ក្លិប Jakarta Bhayangkara Presisi ម្ចាស់ជើងឯកលីគកំពូលរបស់ឥណ្ឌូណេស៊ី និងជាម្ចាស់ជើងឯករងជើងឯកទ្វីបអាស៊ី ឆ្នាំចាស់ គឺជាបេក្ខភាពតែគត់ទៅពីតំបន់អាស៊ាន ដើម្បីចូលរួមប្រជែងជើងឯកប្រចាំទ្វីប Asian Men’s Club Volleyball Championship ឆ្នាំ២០២៤ នេះនៅទីក្រុង Yazd របស់អ៊ីរ៉ង់។
យោងតាមការចេញផ្សាយរបស់សហព័ន្ធកីឡាបាល់ទះអ៊ីរ៉ង់ ដែលជាម្ចាស់ផ្ទះបានបញ្ជាក់ថាការប្រកួតជើងឯកក្លិបប្រចាំទ្វីបអាស៊ី នេះនៅសល់តែ៨ក្លិបប៉ុណ្ណោះ ក្រោយក្លិប Wolfdogs Nagoya របស់ជប៉ុន ក្លិប Taichung Winstreak របស់តៃវ៉ាន់ និងក្លិប Badding Wo Li VC របស់ចិន បានប្រកាសដកខ្លួន។
មូលហេតុដែលមានក្លិបខ្លះប្រកាសដកខ្លួនក៏ព្រោះតែពានរង្វាន់មួយនេះ មានការលើកពេលជាបន្តបន្ទាប់ ដោយដំបូងឡើយគ្រោងធ្វើឡើងនៅខែមេសា កន្លងទៅ ប៉ុន្តែបានប្តូរកាលបរិច្ឆេទ មកកាន់ខែកញ្ញា វិញ ព្រោះជាន់គ្នានឹងការប្រកួតកីឡាអូឡាំពិក រដូវក្ដៅ នៅក្រុងប៉ារីស។
ក្លិបដែលនៅសល់ទាំង៨នោះមាន
*ពូល A
Shahdab Yazd (អ៊ីរ៉ង់)
Kuwait Sporting Club (គុយវ៉ែត)
Jakarta Bhayangkara Presisi (ឥណ្ឌូណេស៊ី)
Pavlodar (កាហ្សាក់ស្ថាន)
*ពូល B
Gas Al Janoob (អ៊ីរ៉ង់)
Al-Rayyan (កាតារ)
Kam Air (អាហ្វហ្គានីស្ថាន)
Foolan Sirjan Iranian (អ៊ីរ៉ង់)
សម្រាប់ក្លិប Jakarta Bhayangkara Presisi របស់ឥណ្ឌូណេស៊ី ត្រូវបានគេហទំព័រ worldofvolley បញ្ជក់ថ្មីៗនេះថា បាននាំយកម្ចាស់មេដាយមាសអូឡាំពិក ជម្រើសជាតិបារាំង ២រូបមកចូលរួមក្រុម មុនធ្វើដំណើរទៅកាន់អ៊ីរ៉ង់ ដែលជាទីកន្លែងត្រូវប្រកួតជើងឯកប្រចាំទ្វីប។ កីឡាករទាំង២រូបនោះមាន Earvin Ngapeth និង Jean Patry។
ក្នុងការប្រកួតពានរង្វាន់ Asian Men’s Club Volleyball Championship កន្លងទៅក្លិប Jakarta Bhayangkara Presisi បានត្រឹមរងជើងឯកក្រោយ ចាញ់ក្លិប Suntory Sunbirds របស់ជប៉ុន នៅវគ្គផ្ដាច់ព្រ័ត្រ ដោយលទ្ធផល៣សិតទល់១សិត នៅទីក្រុង Manama ប្រទេសប៉ារែន។
ពានរង្វាន់ Asian Men’s Club Volleyball Championship បង្កើតឡើងដំបូងនៅឆ្នាំ ១៩៩៩ ដោយប្រកួតរាល់១ឆ្នាំម្តង ប៉ុន្តែមានការកំណត់កូតាតាមជា៤តំបន់ក្នុងទ្វីបអាស៊ី ដោយក្នុងនោះមានអាស៊ីកណ្តាល, អាស៊ីខាងលិច, អាស៊ីខាងកើត និងអាស៊ីភាគអាគ្នេយ៍។ ក្លិបមកពីប្រទេសអ៊ីរ៉ង់ ឈ្នះពានរង្វាន់នេះច្រើនជាងគេ គឺរហូតដល់១៦ ដង ខណៈក្លិប Paykan Tehran ឈ្នះបាន៨ដងម្នាក់ឯង៕
