ភ្ញៀវទេសចរជាង ១២ម៉ឺននាក់ចូលលេងកម្សាន្តក្នុងខេត្តបាត់ដំបងនាឱកាសព្រះរាជពិធីបុណ្យអុំទូក បណ្តែតប្រទីប សំពះព្រះខែ អកអំបុក

អំឡុងពេល ៣ថ្ងៃក្នុងឱកាសព្រះរាជពិធីបុណ្យអុំទូក បណ្តែតប្រទីប សំពះព្រះខែ អកអំបុក ខេត្តបាត់ដំបងទទួលភ្ញៀវទេសចរណ៍ជាតិ អន្តរជាតិចូលលេងតាមតំបន់កម្សាន្តផ្សេងៗជាង ១២ម៉ឺននាក់។

យោងតាមការបង្ហាញរបស់លោក អ៊ុច អ៊ំភីនីសារា ប្រធានមន្ទីរទេសចរណ៍ខេត្តបាត់ដំបងបានឲ្យដឹងនៅថ្ងៃទី ៧ ខែវិច្ឆកា ឆ្នាំ ២០២៥នេះថា÷ អំឡុងថ្ងៃប្រារព្វព្រះរាជពិធីបុណ្យអុំទូក បណ្តែតប្រទីប សំពះព្រះខែ អកអំបុករយ:ពេល ៣ថ្ងៃ គិតចាប់ចាប់ពីថ្ងៃទី ៤ ដល់ថ្ងៃទី ៦ ខែវិច្ឆកា ឆ្នាំ ២០២៥ នេះខេត្តបាត់ដំបងបានស្រូបទាញភ្ញៀវទេសចរជាតិ និងអន្តរជាតិ ចូលមកលេងតាមតំបន់កម្សាន្តផ្សេងៗជាច្រើនមានចំនួន
១២៣,៩៥៥ នាក់ កើនឡើង ១២.១៩% ធៀបនឹងរយៈពេលដូចគ្នាកាលពីឆ្នាំ ២០២៤។

មន្ត្រីមន្ទីរទេសចរណ៍ខេត្តបាត់ដំបងខាងដើមបន្តថា÷ ក្នុងចំណោមទូរលេខរួមរបស់ភ្ញៀវទេសចរខាងលើនៅថ្ងៃទី ៤ ខែវិច្ឆិកា ឆ្នាំ២០២៥
-ភ្ញៀវទេសចរមានចំនួន ៣៣,៨៨៧ នាក់ ក្នុងនោះភ្ញៀវជាតិ ៣៣,៦៣៥ នាក់ ភ្ញៀវអន្តរជាតិចំនួន ២៥២ នាក់
នៅថ្ងៃទី៥ ខែវិច្ឆិកា ឆ្នាំ២០២៥ ភ្ញៀវទេសចរសរុបចំនួន ៤៩,៧៦៩ នាក់ ដោយភ្ញៀវជាតិមានចំនួន ៤៩,៤៥៤ នាក់ ភ្ញៀវអន្តរជាតិមានចំនួន ៣១៥ នាក់ និងនៅថ្ងៃទី ៣ ត្រូវនឹងថ្ងៃទី ៦ ខែវិច្ឆិកា ឆ្នាំ២០២៥ជាថ្ងៃចុងក្រោយភ្ញៀវទេសចរចំនួនសរុប ៤០,២៩៩ នាក់ ក្នុងនោះ ភ្ញៀវជាតិ ៣៩,៩៩១ នាក់ ភ្ញៀវអន្តរជាតិមានចំនួន ៣០៨ នាក់។

កត្តាដែលបណ្តាលឲ្យភ្ញៀវទេសចរមានចំនួនកើនឡើងនេះដោយសារផ្លូវថ្នល់ស្អាតល្អងាយស្រួលធ្វើដំណើរ និងក្នុងភូមិសាស្ត្រខេត្តបាត់ដំបង មានរមណីយដ្ឋានគោលដៅទេសចរណ៍ល្អៗ និងច្រើនរួមមាន: រមណីយដ្ឋានប្រាសាទបាណន់, រមណីយដ្ឋានភ្នំសំពៅ, ទស្សនាហ្វូងសត្វប្រចៀវល្អាងភ្នំំភ្នំពៅ, រមណីយដ្ឋានប្រាសាទឯកភ្នំ, អាងទឹកកំពីងពួយ, រមណីយដ្ឋានស្ទឹងថ្មដា រមណីយដ្ឋានទឹកធ្លាក់ ៥៣ ក្នុងស្រុកភ្នំព្រឹក, រមណីយដ្ឋាននគរជុំភ្នំព្រឹក, ភ្នំកំពូល, វត្តល្អាងកង្កែប, វត្តនាងរំសាយសក់, វត្តភ្នំជីហង្ស, រមណីយដ្ឋានវត្តភ្នំចំបាំង និងសហគមន៍អេកូទេសចរណ៍ទឹកធ្លាក់អូរជាំល្អាងភ្នំប្រាំពីរជាដើម៕

អត្ថបទ: ដំបងក្រញូង