ក្រុមបាល់ទាត់ជម្រើសជាតិព័រទុយហ្គាល់ អាយុក្រោម ១៧ឆ្នាំ បានក្លាយជាម្ចាស់ជើងឯកលើកដំបូង នៃពានរង្វាន់ FIFA U-17 World Cup ឆ្នាំ២០២៥ បន្ទាប់ពីយកឈ្នះក្រុមយុវជនអាយុក្រោម ១៧ឆ្នាំអូទ្រីស ក្នុងលទ្ធផល ១-០ នៅវគ្គផ្ដាច់ព្រ័ត្រ នារាត្រីថ្ងៃទី២៧ វិច្ឆិកា ២០២៥ នៅទឹកដីប្រទេសកាតា។
សម្រាប់ចំណាត់ថ្នាក់លេខ៣ បានទៅលើក្រុមបាល់ទាត់ជម្រើសជាតិអ៊ីតាលី អាយុក្រោម ១៧ឆ្នាំ បានយកឈ្នះប្រេស៊ីល ដោយបាល់កាត់សេចក្ដី ១១ម៉ែត្រ ក្នុងលទ្ធផល ៤-២ បន្ទាប់ពីស្មើគ្នា ០-០ ពេញ៩០នាទី។
ព្រឹត្តិការណ៍ប្រកួត ពានរង្វាន់ FIFA U-17 World Cup ឆ្នាំ២០២៥ មាន ៤៨ប្រទេស ជ្រើសចេញពី ៦តំបន ជុំវិញពិភពលោក ដើម្បីរកក្រុមខ្លាំង ៣២ក្រុម ឡើងទៅកាន់វគ្គ Knockout stage ខណ:ការប្រកួតនឹងចាប់ពីថ្ងៃទី៣ រហូតដល់ ថ្ងៃទី២៧ ខែវិច្ឆិកា ឆ្នាំ២០២៥ ទើរកឃើញម្ចាស់ជើងឯក នៅទឹកដីប្រទេសកាតា។
គួរបញ្ជាក់ថា ពានរង្វាន់ FIFA U-17 World Cup បង្កើតឡើងដំបូងនៅឆ្នាំ១៩៨៥ ដោយក្រុមជម្រើសជាតិនីហ្សេរីយ៉ា អាយុក្រោម ១៧ឆ្នាំ ឈ្នះជើងច្រើនជាងគេ ៥លើក (១៩៨៥, ១៩៩៣, ២០០៧, ២០១៣, ២០១៥) ប្រេស៊ីល ៤លើក (១៩៩៧, ១៩៩៩, ២០០៣, ២០១៩) ហ្គាណា ២លើក (១៩៩១, ១៩៩៥) មុិកសុិក ២លើក (២០០៥, ២០១១) និងអាល្លឺម៉ង់ បារាំង សហភាពសូវៀត អារ៉ាប៊ីសាអូឌីត ស្វីស និងអង់គ្លេស បាន១លើកដូចគ្នា៕
