សហភាពសហព័ន្ធយុវជនកម្ពុជា ត្រៀមរៀបចំ «ព្រឹត្តិការណ៍សាទរកម្ពុជាលើកទី២ » នៅថ្ងៃទី៣១ ខែធ្នូ ឆ្នាំ២០២៥ នៅវិមានឯករាជ្យ ដោយមានការបង្ហាញក្បួនដង្ហែសិល្បៈចម្រុះជាច្រើនប្រកបដោយភាពច្នៃប្រឌិតរបស់យុវជនកម្ពុជា។
លើកដំបូងកន្លងទៅ ព្រឹត្តិការណ៍សាទរកម្ពុជា គឺជាព្រឹត្តិការណ៍នៃការសាទរដល់សង្គមមួយដែលប្រកបដោយភាពរស់រវើក ជាមួយនឹងការបង្ហាញវិសេសភាព នៃអត្តសញ្ញាណ ដោយមានចិត្តសោមនស្សចំពោះអ្វីៗដែលបានឆ្លងកាត់ បានជម្នះ និងការលើកតម្កើងមោទនភាពក្នុងភាពជាប្រជាជាតិតែមួយ។
ព្រឹត្តិការណ៍ឆ្លងឆ្នាំដ៏ធំនៅកម្ពុជាមួយនេះធ្លាប់បានបង្ហាញកម្មវិធីដ៏គួឲ្យរំភើបជាច្រើនដូចជា ក្បួនដង្ហែដែលមានអ្នកចូលរួមប្រមាណ ៣០០០នាក់ ការរចនាតុបតែងដ៏ស្រស់ស្អាតជាច្រើនដែលផ្សារភ្ជាប់គំនិតច្នៃប្រឌិតបុរាណ និងសហសម័យ ល្បែងកំសាន្តទស្សវត្សរ៍ទី៨០ ស្តង់ម្ហូបអាហារ ២៥រាជធានីខេត្ត និងការប្រគុំតន្រ្តី សម្ដែងសិល្បៈចម្រុះដែលមានសិល្បៈករល្បីៗជាច្រើនរូប ក៏ដូចជាការរាប់ថយក្រោយឆ្លងឆ្នាំសកលជាមួយការបាញ់កាំជ្រួចផងដែរ។
សម្រាប់ឆ្នាំនេះ ព្រឹត្តិការណ៍សាទរកម្ពុជាលើកទី ២ ក៏នឹងមានក្បួនដង្ហែជាច្រើនដូចជា ១. ក្បួនពោងបង្ហោះទាំង៣ ២. ក្បួនគោមតុក្កតាយក្ស និង៣. ក្បួនយាន (អមដំណើរយានរបស់គ្រឹះស្ថានឧត្តមសិក្សា) ជាដើម៕
