ថ្មីៗនេះ អ្នកប្រើប្រាស់បណ្ដាញសង្គមនៅប្រទេសថៃដែលមិនពេញចិត្តរដ្ឋាភិបាលបន្លំសន្លឹកឆ្នោត បានបោះសម្ដីឱ្យលោក អនុទីន ឆានវីរៈកុល ថាសមនឹងទទួលបានឈ្មោះជា នាយករដ្ឋមន្ត្រីផ្កាយដុះកន្ទុយ ដោយពួកគេបានវែកញែកគ្នាជាហូរហែពីព្រឹត្តិការណ៍គ្រោះមហន្តរាយមួយចំនួនធំដែលបានកើតមាននៅប្រទេសថៃ ក្រោមកណ្ដាប់ដៃដឹកនាំក្រសួង និងការដឹកនាំរដ្ឋាភិបាលរបស់បុរសដែលមានដើមកំណើតចិនមកពីខេត្តក្វាងទុងរូបនេះ។
ពួកគេសួរថា តើវាជាការចៃដន្យ ឬជាព្រហ្មលិខិត តាំងពីលោក អនុទិន កាន់តំណែងសំខាន់ៗក្នុងជួររដ្ឋាភិបាលថៃ រាប់ចាប់ពីជារដ្ឋមន្ត្រីក្រសួងសុខាភិបាល រដ្ឋមន្ត្រីក្រសួងមហាផ្ទៃ រហូតដល់តំណែងជានាយករដ្ឋមន្ត្រី ប្រទេសថៃហាក់ជួបប្រទះតែគ្រោះមហន្តរាយធំៗ ដែលមិនធ្លាប់មានពីមុនមក?
ត្បិតថា ឈ្មោះរបស់លោក អនុទិន ឆានវីរៈកុល បានក្លាយជារូបភាពដ៏លេចធ្លោមួយនៅលើឆាកនយោបាយប្រទេសថៃគឺជានាយករដ្ឋមន្ត្រីស្នេហាជាតិ ស្រលាញ់ជាតិ ដោយសារតែលោកបានឱនក្បាលឱ្យក្រុមកងយោធាថៃ ធ្វើអ្វីស្រេចតែអំពើចិត្ត ជាពិសេសគឺបើកភ្លើងខៀវឱ្យកងកម្លាំងប្រដាប់អាវុធមករុករានទន្ទ្រាន ឈ្លានពានទឹកដីកម្ពុជា។
ប៉ុន្តែអ្វីដែលគួរឱ្យចាប់អារម្មណ៍នោះ គឺរយៈពេលនៃការដឹកនាំរបស់លោក ហាក់ដូចជាមានជាប់ជំពាក់ជំពិនជានិច្ចជាមួយនឹងគ្រោះមហន្តរាយ និងវិបត្តិធំៗជាច្រើននៅក្នុងប្រទេសថៃ ដែលបង្កឱ្យខូចខាតទាំងទ្រព្យសម្បត្តិនិងឆក់យក់អាយុជីវិតមនុស្ស។
អ្នកប្រើប្រាស់បណ្ដាញសង្គមថៃបានកត់សម្គាល់ឃើញថា រាល់ពេលដែលនាយកណ្ដុររូបនេះឡើងកាន់តំណែងសំខាន់ៗ នោះគ្រោះមហន្តរាយធំៗក៏កើតឡើងដូចគ្នា វាហាក់ដូចជាការសាកល្បងសមត្ថភាពដឹកនាំរបស់លោកដូចគ្នា នេះគឺជាការគិតវិជ្ជមានសម្រាប់អ្នកដែលគាំទ្រ ខណៈអ្នកខ្លះទៀតមិនគាំទ្រ បានដាក់ងារឱ្យថា រដ្ឋមន្ត្រី និងនាយករដ្ឋមន្ត្រី ផ្កាយដុះកន្ទុយ ដែលនាំតែភាពស៊យ និងចង្រៃដល់ស្រុកទេ។
អ្នកប្រើប្រាស់បណ្ដាញសង្គមនៅថៃបានប្រមូលផ្ដុំ ៧ ហេតុការណ៍គ្រោះមហន្តរាយដែលកើតឡើងប្រទេសថៃ ហើយបានឆក់យកជីវិតមនុស្សជាច្រើននាក់ដូចខាងក្រោមនេះ៖
១. វិបត្តិជំងឺកូវីដ-១៩៖ លោក អនុទិន ក្នុងនាមជារដ្ឋមន្ត្រីសុខាភិបាល ហាក់ដូចជាអសមត្ថភាពដឹកនាំការប្រយុទ្ធប្រឆាំងនឹងជំងឺរាតត្បាតសកល ដែលជាវិបត្តិធ្ងន់ធ្ងរបំផុតមួយក្នុងប្រវត្តិសាស្ត្រប្រទេសថៃក្រោមរូបភាពអំពើពុករលួយ រហូតបណ្ដាលឱ្យមានប្រជាជនជាង ៣ ម៉ឺននាក់បានបាត់ជីវិតទាំងគ្មានវ៉ាក់សាំងជួយការពារ ដោយអំឡុងពេលនោះលោកទទួលរងនូវការរិះគន់យ៉ាងខ្លាំងក្លា ដែលធ្វើឱ្យប្រជាប្រិយភាព និងការនិយមគាំទ្រលោកធ្លាក់កប់ដល់បាត។
២. គ្រោះរញ្ជួយដី និងអគារសវនកម្មដួលរលំ៖ ហេតុការណ៍ដ៏សោកនាដកម្មមួយនេះដែលបានឆក់យកជីវិតមនុស្សដែលជាវិស្វករ និងជាកម្មករសំណង់ជាច្រើន ព្រោះតែភាពពុករលួយរបស់រដ្ឋាភិបាល និងក្រុមហ៊ុនម៉ៅការសាងសង់ ខណៈលោក អនុទីន ឆានវីរៈកុល កាន់តួនាទីជារដ្ឋមន្ត្រីក្រសួងមហាផ្ទៃឈរឱបដៃមើលបញ្ហានេះទាំងបិទភ្នែក បិទត្រចៀក មិនបានខ្នះខ្នែងដុតដៃដុតជើង ស៊ើបអង្កេតស្រាវជ្រាវលើបញ្ហានោះឡើយ។
៣. គ្រោះទឹកជំនន់នៅភាគខាងត្បូង៖ នៅឆ្នាំដែលលោក អុទីន កាន់តំណែងជានាយរដ្ឋមន្ត្រី ៤ ខែ ប្រទេសថៃកើតមានគ្រោះមហន្តរាយទឹកជំនន់និងបង្កការខូចខាតយ៉ាងធ្ងន់ធ្ងរជាពិសេសក្រុងហាតយ៉ៃ ខេត្ត សុងក្លា ដែលជាមជ្ឈមណ្ឌុលពាណិជ្ជកម្មដ៏ធំមួយ ទាក់ទាញភ្ញៀវទេសចរណ៍ និងចំណូលយ៉ាងមហាសាលចូលប្រទេស ដោយក្នុងហេតុការណ៍ដ៏អាក្រក់នោះបណ្ដាលឱ្យមនុស្សស្លាប់លើសពី ១០០ នាក់ទាំងគ្មានដំណោះស្រាយទាន់ពេលវេលា មិនថាជាស្បៀងអាហារ ទឹកស្អាត ជំនួយនិងការគាំទ្រផ្សេងៗ ពោលគឺរដ្ឋាភិបាលលោកធ្វើការយឺតយ៉ាវ ចំណែកសំណងសម្រាប់ជនរងគ្រោះក៏មិនបានអនុម័ត ឬមានការពន្លឿននីតិវិធីណាមួយដើម្បីជួយសម្រួលដល់ពលរដ្ឋដែលកាន់សាសនាឥស្លាមភាគច្រើននោះឡើយ។ វិបត្តិនេះក៏ធ្វើឱ្យប្រជាប្រិយរបស់លោក មានការធ្លាក់ចុះ និងក្លាយជាចំណុចខ្សោយដែលបក្សប្រឆាំងនិងអ្នកនយោបាយផ្សេងៗ លើកយកមកវាយប្រហារលោកនៅគ្រប់ពេលឃោសនារកសំឡេងគាំទ្រ ដោយពួកគេបានចោទសួរពីសមត្ថភាពគ្រប់គ្រងនិងដោះស្រាយ គ្រោះមហន្តរាយ ដែលនាយករដ្ឋមន្ត្រីរូបនេះ បានបរាជ័យជាច្រើនលើក។
៤. ហេតុការណ៍បាក់ស្រុតដីនៅកណ្តាលទីក្រុងបាងកក៖ ការបាក់ដីនេះកើតឡើងនៅជិតការដ្ឋានសំណង់ស្ថានីយ៍រថភ្លើង MRT ថ្មី (Vajira Station) ដែលដីបានហូរចូលទៅក្នុងផ្លូវរូងក្រោមដី និងបានប្រើប្រាស់រយៈដល់ទៅរាប់ខែដើម្បីដោះស្រាយបញ្ហានេះ។ រឿងនេះក៏ធ្វើឱ្យមានការប្រៀបធៀបគ្នាមិនតិចដែរ ព្រោះកន្លងមកជប៉ុនក៏ធ្លាប់មានករណីបាក់ស្រុតផ្លូវកណ្ដាលក្រុងដូចគ្នា តែពួកគេប្រើពេលតែមួយយប់ប៉ុណ្ណោះអាចដោះស្រាយឱ្យចរាចរណ៍ឡើងវិញជាធម្មតាបាន តែថៃ វិញបែរជាមិនអាចធ្វើបាន។
៥. ហេតុការណ៍បាក់ស្ទូចដួលរលំផ្ទះរថភ្លើងនៅខេត្តនគរាជសីម៉ា៖ គ្រោះថ្នាក់មួយនេះកើតឡើងក្នុងអំឡុងពេលសាងសង់គម្រោងធំមួយ ដែលបណ្ដាលឱ្យមនុស្សជាង ៤០ នាក់រងរបួស ហើយ ២ នាក់បានស្លាប់បាត់បង់ជីវិត។ ករណីនេះ គឺមិនខុសអីការបាក់រលំអគារនោះឡើយ ព្រោះវាកើតចេញពីការម៉ៅការគម្រោងបែបបក្សពួក កិបកេង និងពុករលួយ ដែលបណ្ដោយឱ្យការជួសជុលគ្មានស្ដង់ដារ សន្សំសំចៃ ដើម្បីកេងចំណេញហួសហេតុ ទើបបង្កឱ្យកើតមានសោកនាដកម្មបែបនេះ។
៦. បាក់ដងស្ទូចរលំនៅផ្លូវរាមាទី២៖ គ្រោះថ្នាក់មួយទៀតដែលកើតឡើងបន្តគ្នារយៈពេលរំលងគ្នា ៥ ថ្ងៃ បានឆក់យកជីវិតកម្មករ ២ នាក់។ ត្រង់នេះយើងមិនចាំលើកមកនិយាយនោះឡើយ ព្រោះវាមិនខុសពីករណីទី៥ នោះទេ។
៧. បញ្ហាផលប៉ះពាល់ពីសង្គ្រាមអ៊ីរ៉ង់៖ វិបត្តិនេះបានជះឥទ្ធិពលដល់សេដ្ឋកិច្ច និងសន្តិសុខថាមពលរបស់ប្រទេសថៃ ខណៈដែលរដ្ឋាភិបាលដឹកនាំដោយលោក អនុទិន នៅរៀបចំកៅអីអង្គុយមិនទាន់រួចរាល់នៅឡើយ។ ខណៈដែលពិភពលោកកំពុងវឹកវរ រកតែខ្យល់ដកដង្ហើមមិនចង់ដល់គ្នា នាយករដ្ឋមន្ត្រីអនុទិន បែរជានៅគិតគូរពីប្រយោជន៍បក្សពួកនិងខ្លួនឯង នៅបន្តគិតគូរ លើការរៀបចំ គណៈរដ្ឋមន្ត្រី ចែកក្រសួង ចែកកៅអី និងចែកអំណាចគ្នាមិនទាន់ដាច់ស្រេចនៅឡើយ។
វិបត្តិទាំងនេះមិនត្រឹមតែជាកត្តាខាងក្រៅ ឬក៏ជាសាកល្បងសមត្ថភាពរបស់នាយ អនុទិន នោះទេ ប៉ុន្តែសម្រាប់ប្រជាជនថៃដែលមានជំនឿជឿលើរឿងអរូបីនាំគ្នាខ្សឹបខ្សៀវគ្នាថា នាយករដ្ឋមន្ត្រីដែលបានសំឡេងឆ្នោតខ្ពស់កើតចេញពីភាពពុករលួយ ទិញ កេងបន្លំ នៅអំឡុងពេលបោះឆ្នោតរូបនេះ ប្រាកដជាផ្កាយគ្រោះដែលនាំតែបញ្ហាដល់ប្រទេសជាតិ ព្រោះវាលើសពីភាពចៃដន្យទៅហើយសម្រាប់រូបលោក ដែលកាន់អំណាចនៅក្នុងគ្រាដែលថៃ ជួបគ្រោះមហន្តរាយ។
ខណៈអ្នកដែលជឿជាក់លើវិទ្យាសាស្ត្រវិញលើកឡើងថា ហេតុការណ៍ទាំងនោះគឺជាកញ្ចក់ដ៏ថ្លាដែលអាចជួយឆ្លុះបញ្ចាំងឱ្យឃើញពីភាពទន់ខ្សោយក្នុងការត្រួតពិនិត្យសុវត្ថិភាព ស្តង់ដារសាងសង់ ការគ្រប់គ្រងគ្រោះមហន្តរាយ និងការត្រៀមខ្លួនរបស់ជួររដ្ឋាភិបាល អនុទិន ព្រោះការបាត់បង់អាយុជីវិតមនុស្សរាប់ម៉ឺននាក់ មិនមែនគ្រាន់តែជាស្ថិតិនោះទេ ប៉ុន្តែវាគឺជាសោកនាដកម្មដ៏ឈឺចាប់ និងជាការបាត់បង់ដ៏ធំធេងរបស់ក្រុមគ្រួសារ និងសង្គមទាំងមូលផងដែរ។
ម្លោះហើយ រហ័សនាមដែលថា នាយករដ្ឋមន្ត្រីផ្កាយដុះកន្ទុយ ត្រូវបានអ្នកប្រើប្រាស់បណ្ដាញសង្គមថៃដាក់ឱ្យនេះ មិនត្រឹមតែមិនសម្ដៅដល់អ្នកដឹកនាំដែលតែងតែជួបប្រទះនឹងព្រឹត្តិការណ៍អកុសលគ្រប់ពេលវេលានោះទេ ប៉ុន្តែពួកគេប្រាកដជាចង់សម្ដៅដល់អ្នកដឹកនាំដែលបរាជ័យក្នុងការទប់ស្កាត់គ្រោះមហន្តរាយទាំងនោះ ព្រោះពួកគេបានមើលឃើញពីភាពអសមត្ថភាពរបស់រដ្ឋាភិបាល អនុទិន រួចជាស្រេចទៅហើយ៕
