ការប្រកួតក្រោមដំណក់ទឹកភ្លៀងពេញ ៩០នាទី ក្រុមជម្រើសជាតិកម្ពុជា អាយុក្រោម២៣ឆ្នាំ បានត្រឹមស្មើគ្នាជាមយយ ក្រុមជម្រើសជាតិអូម៉ង់ អាយុក្រោម២៣ឆ្នាំ ក្នុងលទ្ធផល ០-០ នៃការប្រកួតពានរង្វាន់ AFC U23 Asian Cup Saudi Arabia 2026 វគ្គជម្រុះក្នុងពូល G ក្នុងពហុកីឡដ្ឋានជាតិ។
ដោយឡែកសម្រាប់ការប្រកួតរវាង ក្រុមជម្រើសជាតិអ៊ីរ៉ាក់ អាយុក្រោម ២៣ឆ្នាំ បានយកឈ្នះក្រុមជម្រើសជាតិប៉ាគីស្ថាន អាយុក្រោម ២៣ឆ្នាំ ដោយលទ្ធផលយ៉ាងចាស់ដៃ ៨ទល់និង១ ក្នុងពហុកីឡដ្ឋានជាតិ ដូចគ្នាមុនការប្រកួតរវានក្រុមជម្រើសជាតិកម្ពុជា អាយុក្រោម២៣ឆ្នាំ ជាមួយអូម៉ង់ មកដល់។
កម្ពុជា បានទទួលសិទ្ធធ្វើជាម្ចាស់ផ្ទះ ក្នុងការប្រកួតវគ្គជម្រុះ នៃពានរង្វាន់ជើងឯកយុវជនអាយុក្រោម ២៣ឆ្នាំ ប្រចាំទ្វីបអាស៊ីវគ្គជម្រុះ AFC U23 Asian Cup Saudi Arabia 2026 ដោយស្ថិតនៅពូល G ជាមួយក្រុម U23 អ៊ីរ៉ាក់, អូម៉ង់ និងប៉ាគីស្ថាន។ នឹងចាប់ផ្តើមពីថ្ងៃទី១ ដល់ទី៩ ខែកញ្ញា ឆ្នាំ២០២៥។
ការប្រកួតវគ្គជម្រុះនេះ នឹងប្រមូលផ្តុំទៅដោយក្រុមជម្រើសជាតិអាយុក្រោម ២៣ឆ្នាំ ចំនួន ៤៤ក្រុម ដោយចែកចេញជា ១១ពូល។ ក្រុមដែលមានចំណាត់ថ្នាក់ លេខ១ ក្នុងពូលនីមួយៗ និងក្រុមក្រុមលេខ២ ល្អចំនួន៤ក្រុម នឹងឡើងទៅប្រកួតជុំផ្ដាច់ព្រ័ត្រ ធ្វើឡើងនៅប្រទេសអារ៉ាប៊ីសាអូឌីត នាឆ្នាំ២០២៦ខាងមុខ។
គួរបញ្ជាក់ថា ការប្រកួតពានរង្វាន់ជើងឯកយុវជនអាយុក្រោម ២៣ឆ្នាំ ប្រចាំទ្វីបអាស៊ី AFC U-23 Asian Cup បង្កើតឡើងដំបូងនៅឆ្នាំ២០១៣ ដោយជប៉ុន ជាក្រុមឈ្នះជើងឯកច្រើនជាងគេ ចំនួន ២លើក (២០១៦,២០២៤) ខណ: អ៊ូសបេគីស្ថាន ១លើក ២០១៨ អារ៉ាប៊ីសាអូឌីត ១លើក ២០២២ កូរ៉េខាងត្បូង ១លើក ២០២០ និងអ៊ីរ៉ាក់ ១លើក ២០១៣៕
