ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់នៅព្រឹកថ្ងៃទី៩ ខែមិថុនា ឆ្នាំ២០២៦នេះ បានចែករំលែកសារមួយដោយបានលើកឡើងក្នុងន័យមួយថា «ការចុះដាំដើមឈើជាច្រើនដើមនៅតំបន់សំណង់មិនរៀបរយ មិនមែនត្រឹមតែលម្អសោភណភាពទីក្រុងប៉ុណ្ណោះទេ តែមានអត្ថប្រយោជន៍ច្រើនលើសពីនេះ។»
នៅក្នុងសារដែលឧបនាយករដ្ឋមន្ត្រីរូបនេះបានលើកឡើង គឺបានបង្ហាញពីគុណតម្លៃនៃការបង្កើតឱ្យមានសហគមន៍បៃតងនៅក្នុងទីក្រុងដែលបានជួួយច្រើនដល់ការរស់នៅរបស់ពលរដ្ឋ និង បរិស្ថាន ដោយមិនចាំបាច់ត្រូវធ្វើដោយគំហុកនោះឡើយ តែអាចចូលរួមម្ដងបន្តិច តែចូលរួមទាំងអស់គ្នា ដោយមិនមើលបំណាំគ្នា ឬធ្វើតែអាជ្ញាធរនោះឡើយ គឺចាំបាច់ត្រូវការជួយពីពលរដ្ឋដែលកំពុងរស់នៅស្រាប់ ឱ្យជួយមើល ជួយថែទាំ ទើបមានការើលូតលាស់ល្អ។
ឧបនាយករដ្ឋមន្ត្រី សាយ សំអាល់៖ «បន្តិចម្តង បន្តិចម្តងជាមួយនឹងការចូលរួម! សាកល្បងដាំដើមឈើក្នុងតំបន់សំណង់មិនរៀបរយនេះ មិនមែនត្រឹមតែជាការកែលំអរសោភណភាពទេ ប៉ុន្តែជាការបង្កើតនូវបរិយាកាសរស់នៅថ្មីសម្រាប់ប្រជាជនក្នុងទីក្រុង។ ដើមឈើអាចជួយកាត់បន្ថយធូលី និងសំឡេងរំខាន ព្រមទាំងផ្តល់ជាម្លប់ និងខ្យល់បរិសុទ្ធ។ ការដាំឈើនៅតំបន់ដែលមិនទាន់មានទាន់រៀបរយ នឹងធ្វើឲ្យកន្លែងនោះក្លាយជាតំបន់ស្រស់ស្អាត មានភាពរស់រវើក និងផ្តល់អារម្មណ៍សុខដុមរមនាដល់អ្នករស់នៅជុំវិញ។ នេះជាជំហានតូចមួយ ប៉ុន្តែមានអត្ថន័យដ៍ធំក្នុងការធ្វើឲ្យទីក្រុងកាន់តែមានភាពរស់រវើក និងមានភាពស្រស់ស្អាតជាងមុន។»
