ផ្ទៃទឹកដែលធ្លាប់តែខ្មៅងងឹត ពោរពេញដោយសម្រាម សម្បូរមូស និងដុះណែនណាន់តាន់តាប់ដោយកំប្លោក ឥឡូវនេះបានប្រែប្រួលមុខមាត់ថ្មី ទៅជាខ្សែទឹកដ៏ថ្លាដែលកំពុងតែហូរយ៉ាងរលូន។ មុខមាត់ថ្មីនៃប្រឡាយនេះ កើតចេញពីកិច្ចសហការយ៉ាងស្អិតរមួត និងការរួមដៃគ្នាយ៉ាងសស្រាក់សស្រាំ ក្នុងយុទ្ធនាការបើកមុខទឹក និងស្ដារប្រឡាយដែលមានប្រវែងជិត ៧ គីឡូម៉ែត្រ រាប់ចាប់ពីតំបន់ចោមចៅ១ ចោមចៅ២ រហូតដល់ចោមចៅ៣ ចាក់តម្រង់រហូតដល់តំបន់មុំបី ដែលជាចំណុចប្រសព្វនៃព្រំប្រទល់ខណ្ឌទាំងបីរបស់រាជធានីភ្នំពេញ គឺខណ្ឌពោធិ៍សែនជ័យ ខណ្ឌដង្កោ និងខណ្ឌមានជ័យ។
សូមចុចអាន៖ លោក ប៉ាង លីដា បង្ហាញយុទ្ធសាស្ត្រ «ធ្វើផង ពន្យល់ផង
សកម្មភាពនៃការរួមដៃគ្នាកាយកំប្លោក សម្អាតសម្រាម ក្នុងគោលដៅចម្បងគឺការរំដោះទឹកជំនន់ និងការរៀបចំ សណ្ដាប់ធ្នាប់ រហូតឈានទៅដល់ការកសាងជញ្ជាំងប្រឡាយយ៉ាងមានរបៀបរៀបរយ បានបំប្លែងប្រឡាយដែលធ្លាប់តែមានទឹកស្អុយកាលពីពេលមុន មកជាខ្សែទឹកដ៏មានជីវិត ដែលអាចឱ្យប្រជាពលរដ្ឋអុំទូកលេងកម្សាន្តបានយ៉ាងសប្បាយរីករាយ។ ផ្ដើមចេញពីរបត់ថ្មីនេះ លោក ប៉ាង លីដា អភិបាលរងខណ្ឌពោធិ៍សែនជ័យ បានបង្ហាញការរំពឹងទុកយ៉ាងមុតមាំថា ផែនការរៀបចំសណ្ដាប់ធ្នាប់ និងបរិស្ថាននេះ នឹងប្រែក្លាយតំបន់ប្រឡាយទឹកស្អុយពីមុន ឱ្យទៅជាតំបន់ទេសចរណ៍ដ៏ទាក់ទាញមួយ នាពេលខាងមុខដ៏ខ្លីនេះ។
លោក ប៉ាង លីដា ត្រូវបានគេស្គាល់ថាជាមន្ត្រីគំរូដ៏សកម្មមួយរូប ដែលតែងតែទទួលបានការកោតសរសើរ និងគាំទ្រយ៉ាងពេញទំហឹងពីសំណាក់ថ្នាក់ដឹកនាំកំពូលៗ រួមមាន ឯកឧត្តមអភិសន្តិបណ្ឌិត ស សុខា, ឯកឧត្តម សាយ សំអាល់, ឯកឧត្តម ជា សុផារ៉ា និងថ្នាក់ដឹកនាំផ្សេងៗទៀត។ ជាពិសេស លោកទទួលបាននូវការការណែនាំ និងលើកទឹកចិត្ត ជាប្រចាំពីឯកឧត្តម ឃួង ស្រេង អភិបាលរាជធានីភ្នំពេញ និងលោក សក់ ច័ន្ទកញ្ញារិទ្ធ អភិបាលខណ្ឌពោធិ៍សែនជ័យ ដែលលោកតែងតែជួយជ្រោមជ្រែងនិងឈរនៅពីក្រោយ ធ្វើឱ្យ ការងារដឹកនាំ និងសម្របសម្រួលរដ្ឋបាលខណ្ឌព្រំដែនប្រព្រឹត្តទៅបានយ៉ាងរលូន។ ដើម្បីជម្នះរាល់ឧបសគ្គលើការងាររៀបចំសណ្ដាប់ធ្នាប់ និងការស្ដារប្រឡាយ ប្រវែងជាង ១០គីឡូម៉ែត្រក្នុងរយៈពេលជាង៦ខែកន្លងមកនេះ លោក ប៉ាង លីដា បានដាក់ចេញនូវយុទ្ធសាស្ត្រផ្ទាល់ខ្លួនដ៏មុតស្រួចចំនួន ២ គឺ៖ យុទ្ធសាស្ត្រ «ស៤» និងយុទ្ធសាស្ត្រ «ញញួរប្រជាពលរដ្ឋ»។ យុទ្ធសាស្ត្រទាំងនេះ មិនត្រឹមតែជាឧបករណ៍ សម្រាប់ឆ្លុះបញ្ចាំងលើការងារនោះទេ ប៉ុន្តែជាស្ពានចម្លងក្នុងការជម្នះចិត្តប្រជាពលរដ្ឋ និងឈានទៅដោះស្រាយ ផលប៉ះពាល់ដោយសន្តិវិធី។ ទន្ទឹមនឹងនេះ ក្ដីកង្វល់ដ៏ធំមួយរបស់អាជ្ញាធរ គឺបន្ទាប់ពីប្រឡាយនេះស្អាតហើយ គឺការថែទាំ។ ព្រោះថា ទោះជាគ្រឿងចក្រល្អប៉ុនណា កម្លាំងអាជ្ញាធរប្រឹងប្រែងយ៉ាងណាក៏ដោយ ក៏មិនអាចខ្វះបាននូវការចូលរួមពីវិស័យឯកជន និងជាពិសេសគឺស្មារតីភ្ញាក់រលឹករបស់បងប្អូនប្រជាពលរដ្ឋផ្ទាល់ក្នុងការរួមគ្នាថែរក្សានោះឡើយ។
ជារួមមកវិញ ការផ្លាស់ប្តូរមុខមាត់ថ្មីនៃប្រឡាយដែល ធ្លាប់តែរងការរិះគន់ មកជាកន្លែងដែល អាចអុំទូក លេងកម្សាន្ត និង មាន បរិស្ថានបៃតង គឺមិនមែនកើតឡើងដោយចៃដន់នោះឡើយ គឺកើតឡើងដោយសារមានការតម្រង់ទិសពីថ្នាក់ដឹកនាំរាជធានីភ្នំពេញ កិច្ចសហការរវាងរដ្ឋបាលខណ្ឌពាក់ព័ន្ធ ព្រមទាំងមានការចូលរួមពីប្រជាពលរដ្ឋផងដែរ។ ការចូលរួមពីគ្រប់តួអង្គពាក់ព័ន្ធ នឹងជំរុញឲ្យការអភិវឌ្ឍសហគមន៍ប្រកបដោយចីរភាព ។
សកម្មភាពនិងសិល្បៈនៃការសម្របសម្រួលបែប «ឈ្នះ-ឈ្នះ» លើការរៀបចំសណ្ដាប់ធ្នាប់ និងការស្ដារប្រឡាយរបស់លោក ប៉ាង លីដា នេះ បានទាក់ទាញការចាប់អារម្មណ៍យ៉ាងខ្លាំងពីថ្នាក់ដឹកនាំរាជរដ្ឋាភិបាល។ នៅក្នុងជំនួបសម្តែងការគួរសម នាថ្ងៃទី២៧ តុលា ឯកឧត្តមអភិសន្ដិបណ្ឌិត ស សុខា រដ្ឋមន្ត្រីក្រសួងមហាផ្ទៃ បានមានប្រសាសន៍កោតសរសើរថា សកម្មភាពរបស់លោក ប៉ាង លីដា បានផ្ដល់មេរៀន និងបទពិសោធន៍ជាច្រើន ពិសេសគឺការប្រើប្រាស់ពាក្យពេចន៍ និងវិធីសាស្ត្រចរចាដោះស្រាយបញ្ហានៅកន្លែងកើតហេតុជាក់ស្ដែងជាមួយពលរដ្ឋ។
ឯកឧត្តមអភិសន្ដិបណ្ឌិត ស សុខា រដ្ឋមន្ត្រីក្រសួងមហាផ្ទៃ បានលើកទឹកចិត្តឱ្យអភិបាលរងខណ្ឌ ពោធិ៍សែនជ័យរូបនេះ បន្តសកម្មភាពគំរូនេះទៅមុខទៀត ព្រមទាំងបានអំពាវនាវដល់ប្រជាពលរដ្ឋក្នុងមូលដ្ឋានចូលរួមសហការជាមួយអាជ្ញាធរ ដើម្បីទទួលបានផលប្រយោជន៍រួមត្រលប់មកវិញដូចជាផ្លូវស្អាត បរិស្ថានល្អ គ្មានការជន់លិច ងាយស្រួលរស់នៅ ពិសេសធ្វើតម្លៃដីធ្លីឡើងថ្លៃថែមទៀតផង៕