វិស័យកសិពាណិជ្ជកម្មកម្ពុជាបានឈានដល់របត់ប្រវត្តិសាស្ត្រថ្មីមួយទៀត តាមរយៈការបើកដាក់ឱ្យដំណើរការជាផ្លូវការនូវ «ច្រករបៀងដឹកជញ្ជូនឆ្លងដែនថ្មីស្រឡាង» ដែលអនុញ្ញាតឱ្យការដឹកជញ្ជូនកសិផលពីកម្ពុជា ឆ្លងកាត់ប្រទេសឡាវ ទៅកាន់ទីផ្សារប្រទេសចិន ប្រើប្រាស់ពេលវេលាខ្លីបំផុតត្រឹមតែមួយសប្តាហ៍ប៉ុណ្ណោះ។ សមិទ្ធផលដ៏ធំធេងនេះ ទទួលបានការអបអរសាទរ និងវាយតម្លៃខ្ពស់ភ្លាមៗពីសំណាក់តំណាងការទូតនៃប្រទេសចិនប្រចាំកម្ពុជា។
នៅថ្ងៃទី២៤ ខែមិថុនា ឆ្នាំ២០២៦ លោក Wang WenBin ឯកអគ្គរដ្ឋទូតចិនប្រចាំកម្ពុជា បានសម្តែងការសាទរយ៉ាងខ្លាំងចំពោះវឌ្ឍនភាពនៃការដឹកជញ្ជូនឆ្លងកាត់នេះ។ តាមរយៈសំណេរក្រៅផ្លូវការរបស់លោកនៅល្ងាចថ្ងៃដដែលនោះ លោកបានគូសបញ្ជាក់ថា៖
«ខ្ញុំពិតជារីករាយដែលបានដឹងថា ច្រករបៀងដឹកជញ្ជូនឆ្លងដែនថ្មីស្រឡាងគឺពីកម្ពុជាទៅប្រទេសចិនតាមរយៈប្រទេសឡាវ បានបើកដាក់ឱ្យដំណើរការជាផ្លូវការនៅថ្ងៃទី២២ ខែមិថុនា។ ច្រករបៀងនេះនឹងធ្វើឱ្យពេលវេលាដឹកជញ្ជូនខ្លីជាងមុន ដែលអនុញ្ញាតឱ្យអ្នកប្រើប្រាស់ចិនរីករាយជាមួយផលិតផលកសិកម្មកម្ពុជាស្រស់ៗ រួមមានចេក ស្វាយ អង្ករ មៀនប៉ៃលិន ម្សៅដំឡូងមី និងទុរេនជាដើម។ នេះជាដំណឹងល្អសម្រាប់ពាណិជ្ជកម្មកសិកម្មចិន-កម្ពុជា និងការធ្វើសមាហរណកម្មសេដ្ឋកិច្ចក្នុងតំបន់»។
គួររំលឹកផងដែរថា ពិធីសម្ពោធជាផ្លូវការនៃការដឹកជញ្ជូនកសិផលឆ្លងកាត់ (Transit) ដ៏មានសារៈសំខាន់នេះ ត្រូវបានប្រារព្ធឡើងកាលពីថ្ងៃទី២២ ខែមិថុនា ឆ្នាំ២០២៦ នៅទីក្រុងវៀងចន្ទន៍ ប្រទេសឡាវ។
ជោគជ័យនៃការបើកច្រកដឹកជញ្ជូនយុទ្ធសាស្ត្រនេះ មិនមែនកើតឡើងដោយចៃដន្យនោះទេ ប៉ុន្តែវាជាផ្លែផ្កានៃកិច្ចខិតខំប្រឹងប្រែង និងការចរចាយ៉ាងសកម្មប្រកបដោយផ្លែផ្កា កន្លងមកនេះ រវាងថ្នាក់ដឹកនាំ និងមន្ត្រីជំនាញនៃក្រសួងកសិកម្ម រុក្ខាប្រមាញ់ និងនេសាទ និងក្រសួងកសិកម្ម និងបរិស្ថានឡាវ។
កិច្ចសម្របសម្រួលលើផ្នែកគតិយុត្ត និងនីតិវិធីគយនានារវាងប្រទេសទាំងពីរ បានបើកផ្លូវឱ្យកសិផលខ្មែររហូតដល់ ៦មុខ រួមមាន៖ ចេក, ស្វាយ, អង្ករ, មៀនប៉ៃលិន, ម្សៅដំឡូងមី និងទុរេន អាចដឹកជញ្ជូនឆ្លងកាត់ដោយរលូនទៅកាន់ទីផ្សារខ្នាតយក្សរបស់ចិន។
ការកាត់បន្ថយពេលវេលាដឹកជញ្ជូនមកត្រឹមរយៈពេលត្រឹមតែមួយសប្តាហ៍នេះ គឺជាចំណុចរបត់ឈ្នះ-ឈ្នះ សម្រាប់ខ្សែច្រវាក់ផ្គត់ផ្គង់កសិកម្ម។ វាមិនត្រឹមតែជួយរក្សាគុណភាព ភាពស្រស់ និងរសជាតិនៃកសិផលខ្មែរឱ្យនៅល្អខ្ពស់រហូតដល់ដៃអ្នកប្រើប្រាស់ចិនប៉ុណ្ណោះទេ ប៉ុន្តែថែមទាំងកាត់បន្ថយការខូចខាត និងចំណាយភស្តុភារកម្ម (Logistics) របស់ក្រុមហ៊ុននាំចេញផងដែរ។
សូមជម្រាបថា នេះជាសញ្ញាណវិជ្ជមាន និងជាកាលានុវត្តភាពថ្មីស្រឡាងសម្រាប់បងប្អូនកសិករ ក៏ដូចជាម្ចាស់អាជីវកម្មក្នុងវិស័យកសិកម្មនៅកម្ពុជា ក្នុងការចាប់យកឱកាស ពង្រឹងខ្សែច្រវាក់ផលិតកម្ម និងពង្រីកសក្តានុពលកសិផលខ្មែរនៅលើទីផ្សារអន្តរជាតិឱ្យកាន់តែទូលំទូលាយ និងមានភាពប្រកួតប្រជែងខ្ពស់ជាងមុន៕
