នាពេលបច្ចុប្បន្ន បច្ចេកវិទ្យាកំពុងតែផ្លាស់ប្តូរមុខមាត់នៃរបៀបដែលមនុស្សកម្សាន្ត និងហាត់ប្រាណ ការរស់នៅ ការងារប្រចាំថ្ងៃដែលសម្រួលដល់ការបំពេញមុខងារទាំងមកវិញជំនួសដោយបច្ចេកវិទ្យា ដោយក្នុងវិស័យមួយចំនួនក៏កំពុងតែរួមបញ្ចូលគ្នា ស្របពេលវិស័យមួយដំនួបទៀតក៏កំពុងវិវត្តន៍ខ្លួនទៅតាមបណ្ដើរៗផងដែរ។
ជាក់ស្ដែងស្ទើគ្របវិស័យ ក្នុងចំណោមនោះវិស័យកីឡាក៏ជាផ្នែកមួយកំពុងតែរួមបញ្ចូលគ្នាជាមួយបច្ចេកវិទ្យាផងដែរ។ ក្នុងគេសង្គេតឃើញថាកីឡា HADO Sport គឺជាកីឡាបែបបច្ចេកវិទ្យាដ៏ទំនើបមួយ ដែលកំពុងបង្កើតជារលកញាប់ញ័រខ្លាំងក្នុងពិភពលោក ដោយវាបានធ្វើការលុបបំបាត់ព្រំដែនរវាង «ការលេងហ្គេមអេឡិចត្រូនិច (eSports)» និង «ការបញ្ចេញកម្លាំងកាយពិតប្រាកដ (Physical Sports)»។
HADO គឺជាកីឡាដំបូងបង្អស់នៅលើពិភពលោកដែលប្រើប្រាស់បច្ចេកវិទ្យា Augmented Reality (AR) ឬ «បច្ចេកវិទ្យាបង្កើនតថភាព»។ ខុសប្លែកពីបច្ចេកវិទ្យា VR (Virtual Reality) ដែលនាំអ្នកលេងចូលទៅក្នុងពិភពនិម្មិតទាំងស្រុង បច្ចេកវិទ្យា AR របស់ HADO គឺអនុញ្ញាតឱ្យអ្នកលេងនៅតែមើលឃើញទីលាន និងមនុស្សជុំវិញខ្លួនពិតៗ ប៉ុន្តែវាបន្ថែមនូវរូបភាពបែបឌីជីថល ដូចជា បាល់ថាមពល និងរបាំងការពារ មើលឃើញតាមរយៈវែនតាពិសេស។
បើនិយាយឱ្យងាយយល់ វាមានទម្រង់លេងស្រដៀងនឹង កីឡាចោលបាល់ទះ (Dodgeball) ដែរ ប៉ុន្តែជំនួសឱ្យការប្រើបាល់ជ័រពិតប្រាកដ អ្នកលេងនឹងត្រូវប្រើប្រាស់ «ថាមពលបាល់និម្មិត» ដើម្បីវាយលុកទៅលើគូប្រកួត។
ឧបករណ៍សំខាន់ៗ និងរបៀបនៃការលេង ដើម្បីអាចចូលរួមប្រកួត HADO បាន អ្នកលេងម្នាក់ៗត្រូវបំពាក់នូវឧបករណ៍បច្ចេកវិទ្យាចំនួនពីរគឺ៖
– វែនតា AR Headset៖ សម្រាប់ពាក់នៅលើក្បាល ដើម្បីមើលឃើញគ្រាប់បាល់ថាមពល ពិន្ទុ និងរបាំងការពារក្នុងទម្រង់ 3D។
– ឧបករណ៍សេនស័រនៅកដៃ (Wristband Sensor)៖ សម្រាប់ចាប់ចលនាដៃរបស់អ្នកលេងក្នុងការបញ្ចេញក្បាច់វាយលុក ឬការពារ។
ទម្រង់នៃការប្រកួត ការរៀបចំក្រុម៖ ការប្រកួតផ្លូវការតម្រូវឱ្យមានការចូលរួមលេងជាក្រុម ដែលក្នុង មួយក្រុមៗ មានសមាជិក ៣ នាក់ទល់នឹង ៣នាក់ នៅលើទីលានពិតប្រាកដដែលមានទំហំ ទូទៅទំហំ ៦x១០ ម៉ែត្រ។
យុទ្ធសាស្ត្រវាយលុក និងការពារ៖ នៅពេលអ្នកលេងគ្រវីដៃទៅមុខ វានឹងបង្កើតជា «បាល់ថាមពល (Energy Balls)» បាញ់សំដៅទៅគូប្រកួតដើម្បីយកពិន្ទុ។ ផ្ទុយទៅវិញ បើអ្នកលេងលើកដៃឡើងលើ វានឹងបង្កើតជា «របាំងការពារ (Shields)» ដើម្បីទប់ទល់នឹងការបាញ់បកមកវិញ។
រយៈពេលប្រកួត៖ ការប្រកួតនីមួយៗមានភាពស្វិតស្វាញ និងលឿនរហ័សខ្លាំង ដោយប្រើពេលត្រឹមតែ **៨០ វិនាទី** ប៉ុណ្ណោះ។ក្រុមណាដែលរកពិន្ទុបានច្រើនជាងគេដោយការបាញ់ត្រូវចំគូប្រកួត នៅពេលសញ្ញាបញ្ចប់បន្លឺឡើង នឹងក្លាយជាអ្នកឈ្នះ។
កីឡាដ៏អស្ចារ្យនេះត្រូវបានបង្កើតឡើងនៅក្នុង ប្រទេសជប៉ុន ក្នុងឆ្នាំ ២០១៤ ដោយក្រុមហ៊ុនបច្ចេកវិទ្យាមួយឈ្មោះថា Meleap Inc. ក្រោមគំនិតច្នៃប្រឌិតរបស់លោក Hiroshi Fukuda។ លោកមានបំណងចង់ប្រែក្លាយក្តីស្រមៃកាលពីកុមារភាព ដែលធ្លាប់តែឃើញតួអង្គក្នុងរឿងគំនូរជីវចលជប៉ុន (Anime) អាចបាញ់ថាមពលចេញពីបាតដៃ ឱ្យក្លាយទៅជាការពិតដែលអាចលេង និងហាត់ប្រាណបាន។
គិតមកទល់ពេលនេះ HADO បានពង្រីកខ្លួនទៅកាន់ប្រទេសជាង ៣០ ជុំវិញពិភពលោក រួមទាំងមានការបង្កើតព្រឹត្តិការណ៍ប្រកួតជើងឯកពិភពលោក (HADO World Cup) ជារៀងរាល់ឆ្នាំ ដែលមានក្រុមកីឡាករអាជីពចូលរួមយ៉ាងច្រើនកុះករ។
មូលហេតុដែលកីឡាករ HADO ទទួលបានការពេញនិយមខ្លាំង ព្រោះវាជាកីឡា Exergaming ដ៏ល្អឥតខ្ចោះ រួមជាមួយអត្ថប្រយោជន៍ដ៏ធំធេងរបស់ HADO គឺវាជា “eSport ដែលត្រូវបញ្ចេញកម្លាំងកាយពិតៗ។ អ្នកលេងមិនមែនអង្គុយលើកៅអីបញ្ជាដៃហ្គេមនោះទេ ប៉ុន្តែពួកគេត្រូវរត់ គេច លោត និងធ្វើចលនាពេញទំហឹង ដែលជួយដុតបំផ្លាញកាឡូរីបានយ៉ាងច្រើន មិនចាញ់ការលេងកីឡាប្រពៃណីឡើយ។
ក្រៅពីការកម្សាន្ត និងការហាត់ប្រាណ HADO ក៏ត្រូវបានគេយកទៅប្រើប្រាស់ក្នុងកម្មវិធីពង្រឹងសាមគ្គីភាពក្រុម (Team Building) សម្រាប់ក្រុមហ៊ុននានាផងដែរ ព្រោះវាទាមទារនូវការប្រាស្រ័យទាក់ទងខ្ពស់ យុទ្ធសាស្ត្រច្បាស់លាស់ និងការយល់ចិត្តគ្នារវាងសមាជិកក្រុមម្នាក់ៗ។
សរុបមក HADO-Beyond Sportsមិនត្រឹមតែជាហ្គេមកម្សាន្តនោះទេ ប៉ុន្តែវាគឺជាអនាគតនៃវិស័យកីឡា (The Future of Sports) ដែលបង្ហាញឱ្យឃើញថា បច្ចេកវិទ្យាមិនមែនធ្វើឱ្យមនុស្សជិះជាន់ ឬអសកម្មនោះឡើយ តែវាអាចជម្រុញឱ្យមនុស្សធ្វើចលនាកាន់តែសកម្ម និងរស់រវើកជាងមុន៕
ប្រភព៖ https://hado-official.com/
