បន្ទាយមានជ័យ ៖ ក្មេងប្រុសស្រី៣នាក់បងប្អូនជីដូនមួយនឹងគ្នា ទៅលេងតាមមាត់ប្រឡាយទឹកស្រែប្រាំង ធ្លាក់លង់ស្លាប់ទាំង៣នាក់ បង្កឱ្យភ្ញាក់ផ្អើលកាលពីវេលាម៉ោង១១ព្រឹក ថ្ងៃទី២៨ ខែវិច្ឆិកា ឆ្នាំ២០២៥
នៅក្នុងភូមិអន្លង់ថ្ងាន់លិច ឃុំបត់ត្រង់ ស្រុកមង្គលបូរី ខេត្តបន្ទាយមានជ័យ ។
ក្មេងរងគ្រោះទាំង៣នាក់បងប្អូន ៖ ទី១ ឈ្មោះ នឿម ឋានៈវ៉ាត់ ភេទប្រុស អាយុ២ឆ្នាំ រស់នៅភូមិបត់ត្រង់ ឃុំបត់ត្រង់ ស្រុកមង្គលបូរី ។ ទី២ ឈ្មោះ ឆាយ សុជាតា ភេទស្រី អាយុ៥ឆ្នាំ រស់នៅភូមិអន្លង់ថ្ងាន់លិច ឃុំបត់ត្រង់ ស្រុកមង្គលបូរី ។ ទី៣ ឈ្មោះ រ៉េន សុផា ភេទប្រុស អាយុ៣ឆ្នាំ រស់នៅភូមិអន្លង់ថ្ងាន់លិច ឃុំបត់ត្រង់ ស្រុកមង្គលបូរី ។
តាមសមត្ថកិច្ចបានឱ្យដឹងថា បន្ទាប់ពីឪពុកម្តាយ បាត់កូនៗមិនឃើញ ដើរតាមស្វែងរក ស្រាប់តែឃើញស្បែកជើងនៅមាត់ប្រឡាយស្រែប្រាំង លុះដល់ចុះរាវ ប្រទះឃើញសពកូនប្រុសស្រី បង្កឱ្យឆោឡោ ។
ក្រោយពីកើតមានករណីខាងលើ សមត្ថកិច្ចចុះទៅពិនិត្យ កោសល្យវិច័យ ឃើញថាក្មេងរងគ្រោះ លង់ទឹកស្លាប់ រួចប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណី ។ ហើយក៏មានវត្តមាន លោក រ័ត្ន ដាសុីណង់ អភិបាលស្រុកមង្គលបូរី លោក ឆុំ ឆាន់ អភិបាលរងស្រុក លោក សូ សាវលិញ ប្រធានការិយាល័យផែនការ និងគាំទ្រឃុំ និងនគរបាលប៉ុស្តិ៍បត់ត្រង់ ចូលរួមរំលែកទុក្ខជាមួយក្រុមគ្រួសារសពក្មេងទាំង៣នាក់ ចូលជាបច្ច័យ ក្តាមឈូស សម្រាប់ធ្វើបុណ្យ ផងដែរ ៕