ក្រុមបាល់ទះជម្រើសជាតិអ៉ីរ៉ង់ ជាក្រុមនៅអាស៊ី តែមួយគត់ ដែលឈានជើងឡើងដល់វគ្គ ១៦ក្រុមចុងក្រោយ ក្នុងព្រឹត្តិការណ៍ពានរង្វាន់បាល់ទះកម្រិតពិភពលោក FIVB Men’s Volleyball World Championship 2025។
សម្រាប់ក្រុមពីតំបន់អាស៊ីដែលចូលរួមប្រកួតពានរង្វាន់បាល់ទះកម្រិតពិភពលោក ឆ្នាំ២០២៥នេះ រួមមាន៖ ម្ចាស់ផ្ទះហ្វីលីពីន, ជប៉ុន, ចិន កូរ៉េខាងត្បូង សុទ្ធតែធ្លាក់ត្រឹមវគ្គជម្រុះក្នុងពូល ហើយមានតែអ៉ីរ៉ង់ មួយប៉ុណ្ណេះដែលឡើងវគ្គបន្ត។
ក្រុមដែលបានធ្វើដំណើរមកកាន់វគ្គ១៦ក្រុមចុងក្រោយ របស់ក្រុមបាល់ទះជម្រើសជាតិអ៉ីរ៉ង់ បន្ទាប់ឆ្លងកាត់ការប្រកួតយ៉ាងតាន់តឹង ពូល A ជាមួយក្រុមខ្លាំងអេហ្ស៊ីប និងទុយណេស៊ី និងក្រុមម្ចាស់ផ្ទះហ្វីលីពីន។
ដោយឆ្លងកាត់ ៣ប្រកួត ក្នុងពូល A រួមមាន៖
- ប្រកួតទី១៖ ចាញ់អេហ្ស៊ីប ៣-១ (២៥–១៧, ១៦–២៥, ២៥–២៥, ២៥–២០)
- ប្រកួតទី២៖ ឈ្នះទុយណេស៊ី ៣-១ (២៣–២៥, ២៥–២០, ២៥–២៣, ២៥–១៦)
- ប្រួតទី៣៖ ឈ្នះហ្វីលីពីន ៣-២ (២១–២៥, ២៥–២១, ១៧–២៥, ២៥–២៣, ២២–២០)
ក្រុមកក់កៅអីវគ្គ១៦ក្រុមចុងក្រោយរួមមានដូចជា៖ ទុយណេស៊ី, ឆែក, ស៊ែប៊ី, អ៉ីរ៉ង, ប៉ូឡូញ, កាណាដា, តួកគី, ហូឡង់, សហរដ្ឋអាមេរិក, ស្លូវើនី, ប៊ុលហ្គារី, ព័រទុយហ្គាល់, អាហ្សង់ទីន, អ៊ីតាលី, បែលហ្សិក និងហ្វាំងឡង់។
ដូចនេះសម្រាប់កម្មវិធីប្រកួតវគ្គ ១៦ក្រុមចុងក្រោយ នឹងត្រូវធ្វើឡើងចាប់ថ្ងៃទី២០ ដល់ ២៣ ខែកញ្ញា វគ្គ ៨ក្រុម ប្រកួតថ្ងៃទី២៤-២៥ ខែកញ្ញា វគ្គពាក់កណ្ដាលផ្ដាច់ព្រ័ត្រ ប្រកួតថ្ងៃទី២៧ ខែកញ្ញា វគ្គចំណាត់ថ្នាក់លេខ៣ និងផ្ដាច់ព្រ័ត្រ ប្រកួតថ្ងៃទី២៨ ខែកញ្ញា ឆ្នាំ២០២៥។
ការប្រកួតពានរង្វាន់បាល់ទះជើងឯកពិភពលោក ឆ្នាំ២០២៥ ដែលហ្វីលីពីន ធ្វើជាម្ចាស់ផ្ទះ គឺជាការប្រកួតលើកទី២១ ដោយក្រុមជម្រើសជាតិបុរសនៃសមាជិកនៃសហព័ន្ធកីឡាបាល់ទះអន្តរជាតិ (FIVB) នៅទូទាំងពិភពលោក ចំនួន ៣២ក្រុម មកពី ៥តំបន់ ចែកចេញជា ៨ពូល។ ការប្រកួតធ្វើឡើង ចាប់ពីថ្ងៃទី១២ រហូតដល់ថ្ងៃទី២៨ ខែកញ្ញា ឆ្នាំ២០២៥ ដើម្បីរកឃើញម្ចាស់ជើងឯក។
សម្រាប់ការប្រកួតពានរង្វាន់បាល់ទះ ផ្នែកនាបុរស់កម្រិតពិភពលោក ឆ្នាំ២០២៥ គឺជាលើកដំបូង ដែលនឹងត្រូវបានរៀបចំឡើងនៅប្រទេសហ្វីលីពីន ដែលគ្រោងនឹងប្រព្រឹត្តិទៅចាប់ពីថ្ងៃទី១២ រហូតដល់ថ្ងៃទី២៨ ខែកញ្ញា ឆ្នាំ២០២៥ខាងមុខ។
គួរបញ្ជាក់ថា ព្រឹត្តិការណ៍ប្រកួតពានរង្វាន់បាល់ទះផ្នែកបុរស់ពិភពលោក 2025 FIVB Volleyball Men’s World Championship ត្រូវបានរៀបចំឡើងដំបូងនៅឆ្នាំ១៩៤៩ ធ្វើឡើងចំនួន ៤ឆ្នាំម្ដង ដោយសហភាពសូវៀត ធ្លាប់ឈ្នះជើងឯកចំនួន ៦លើក អ៊ីតាលី ៤លើក ប្រេស៊ីល និងប៉ូឡូញ ៣លើក ឆេកូស្លូវ៉ាគី ២លើក អាមេរិក និងអាល្លឺម៉ង់ខាងកើត ១លើក៕
