ការបណ្ដុះស្មារតីកុមារ និងយុវជនជំនាន់ក្រោយឱ្យស្គាល់ និងស្រឡាញ់តម្លៃបេតិកភណ្ឌជាតិ គឺជាគ្រឹះដ៏រឹងមាំបំផុតក្នុងការថែរក្សាព្រលឹងវប្បធម៌។ ក្នុងចក្ខុវិស័យដ៏វែងឆ្ងាយនេះ អាជ្ញាធរជាតិព្រះវិហារ បានរៀបចំកម្មវិធីផ្សព្វផ្សាយអប់រំបេតិកភណ្ឌដល់សិស្សានុសិស្ស និងប្រជាសហគមន៍នៅក្នុងភូមិកោះកេរ សរុបចំនួន ៥៦នាក់ នៅក្នុងរមណីយដ្ឋានប្រាសាទកោះកេរ កាលពីថ្ងៃទី៣០ ខែមិថុនា ឆ្នាំ២០២៦ កន្លងទៅនេះ។
កម្មវិធីនេះត្រូវបានរៀបចំឡើងក្នុងគោលបំណងចម្បង គឺការផ្ដល់ចំណេះដឹងស៊ីជម្រៅអំពីប្រវត្តិសាស្ត្រនៃអតីតរាជធានីបុរាណខ្មែរ ក៏ដូចជាការស្វែងយល់ពីកត្តាផ្សេងៗដែលនាំដល់ការខូចខាតប្រាសាទ។ លើសពីនេះ ក្រុមការងារបានបង្ហាញពីកិច្ចខិតខំប្រឹងប្រែងយ៉ាងសស្រាក់សស្រាំរបស់រាជរដ្ឋាភិបាល ក្នុងកិច្ចការអភិរក្ស និងជួសជុល ដើម្បីដាស់ស្មារតី «គ្រាប់ពូជជំនាន់ក្រោយ» ឱ្យចេះស្រឡាញ់ ការពារ និងចូលរួមថែរក្សាប្រាសាទបុរាណខ្មែរដែលជាមរតកមិនអាចកាត់ថ្លៃបានទាំងអស់គ្នា។
ដើម្បីឱ្យកុមារ និងសិស្សានុសិស្សងាយយល់ និងមានភាពស្និទ្ធស្នាលជាមួយវប្បធម៌របស់ខ្លួន ក្រុមការងារបានលើកយក «គម្រោងអភិរក្ស និងជួសជុលប្រាសាទក្រហម» ដែលទទួលបានការគាំទ្រថវិកាដោយអង្គការអាលីប (ALIPH) នៃប្រទេសស្វីស មកធ្វើជាមេរៀនជាក់ស្តែង។ កុមារៗត្រូវបានពន្យល់យ៉ាងលម្អិតអំពីស្ថានភាពប្រាសាទនៅមុន និងក្រោយពេលជួសជុល រួមទាំងបច្ចេកទេសជួសជុលប្រាសាទបុរាណ។ កាន់តែពិសេស ពួកគេបានចូលរួមសកម្មភាពរៀនផាត់ពណ៌លើគំនូរប្រាសាទក្រហម ដែលជាវិធីសាស្ត្រមួយជួយបង្កប់រូបភាពប្រាសាទបុរាណទៅក្នុងចិត្ត និងការចងចាំរបស់ពួកគេតាំងពីតូចទៅ។
បន្ថែមលើសពីនេះ ក្រុមការងារក៏បាននាំយកនូវមោទនភាពថ្មីមួយមកបង្ហាញជូនអ្នកចូលរួម គឺរូបភាព «ព្រះប្រតិមាព្រះឥសូរាំ» ដែលត្រូវបានជួសជុលឡើងវិញដោយជោគជ័យ ក្រោមសមិទ្ធផលការងារបច្ចេកទេសដ៏ម៉ត់ចត់របស់សាលាបារាំងចុងបូព៌ា (EFEO) នៅខេត្តសៀមរាប។
ការរៀបចំកម្មវិធីអប់រំនៅកៀកនឹងសហគមន៍ និងការផ្ដោតលើការបណ្ដុះកុមារតូចៗនាពេលនេះ គឺជាយុទ្ធសាស្ត្រគន្លឹះ ព្រោះនៅពេលដែលគ្រាប់ពូជទាំងនេះលូតលាស់ឡើងដោយស្គាល់ច្បាស់ពីតម្លៃវប្បធម៌ និងឫសគល់ប្រវត្តិសាស្ត្ររបស់ខ្លួន ពួកគេនឹងក្លាយជាខែលការពារបេតិកភណ្ឌជាតិដ៏រឹងមាំ និងប្រកបដោយនិរន្តរភាពសម្រាប់កម្ពុជានាថ្ងៃអនាគត៕
