(ភ្នំពេញ)៖ ក្នុងស្មារតីបន្តអភិវឌ្ឍវិស័យកសិកម្មឱ្យក្លាយជាសសរស្តម្ភសេដ្ឋកិច្ចដ៏រឹងមាំ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានដាក់ចេញនូវទិសដៅអាទិភាពចំនួន ៥ ចំណុច សម្រាប់ឆ្នាំ២០២៦ ក្នុងគោលបំណងបង្កើនប្រសិទ្ធភាពផលិតកម្ម ធានាស្ថិរភាពតម្លៃទីផ្សារ និងពង្រឹងការអភិរក្សធនធានធម្មជាតិប្រកបដោយចីរភាព។
ការប្រកាសនេះ បានធ្វើឡើងក្នុងពិធីបិទសន្និបាតបូកសរុបការងារឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងកសិកម្ម កាលពីរសៀលថ្ងៃទី១៩ ខែមីនា ឆ្នាំ២០២៦។
ថ្លែងក្នុងឱកាសនោះ លោករដ្ឋមន្ត្រីបានគូសបញ្ជាក់ពីសមិទ្ធផលធំៗដែលសម្រេចបានក្នុងឆ្នាំកន្លងទៅ ទោះបីជាមានប្រឈមនឹងបម្រែបម្រួលសេដ្ឋកិច្ចសកលក៏ដោយ៖
- កំណើនសេដ្ឋកិច្ច៖ វិស័យកសិកម្មបានរួមចំណែក ១៦,១% នៃ GDP ជាមួយនឹងតម្លៃបន្ថែមសរុបជាង ៨,៣ ពាន់លានដុល្លារ។
- ជោគជ័យនៃការនាំចេញ៖ សម្រេចបានទឹកប្រាក់ជិត ៦,៥ ពាន់លានដុល្លារ (កើនឡើង ៣២០ លានដុល្លារ) ដោយក្នុងនោះអនុវិស័យដំណាំនាំមុខគេរហូតដល់ ៥,៦ ពាន់លានដុល្លារ។
- មោទនភាពអង្ករកម្ពុជា៖ ផលិតផលស្រូវសម្រេចបានជាង ១៥ លានតោន ហើយអង្ករកម្ពុជាបានឈ្នះពានរង្វាន់ “អង្ករល្អបំផុតលើពិភពលោក” ជាលើកទី៧។
- របកគំហើញនៃការអភិរក្ស៖ ជាឆ្នាំប្រវត្តិសាស្ត្រដែល “គ្មានសត្វផ្សោតស្លាប់” សោះ ខណៈមានកូនកើតថ្មី ៨ ក្បាល ធ្វើឱ្យចំនួនសរុបកើនដល់ ១១៤ ក្បាល។
ទិសដៅអាទិភាព ៥ ចំណុច សម្រាប់ឆ្នាំ២០២៦
ដើម្បីបន្តវឌ្ឍនភាពនេះ លោករដ្ឋមន្ត្រីបានតម្រង់ទិសការងារសំខាន់ៗដូចខាងក្រោម៖
- រក្សាសន្តិសុខស្បៀង និងស្ថិរភាពថ្លៃ៖ តាមដាន និងអន្តរាគមន៍ទប់ស្កាត់ការធ្លាក់ថ្លៃកសិផល ដើម្បីការពារផលប្រយោជន៍កសិករ និងអ្នកប្រើប្រាស់។
- ពង្រីកសហគមន៍កសិកម្មទំនើប៖ បន្តរុញច្រានការចងក្រងកសិករឱ្យទៅជាសហគមន៍ទំនើប (បច្ចុប្បន្នមាន ៣១ សហគមន៍) និងពង្រឹងតួនាទីមន្ត្រីកសិកម្មឃុំទាំង ១,៦០០ នាក់។
- ពង្រឹងការអនុវត្តច្បាប់៖ បង្ក្រាបបទល្មើសជលផល និងព្រៃឈើឱ្យមានប្រសិទ្ធភាពខ្ពស់ ព្រមទាំងជំរុញការអនុម័តច្បាប់ស្តីពីព្រៃឈើថ្មី។
- គ្រប់គ្រងដីរដ្ឋប្រកបដោយតម្លាភាព៖ ពន្លឿនការចុះបញ្ជីដីព្រៃឈើ និងដីព្រៃលិចទឹក ជាដីសាធារណៈរបស់រដ្ឋ ដើម្បីការពារការរំលោភបំពាន។
- កិច្ចសម្រួលពាណិជ្ជកម្ម និងការនាំចេញ៖ បន្តបើកច្រកទីផ្សារថ្មីៗ និងសម្របសម្រួលការដឹកជញ្ជូនកសិផលឆ្លងកាត់ប្រទេសជិតខាង (ឡាវ) ទៅកាន់ទីផ្សារចិនឱ្យកាន់តែរលូន។
ជាទីបញ្ចប់ លោក ឌិត ទីណា បានផ្តល់ការជឿជាក់យ៉ាងមុតមាំថា តាមរយៈការអនុវត្តទិសដៅទាំង ៥ នេះ វិស័យកសិកម្មកម្ពុជានឹងមិនត្រឹមតែធានាបាននូវសន្តិសុខស្បៀងប៉ុណ្ណោះទេ ប៉ុន្តែនឹងក្លាយជាវិស័យដែលមានការប្រកួតប្រជែងខ្ពស់លើឆាកអន្តរជាតិ ដែលនាំមកនូវប្រាក់ចំណូលកាន់តែប្រសើរសម្រាប់កសិករខ្មែរគ្រប់រូប៕
អត្ថបទ៖ត្រេយង