តាមក្រសួងទេសចរណ៍បានដកស្រង់ការផ្សាយរបស់គេហទំព័រ cntraveler នាពេលថ្មីៗនេះឱ្យដឹងថា រាជធានីភ្នំពេញ ដែលជាបេះដូងនៃប្រទេសកម្ពុជាកំពុងស្ថិតនៅក្នុងលំដាប់ទី ១០ លើពិភពលោក ដែលមានមន្តស្នេហ៍ជាទីក្រុងមានភ្ញៀវទេសចរចូលចិត្តមកកម្សាន្តជាងគេ។
ប្រភពនេះបានបញ្ជាក់ថា ភ្ញៀវទេសចរភាគច្រើនឱ្យតម្លៃរាជធានីភ្នំពេញ ចំពោះសេវាកម្មអាចរកបានបន្ទប់សណ្ឋាគារ និងម្ហូបអាហារដែលមានតម្លៃសមរម្យ ដែលធ្វើឱ្យការចំណាយលើការធ្វើដំណើរកម្សាន្តកាន់តែតិចកាន់តែទាក់ទាញ ជាពិសេសសម្រាប់ភ្ញៀវទេសចរដែលមានថវិកាកម្រិតមធ្យម។
រាជធានីភ្នំពេញរក្សាបាននូវមន្តស្នេហ៍របស់ខ្លួនជាមួយនឹងសំណង់ស្ថាបត្យកម្មបុរាណបែបខ្មែរ និងសម័យអាណានិគមបារាំង ខណៈពេលដែលក៏មានការអភិវឌ្ឍទៅជាទីក្រុងដ៏រស់រវើក មានភាពទាន់សម័យ និងសំបូរការកម្សាន្តជីវិតនាពេលរាត្រីផងដែរ។
ទីតាំងទេសចរណ៍វប្បធម៌ និងប្រវត្តិសាស្ត្រដែលមានដូចជាព្រះបរមរាជវាំង អគារបែបអាណានិគមបារាំង ផ្ទះបុរាណខ្មែរ វត្តអារាមស្រស់ស្អាត វត្តភ្នំ ជាដើមនោះ បានទាក់ចិត្តអ្នកទេសចរកាន់តែខ្លាំងឡើង។ ក្រៅពីនោះ ពួកគេចង់ទីទស្សនានៅសារមន្ទីរជាតិ និង សារមន្ទីរប្រល័យពូជសាសន៍ទួលស្លែង និង វាលពិឃាដជើងឯក ដែលជាកន្លែងអនុស្សាវរយ៍នៃការចងចាំដ៏សំខាន់របស់ប្រជាជនខ្មែរ៕
