ចប់នៅថ្ងៃទី២១ មករា ២០២៦នេះ។
កម្មវិធីប្រកួតជើងទី១ វគ្គ១៦ក្រុមចុងក្រោយគឺ នៅថ្ងៃទី២១ មករា ២០២៦៖
- បាត់ដំបងយូណៃធីត ២-៥ ព្រះខ័នរាជស្វាយរៀង ទីលានសកលវិទ្យាល័យជាតិបាត់ដំបង
- សមាគមកីឡាបាល់ទាត់ខេត្តត្បូងឃ្មុំ ០-៣ ក្រុមភ្នំពេញក្រោន ទីលានវិទ្យាល័យ ប៉ុន រ៉ានី ហ៊ុនសែមេមុត
- ឡាយអ៊ិនឃីង ខេត្តសៀមរាប ០-៩ បឹងកេត កីឡដ្ឋានអាគីហីរ៉ូកាតុ
- ភ្នំពេញហ្គាឡាក់ស៊ី ០-១៣ វិសាខា ទីលានវិទ្យាស្ថានជាតិអប់រំកាយ និងកីឡា
ការប្រកួត ចាប់ផ្តើមពីថ្ងៃទី២១ ខែមករា ដល់ថ្ងៃទី២៤ ខែឧសភា ឆ្នាំ២០២៦ ដោយតម្រូវឱ្យក្រុមទាំង១៦ ប្រកួតប៉ះដៃគូចំនួន២ជើង ក្នុងនិងក្រៅដី។ ចំនួនក្រុមដែលមានគ្រាប់បាល់ច្រើនជាងគេសរុបទាំងពីរជើង នឹងឡើងទៅវគ្គបន្ត ពីវគ្គ១៦ក្រុម ដល់វគ្គពាក់កណ្តាលផ្តាច់ព្រ័ត្រ ខណៈវគ្គផ្តាច់ព្រ័ត្រ គឺធ្វើតែមួយជើងទេ នៅទឹកដីកណ្តាល។
សូមរំឭកថា ក្រុមមន្ទីរ អយក ខេត្តកំពង់ចាម ម្ចាស់ជើងឯក ពានរង្វាន់សម្តេចតេជោ ហ៊ុន សែន (Hun Sen Cup) ជើងឯកថ្នាក់ខេត្ត លើកទី១៩ ឆ្នាំ២០២៥-២៦ ក្រោយយកឈ្នះក្លិបបាល់ទាត់ឡាយអ៊ិនឃីង ខេត្តសៀមរាប ២-១ នៅវគ្គផ្ដាច់ព្រ័ត្រ ក្នុងពហុកីឡដ្ឋានជាតិ រាជធានីភ្នំពេញ កាលពីថ្ងៃទី២១ ធ្នូ ២០២៥។
សម្រាប់ពានរង្វាន់សម្តេចតេជោ ហ៊ុន សែន (18th Hun Sen Cup) ថ្នាក់ជាតិ ត្រូវរៀបចំឡើងតាំងពីឆ្នាំ២០១៧ ដែលធ្វើឡើងជារៀងរាល់ឆ្នាំ ដោយព្រះខ័នរាជស្វាយរៀង ឈ្នះជើងឯកបានច្រើនជាងគេ ៥លើក ក្រសួងការពារជាតិ បាន ៣លើក វិសាខា បាន ៣លើក ភ្នំពេញក្រោន បាន ២លើក ខណ:ណាហ្គាវើលដ៍ ក្រសួងមហាផ្ទៃ បឹងកេត និងខេមរកីឡា ឈ្នះបាន ១លើកដូចគ្នា៕
