ការប្រកួតកីឡាបាល់ទាត់ដណ្តើមពានរង្វាន់ឯកអគ្គរាជទូតម៉ាឡេស៊ី លើកទី៣ (Malaysian Ambassador’s Football Shield 2026) ឆ្នាំ២០២៦ បានធ្វើពិធីចាប់ឆ្នោត និងប្រជុំបច្ចេកទេសសម្រាប់ការប្រកួតរួចរាល់ នារសៀលថ្ងៃទី២៤ ខែមិថុនា ឆ្នាំ២០២៦ នៅស្ថានទូតម៉ាឡេស៊ី។
ព្រឹត្តិការណ៍នេះ នឹងប្រមូលផ្តុំអ្នកចូលរួម អ្នកគាំទ្រ និងភាគីពាក់ព័ន្ធទាំងមកពីក្រុមហ៊ុនម៉ាឡេស៊ី ក្រុមហ៊ុនកម្ពុជា ស្ថាប័នរដ្ឋាភិបាល សាកលវិទ្យាល័យ និងអង្គភាពអាជីវកម្មនានា ឆ្លុះបញ្ចាំងពីបណ្តាញទំនាក់ទំនងដ៏រឹងមាំ និងកំពុងពង្រីកខ្លួនរវាងប្រទេសទាំងពីរ។ បាល់ទាត់ដណ្តើមពានរង្វាន់ឯកអគ្គរាជទូតម៉ាឡេស៊ី (MAFS) ឆ្នាំ ២០២៦ គឺជាគំនិតផ្តួចផ្តើមរបស់ស្ថានឯកអគ្គរាជទូតម៉ាឡេស៊ីប្រចាំនៅភ្នំពេញ ក្នុងគោលបំណងពង្រឹងទំនាក់ទំនងម៉ាឡេស៊ី-កម្ពុជា តាមរយៈឌីប្លូម៉ាស៊ីកីឡា។
ប្រកួតកីឡាបាល់ទាត់ ដែលរៀបចំឡើងដោយស្ថានឯកអគ្គរាជទូតម៉ាឡេស៊ីប្រចាំនៅភ្នំពេញ នេះនឹងមានក្រុមចូលរួមចំនួន ២៤ ក្រុម ដោយប្រកួតក្នុងទម្រង់បាល់ទាត់បុរស ៦នាក់ម្នាក់ (6-a-side) ដែលរួមមានវគ្គចែកពូល និងវគ្គជម្រុះ។ ការប្រកួតនឹងត្រូវរៀបចំឡើងនៅថ្ងៃអាទិត្យ ទី១២ ខែកក្កដា ឆ្នាំ២០២៦ ចាប់ពីម៉ោង ៧:០០ ព្រឹក ដល់ម៉ោង ៦:០០ ល្ងាច នៅវិទ្យាល័យ ជា ស៊ីម ជ្រោយចង្វារ រាជធានីភ្នំពេញ។
ការប្រកួតនេះបង្ហាញពីរបៀបដែលកីឡាអាចដើរតួជាឧបករណ៍ដ៏មានប្រសិទ្ធភាពក្នុងការជំរុញមិត្តភាព ការយោគយល់គ្នាទៅវិញទៅមក និងកិច្ចសហប្រតិបត្តិការរវាងម៉ាឡេស៊ី និងកម្ពុជា។ ការរៀបចំនៅឆ្នាំ ២០២៦ នេះ មានការចូលរួមពី ២៤ ក្រុម ដែលតំណាងឱ្យក្រុមហ៊ុនម៉ាឡេស៊ី ក្រុមហ៊ុនកម្ពុជា គ្រឹះស្ថានហិរញ្ញវត្ថុ សាកលវិទ្យាល័យ និងស្ថាប័នរដ្ឋាភិបាល។
លើសពីកីឡាបាល់ទាត់ MAFS ដើរតួជាវេទិកាតភ្ជាប់បណ្តាញ ដែលពង្រឹងទំនាក់ទំនងក្នុងចំណោមវិនិយោគិនម៉ាឡេស៊ី ដៃគូកម្ពុជា និងអាជីវកម្មក្នុងតំបន់ដែលកំពុងដំណើរការនៅកម្ពុជា។ ព្រឹត្តិការណ៍នេះបង្កើតឱកាសសម្រាប់ការចូលរួម កិច្ចសហការ និងការកសាងទំនាក់ទំនងនៅក្រៅបរិបទអាជីវកម្មផ្លូវការ។ វាក៏ផ្តល់ឱកាសផងដែរសម្រាប់ក្រុមហ៊ុននានាក្នុងការជួយពង្រឹងភាពជាដៃគូដែលមានស្រាប់ ព្រមទាំងស្វែងរកវិស័យថ្មីៗនៃកិច្ចសហប្រតិបត្តិការ។
សម្រាប់ប្រាក់រង្វាន់ ក្នុងការប្រកួតកីឡាបាល់ទាត់ដណ្តើមពានរង្វាន់ឯកអគ្គរាជទូតម៉ាឡេស៊ី លើទី៣ ឆ្នាំ២០២៦ រួមមាន៖
* ជើងឯក (Champion) – ១,២០០ ដុល្លារអាមេរិក
* ជើងឯករង (Runner-Up) – ១,០០០ ដុល្លារអាមេរិក
* លេខ៣ (Second Runner-Up) – ៨០០ ដុល្លារអាមេរិក
ការប្រកួតនេះក៏នឹងត្រូវជ្រើសរើសកីឡាករឆ្នើម តាមរយៈពានរង្វាន់សម្រាប់ «កីឡាករល្អបំផុត» (Best Player) «អ្នកស៊ុតបញ្ចូលទីបានច្រើនជាងគេ» (Top Scorer) និង «អ្នកចាំទីល្អបំផុត» (Best Goalkeeper)។
គួរបញ្ជាក់ថា ការប្រកួតបាល់ទាត់ពានរង្វាន់ ឯកអគ្គរដ្ឋទូតម៉ាឡេស៊ី “Malaysian Ambassador’s Football Shield ត្រូវបានរៀបចំឡើងយ៉ាងជោគជ័យចំនួន ២លើករួមមកហើយ។ លើកទី១ ក្រុមបាល់ទាត់ធនាគារ CIMB ជាម្ចាស់ជើងឯក និងលើកទី២ ក្រុមបាល់ទាត់ ខេមបូឌា អ៊ែរវ៉េ (Cambodia Airways) គឺជាម្ចាស់ជើងឯក៕
