សម្តេចធិបតី បញ្ជាក់ប្រាប់ UN ពីការដោះស្រាយបញ្ហាព្រំដែនកម្ពុជា-ថៃ តាមរយៈច្បាប់អន្តរជាតិនិងកិច្ចព្រមព្រៀងទ្វេភាគីដែលមានស្រាប់

ភ្នំពេញ៖ នាព្រឹកថ្ងៃទី២ ខែមីនា ឆ្នាំ២០២៦ នៅវិមានសន្តិភាព សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ លោកជំទាវ Vladanka Andreeva អ្នកសម្របសម្រួលអង្គការសហប្រជាជាតិ (UN) ប្រចាំកម្ពុជា ចូលជួបសម្តែងការគួរសម និងពិភាក្សាការងារ ក្នុងឱកាសដែលលោកជំទាវវិលត្រឡប់មកបំពេញបេសកកម្មនៅកម្ពុជាជាលើកទី២។

ក្នុងជំនួបនេះ លោកជំទាវ Vladanka Andreeva បានសម្ដែងនូវការកោតសរសើរយ៉ាងខ្លាំងចំពោះកម្ពុជា ដែលបានចូលរួមយ៉ាងសកម្មក្នុងបេសកកម្មរក្សាសន្តិភាពពិភពលោករបស់ UN អស់រយៈពេល ២០ឆ្នាំមកនេះ។ លោកជំទាវបានបញ្ជាក់ថា ការបន្តបញ្ជូនកងទ័ពមួកខៀវកម្ពុជាទៅកាន់តំបន់ជម្លោះនានា គឺជាសក្ខីភាពនៃស្មារតីទទួលខុសត្រូវខ្ពស់របស់កម្ពុជាក្នុងឆាកអន្តរជាតិ។

លោកជំទាវអ្នកសម្របសម្រួល បានអះអាងពីជំហរយ៉ាងមុតមាំថា គ្រប់ទីភ្នាក់ងាររបស់ UN នឹងបន្តសហការយ៉ាងជិតស្និទ្ធជាមួយរាជរដ្ឋាភិបាលកម្ពុជា ដើម្បីគាំទ្រដល់៖

• យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល។
• ការកសាងមូលធនមនុស្ស និងការបង្កើនជំនាញបន្ថែម (Upskilling)។
• ការបង្កើតការងារ និងការជំរុញកំណើនសេដ្ឋកិច្ចប្រកបដោយបរិយាបន្ន។

សម្តេចធិបតី ហ៊ុន ម៉ាណែត បានថ្លែងអំណរគុណចំពោះ UN ដែលតែងតែនៅក្បែរកម្ពុជាក្នុងគ្រប់ដំណាក់កាលនៃការអភិវឌ្ឍ។ សម្តេចបានសង្កត់ធ្ងន់លើសារៈសំខាន់នៃភាពជាដៃគូនេះ ក្នុងការជួយកម្ពុជាត្រៀមខ្លួនចាកចេញពីចំណាត់ក្រុមប្រទេសដែលមានការអភិវឌ្ឍតិចតួច (LDC) នៅឆ្នាំ២០២៩ ខាងមុខ។ សម្តេចក៏បានរំលឹកពីជំនួបផ្លែផ្កាជាមួយថ្នាក់ដឹកនាំជាន់ខ្ពស់នៃ UN ក្នុងអំឡុងពេលបំពេញបេសកកម្មនៅអឺរ៉ុបនាពេលកន្លងទៅ ដែលសបញ្ជាក់ពីទំនាក់ទំនងដ៏ស្អិតរមួតរវាងកម្ពុជា និងពិភពលោក។

ពាក់ព័ន្ធនឹងស្ថានភាពព្រំដែនកម្ពុជា-ថៃ សម្តេចធិបតីបានជម្រាបជូនអំពីការវិវត្តថ្មីៗ និងបានបញ្ជាក់ជាថ្មីនូវជំហរដាច់ខាតរបស់កម្ពុជា គឺ “ការដោះស្រាយបញ្ហាដោយសន្តិវិធី” ដោយផ្អែកលើច្បាប់អន្តរជាតិ និងកិច្ចព្រមព្រៀងទ្វេភាគីដែលមានស្រាប់។ ជាការឆ្លើយតប លោកជំទាវ Vladanka Andreeva បានបង្ហាញការគាំទ្រចំពោះវិធីសាស្ត្រនេះ ដែលស្របតាមធម្មនុញ្ញអង្គការសហប្រជាជាតិ ដើម្បីរក្សាស្ថិរភាព និងភាពសុខដុមរមនាក្នុងតំបន់៕

អត្ថបទ៖ត្រយង