លោកបណ្ឌិត អាំង សិរីពិសិដ្ឋ អនុប្រធាន និងជាអគ្គលេខាសហព័ន្ធកីឡាបាល់ទះកម្ពុជា បានលើកឡើងថា ផ្អែលលើលទ្ធផលប្រកួតកីឡាជាតិលើកទី៤ ប្រភេទកីឡាបាល់ទះក្នុងសាល ក្រោយការដឹកនាំចង្អុលបង្ហាញពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានសហព័ន្ធកីឡាបាល់ទះកម្ពុជា យើងនឹងរៀបចំពានរង្វាន់កីឡាបាល់ទះ ៧មករា ដែលមានឈ្មោះថា«ពានរង្វាន់ ឯកត្តមសន្តិបណ្ឌិត នេត សាវឿន ឆ្នាំ២០២៥»។
អនុប្រធាន បានបន្ថែមថា វាគឺជាព្រឹត្តិការណ៍ដ៏អស្ចារ្យ មុនឈានដល់ការប្រកួត«តេជោលីគ» ដែលក្លិបទាំងអស់ត្រូវការសមដៃ ដែលពាន ៧មករា នឹងមានវិញ្ញាសានារី ដែលគ្រោងអញ្ជើញក្លិបដែលមកពីសាលាឯកជន ដោយសង្គេតឃើញថាកីឡាករនារីនៅតាមបណ្ដាលក្លិប សាលារៀនវិស័យឯកជន មានការសប្បទាល្អ។ ការចាប់ផ្ដើម នឹងមានការប្រមូលផ្ដុំរៀងរាល់ថ្ងៃសៅរ៍ អាទិត្យ ឈានដល់ដូចទៅនិងបុរស។
លោក បន្ថែមថា សម្រាប់ព្រឹត្តិការណ៍មួយនេះ នឹងមានការរៀបចំប្រកួតជារៀងរាល់ឆ្នាំ ដែលជា Preseason ដើម្បីអោយកីឡាករបានត្រៀមខ្លួន ក៏ដូចជាអោយគ្រូបង្វឹកមើលពីចំណុចខ្វះខាត់របស់កីឡាករ ក្រុម ដើម្បីធ្វើការកែលម្អ មុនការប្រកួតលីគចាប់ផ្ដើម។
លោកបណ្ឌិត អាំង សិរីពិសិដ្ឋ បានបញ្ជាក់ថា សម្រាប់ពាន ៧មករា ឆ្នាំនេះផងដែរ នឹងមានការអញ្ជើញក្លិប ក្រសួងមហាផ្ទៃ វិសាខា បញ្ជាការដ្ឋានអង្គរក្ស និងរដ្ឋាបាលរាជធានីភ្នំពេញ ដែលជាក្រុម Top4។
លោក មានការជឿជាក់ថា សម្រាប់អត្តពលិកជានារី នឹងមានការចូលរួមទាំងអស់គ្នា ព្រោះថាមួយរយ:ចុងក្រោយនេះបេក្ខនារីដែលជាអត្តពលិក ស្រលាញ់វិស័យបាល់ទះកាន់តែច្រើនជាងបុរសទៀត ដែលធ្វើអោយសហព័ន្ធ ចិញ្ជឹមចិត្តបង្កើតវាអោយបាន។
គួរបញ្ជាក់ថា ក្រោយចប់កីឡាជាតិលើកទី៤ សហព័ន្ធ កំពុងសម្លឹងមើលអត្តពលិកនារី ព្រោះថាសហព័ន្ធកំពុងចិញ្ចឹមចិត្តបង្កើតវិញ្ញាសាបាល់ទះនារី ជាចំណុះអោយថ្នាក់ជាតិ សម្រាប់សហព័ន្ធធ្វើការគ្រប់គ្រង។ ខណ:សម្រាប់ប្រភេទកីឡាបាល់ទះផ្នែកនារី កីឡាជាតិលើកទី៤ ម្ចាស់មេដាយមាសបានទៅលើ ក្រុមនារីខេត្តពោធិ៍សាត់ និងផ្នែកបុរស បានទៅលើខេត្តព្រៃវែង៕
