នៅថ្ងៃទី២៨ ខែវិច្ឆិកា ឆ្នាំ២០២៥ កន្លងទៅ ខេត្តកោះកុង បានរៀបចំព្រឹត្តិការណ៍ “តារាសាគរ សាទរទេសចរណ៍សមុទ្រ” ដែលបានសហការរៀបចំឡើងដោយក្រសួងទេសចរណ៍ និងក្រុមហ៊ុន ខូសថល ស៊ីធី ឌីវេឡុបម៉ិន គ្រុប (Coastal City Development Group Co., Ltd) នៅក្នុងតំបន់វិស្សមកាលតារាសាគរ ស្ថិតនៅតំបន់តារាសាគរ ខេត្តកោះកុង។
ក្នុងពិធីបើកជាផ្លូវការនៃព្រឹត្តិការណ៍ “តារាសាគរ សាទរទេសចរណ៍សមុទ្រ” មានការអញ្ជើញចូលរួមពីសំណាក់ ឯកឧត្តម វ៉ាហេង ដាវុធ រដ្ឋលេខាធិកា ក្រសួងទេសចរណ៍, លោក អន សុធារិទ្ធិ អភិបាលរង នៃគណះអភិបាលខេត្តកោះកុង , លោក លី ម៉េង ឈិន ប្រធានក្រុមប្រឹក្សាភិបាល នៃក្រុមហ៊ុនលោក លី ម៉េង ឈិន ប្រធានក្រុមប្រឹក្សាភិបាល នៃក្រុមហ៊ុន ខូសថល ស៊ីធី ឌីវេឡុបម៊ិនគ្រុប (Coastal Ciry Development Group) ។
គោលបំណងនៃការរៀបចំព្រឹត្តិការណ៍នៅតាមតំបន់ឆ្នេរ គឺរួមគ្នាអភិរក្សការពារធនធានធម្មជាតិសមុទ្រ និងថែរក្សាបរិស្ថានឆ្នេរឲ្យបានស្អាត ដើម្បីបម្រើដល់ការអភិវឌ្ឍន៍ទេសចរណ៍ប្រកបដោយចិរភាពនិងការទទួលខុសត្រូវ។ លើកតម្កើងការផ្សព្វផ្សាយគោលដៅទេសចរណ៍តំបន់ឆ្នេរកម្ពុជាឲ្យកាន់តែទូលំទូលាយទាក់ទាញទេសចរជាតិ និងអន្តរជាតិ មកទស្សនាកាន់តែច្រើន។
សូមជម្រាបថា នេះជាលើកទី២ហើយ ដែលក្រុមហ៊ុនខូសថល ស៊ីធី ឌីវេឡុបម៉ិន គ្រុប សហការជាមួយក្រសួងទេចរណ៍ បានចូលរួម និងរៀបចំពិធីបុណ្យឆ្នេរ (Beach Festival) នៃព្រឹត្តិការណ៍ “តារាសាគរ សាទរទេសចរណ៍សមុទ្រ” ដ៏សំខាន់មួយនេះ ។
សូមបន្ថែមថា ខេត្តកោះកុង មានទីតាំងស្ថិតនៅភាគនិរតី នៃប្រទេសកម្ពុជា មានចម្ងាយ ២៩០គីឡូម៉ែត្រ ពីរាជធានីភ្នំពេញ ខាងកើតជាប់នឹងខេត្តកំពង់ស្ពឺនិងខេត្តព្រះសីហនុ ខាងលិចនិងខាងត្បូងជាប់នឹងឈូងសមុទ្រថៃ និងប្រទេសថៃ ខាងជើងជាប់នឹងខេត្តពោធិ៍សាត់៕
