យោងតាមការផ្សាយដោយទំព័រហ្វេសប៊ុកផ្លូវការរបស់ស្ថានទូតសាធារណរដ្ឋឆែកប្រចាំទីក្រុងភ្នំពេញ បានបង្ហាញពីក្ដីរំពឹងខ្ពស់ថានឹងមានអ្នកទេសចរ ឆែក មកទស្សនាកម្សាន្តតំបន់ឆ្នេរក្នុងក្រុងព្រះសីហនុរាប់រយនាក់ក្រោយមានជើងហោះហើរត្រង់ជាលើកដំបូងបង្អស់ក្នុងប្រវត្តិសាស្ត្រ។ នេះបើយោងតាមការផ្សាយនៅថ្ងៃទី៣ ខែកក្កដា នេះ។
ខាងក្រោមនេះគឺជាការចេញផ្សាយនៅលើសារព័ត៌មានប្រទេសឆេក ដែលសូមសម្រួលដកស្រង់ខ្លះបង្ហាញពីខ្លឹមសារដើមដូចខាងក្រោម៖
លទ្ធភាពរបស់ប្រជាជនឆែកក្នុងការធ្វើដំណើរតាមជើងហោះហើរឆាតធ័រ (Charter flights) ត្រង់ទៅកាន់គោលដៅទេសចរណ៍បរទេសដ៏កម្រ (Exotic destinations) កំពុងតែបន្តពង្រីកខ្លួនយ៉ាងខ្លាំង ហើយអ្វីដែលជាចំណុចពិសេសថ្មីប្រចាំរដូវកាលនេះ គឺប្រទេសកម្ពុជា ដែលជាលើកដំបូងបង្អស់ក្នុងប្រវត្តិសាស្ត្រ។ ទីក្រុងឆ្នេរសមុទ្រក្រុងព្រះសីហនុ មិនត្រឹមតែទាក់ទាញភ្ញៀវទេសចរណ៍ជាមួយនឹងឆ្នេរខ្សាច់លាតសន្ធឹងយ៉ាងធំល្វឹងល្វើយប៉ុណ្ណោះទេ ប៉ុន្តែក៏ជាទ្វារចម្លងទៅកាន់កោះត្រូពិចដែលនៅក្បែរៗនោះផងដែរ។ អ្វីៗទាំងអស់នេះ នឹងត្រូវកាត់បន្ថយមកត្រឹមរយៈពេលហោះហើរតែ ១១ ម៉ោង ប៉ុណ្ណោះពីទីក្រុងប្រាក (Prague) ចាប់ពីពាក់កណ្តាលខែធ្នូទៅ។
ការរត់គេចពីអាកាសធាតុត្រជាក់ក្នុងរដូវរងាទៅកាន់តំបន់ដែលមានកម្តៅក្តៅឧណ្ហៗ កំពុងមានប្រជាប្រិយភាពខ្លាំងឡើងៗក្នុងចំណោមប្រជាជនឆែក ហើយក្នុងការជ្រើសរើសគោលដៅធ្វើដំណើរ គឺពួកគេតែងតែផ្តល់អាទិភាពដល់ទីកន្លែងណាដែលអាចធ្វើដំណើរទៅដល់បានយ៉ាងងាយស្រួល និងរហ័ស តាមរយៈជើងហោះហើរត្រង់។
ប្រទេសកម្ពុជាទាក់ទាញភ្ញៀវទេសចរដោយសារការរួមបញ្ចូលគ្នានៃប្រវត្តិសាស្ត្រដ៏គួរឱ្យចាប់អារម្មណ៍ ឆ្នេរខ្សាច់ស និងការផ្សងព្រេង។ ទីតាំងដែលមានអ្នកទៅទស្សនាច្រើនជាងគេបំផុតនៅក្នុងប្រទេស គឺប្រាសាទអង្គរវត្តដ៏ល្បីល្បាញ ដែលត្រូវបានកសាងឡើងក្នុងសតវត្សទី ១២ ជាទីសក្ការៈបូជានៃព្រហ្មញ្ញសាសនា ឧទ្ទិសដល់ព្រះវិស្ណុ។ រមណីយដ្ឋានបុរាណវិទ្យាដ៏ធំទូលាយនៃតំបន់អង្គរ គឺជាបរិវេណសាសនាដ៏ធំបំផុតនៅលើពិភពលោក និងត្រូវបានចុះបញ្ជីក្នុងបញ្ជីបេតិកភណ្ឌពិភពលោករបស់អង្គការយូណេស្កូ (UNESCO)។
ក្រុងព្រះសីហនុ គឺជាទីក្រុងកំពង់ផែ និងជារមណីយដ្ឋានទេសចរណ៍នៅលើឆ្នេរសមុទ្រនៃឈូងសមុទ្រថៃ ស្ថិតនៅភាគខាងត្បូងនៃប្រទេស។ វាមានចម្ងាយប្រហែល ១៨៥ គីឡូម៉ែត្រពីរាជធានីភ្នំពេញ។ នៅចម្ងាយពីរបីសិបគីឡូម៉ែត្រពីក្រុងព្រះសីហនុ មានកោះត្រពិចជាច្រើនរាយប៉ាយ ដែលទាក់ទាញភ្ញៀវទេសចរណ៍ដោយសារឆ្នេរខ្សាច់ស ទឹកសមុទ្រពណ៌ខៀវស្រងាត់ និងបរិយាកាសដ៏ធូរស្បើយ។ ភ្ញៀវទេសចរឆែកអាចសម្រាកលំហែកាយដោយផ្ទាល់នៅក្រុងព្រះសីហនុ ឬនៅលើកោះនានាដូចជា កោះរ៉ុង, កោះរ៉ុងសន្លឹម និង កោះឫស្សី ដែលចំណាយពេលធ្វើដំណើរតាមទូកល្បឿនលឿនប្រហែលមួយម៉ោងប៉ុណ្ណោះ។
