វគ្គជម្រុះតាមពូលពានរង្វាន់សម្តេចតេជោ ហ៊ុន សែន (17th Hun Sen Cup) ឆ្នាំ២០២៤-២៥ នេះនឹងរកឃើញក្រុមតំណាងឱ្យពូលខ ចូលរួមប្រកួតនៅវគ្គ៨ក្រុមចុងក្រោយជើងឯកថ្នាក់ខេត្ត នៅរសៀលនេះ ខណៈពូលផ្សេងទៀតបានរកឃើញអស់ហើយ។
សម្រាប់ពូលខ នេះមានក្រុមសមាគមបាល់ទាត់ខេត្តព្រះសីហនុ, សមាគមបាល់ទាត់ខេត្តកែប និងតាកែវអែហ្វស៊ី ប៉ុន្តែសម្រាប់ក្រុមព្រះសីហនុ បានអស់កម្មវិធីត្រូវប្រកួតហើយ ដោយនៅសល់ក្រុមខេត្តកែប ត្រូវបើកទ្វាកីឡដ្ឋានខេត្តរបស់ខ្លួនទទួលក្រុមខេត្តតាកែវ នៅវេលាម៉ោង ៣:៣០នាទីរសៀល ថ្ងៃទី១២ ខែវិច្ឆិកា ឆ្នាំ២០២៤ នេះ។
លទ្ធផលនៃការប្រកួតនៅថ្ងៃនេះ នឹងបញ្ជាក់ឱ្យឃើញថាតើខេត្តកែប ឬ ខេត្តព្រះសីហនុ នឹងតំណាងឱ្យពូល ខ ឡើងទៅវគ្គ៨ក្រុមចុងក្រោយ។ ដំណាលគ្នានេះដែរគណៈកម្មការនឹងអាចកំណត់យកក្រុមចំណាត់ថ្នាក់លេខ២ល្អ ក្នុងចំណោមពូលទាំង៧បានដែរ។
អត្ថបទពាក់ព័ន្ធ៖ ខេត្ត ៤ គ្មានក្រុមតំណាងប្រកួតពាន Hun Sen Cup ថ្នាក់ខេត្ត លើកទី១៨ ឆ្នាំ២០២៤/២៥ ឡើយ
ដូច្នេះក្រុមដែលកក់កៅអីឡើងទៅជុំបន្តតាមពូលនីមួយៗ មាន៖
ពូល ក៖ មន្ទីរអប់រំយុវជននិងកីឡាខេត្តកំពង់ស្ពឺ
ពូល ខ៖ មិនទាន់ចប់ការប្រកួត
ពូល គ៖ សមាគមបាល់ទាត់ខេត្តស្វាយរៀង
ពូល ឃ៖ ក្លិបបាល់ទាត់ឈើតុំ ខេត្តពោធិ៍សាត់
ពូល ង៖ ក្លិបបាល់ទាត់ឡាយអ៊ិនឃីង ខេត្តសៀមរាប
ពូល ច៖ សមាគមកីឡាបាល់ទាត់ខេត្តកំពង់ធំ
ពូល ឆ៖ មន្ទីរអប់រំយុវជននិងកីឡាខេត្តត្បូងឃ្មុំ
ក្រុមចំណាត់ថ្នាក់លេខ២ល្អជាងគេ៖ មិនទាន់កំណត់បាន
ក្នុងចំណោមពូលទាំងអស់នៅសល់តែពូល ខ មួយទេ ដែលនៅសល់ប្រកួតក្នុងដៃ ក្រៅពីនោះ បានបញ្ចប់ការប្រកួតតាមពូលអស់ហើយ ខណៈគូចុងក្រោយប្រចាំពូល ខ នោះក្រុមសមាគមបាល់ទាត់ខេត្តកែប ត្រូវជួបក្រុមតាកែវអែហ្វស៊ី នៅថ្ងៃទី១២ ខែវិច្ឆិកា ខាងមុខ វេលាម៉ោង៣:៣០នាទីរសៀល លើទីលានកីឡដ្ឋានខេត្តកែប។
សម្រាប់ពានរង្វាន់សម្តេចតេជោ ហ៊ុន សែន ឆ្នាំ២០២៤-២៥ នេះបន្តបែងចែកជា២កម្រិត ដូចឆ្នាំកន្លងទៅដែរ ដោយក្នុងនោះ ទី១) វគ្គប្រកួតជើងឯកថ្នាក់ខេត្ត និងទី២) វគ្គប្រកួតជើងឯកថ្នាក់ជាតិ។ ក្រោយរកឃើញក្រុមជើងឯក និងកូតា ចេញពីការប្រកួតជើងឯកថ្នាក់ខេត្តរួច គណៈកម្មការប្រកួតនឹងដំណើរការប្រកួតវគ្គជើងឯកថ្នាក់ជាតិម្តង ដែលមានក្រុមសមាជិកលីគកំពូលកម្ពុជា កំពុងរង់ចាំ។
សូមបញ្ជាក់ថាពានរង្វាន់សម្តេចតេជោ ហ៊ុន សែន បង្កើតឡើងតាំងពីឆ្នាំ២០០៧ មកម៉្លេះ ហើយដល់ឆ្នាំ២០១៨ ទើបមានការបែងចែកជា២វគ្គ ស្របពេលដែលក្រុមធ្លាប់ឈ្នះជើងឯកថ្នាក់ខេត្ត កន្លងទៅមាន៖
ជើងឯកថ្នាក់ខេត្ត៖
២០១៨៖ គីរីវង់សុខសែនជ័យ ១-២ សាលាបាល់ទាត់ជាតិបាទី
២០១៩៖ សៀមរាប ០-១ ត្បូងឃ្មុំ
២០២០៖ ព្រៃវែង ១-០ ត្បូងឃ្មុំ
២០២១៖ ត្បូងឃ្មុំ ០-៣ កោះកុង
២០២២៖ ឧត្តរមានជ័យ ០-១ ភ្នំពេញហ្គាឡាក់ស៊ី
២០២៣៖ កំពង់ចាម ២-០ ត្បូងឃ្មុំ
