សហព័ន្ធកីឡាបាល់ទះកម្ពុជា កាលពីថ្ងៃទី៦ ខែកក្កដា ឆ្នាំ២០២៦ បានជូនដំណឹងដល់ក្លិប សមាគម និងក្រុមកីឡាបាល់ទះទាំងអស់ ស្ដីពីការរៀបចំការប្រកួតបាល់ទះពាន់រង្វាន់ U20 Wurkz Special Volleyball Cup ២០២៦ តាមមណ្ឌលទាំង៥ ។
សមាគម ក្លិប ក្រុមបាល់ទះតាមបណ្ដាលមូលដ្ឋានភូមិ ស្រុក ក្រុង ខណ្ឌ ដែលមានបំណងចូលរួមការប្រកួតអាចដាក់ពាក្យចុះឈ្មោះតាមកាលបរិច្ឆេទ និងលក្ខខណ្ឌដែលមានចែងក្នុងសេចក្តីជូនដំណឹងខាងក្រោម។ សម្រាប់ព័ត៌មានបន្ថែម សូមទំនាក់ទំនងមកសហព័ន្ធកីឡាបាល់ទះកម្ពុជា តាមលេខទូរស័ព្ទដែលមានបញ្ជាក់ក្នុងសេចក្តីជូនដំណឹង។
ការប្រកួតនេះមានគោលបំណងផ្តល់ឱកាសដល់កីឡាករទាំងអស់ទូទាំងប្រទេសដែលអាចបង្កើតជាក្រុមប្រកួតបាននិងមានអាយុក្រោម ២០ឆ្នាំ អាចបង្ហាញសមត្ថភាព បង្កើនបទពិសោធន៍ ចូលរួមប្រកួតតាមស្ដង់ដាដែលរៀបចំដោយសហព័ន្ធកីឡាបាល់ទះកម្ពុជា។
ជុំវិញការប្រកួតបាល់ទះភូមិភាគនេះដែរ លោកបណ្ឌិត លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា បានបញ្ជាក់ថា នឹងប្រើប្រាស់យុវជន U20 នៅក្នុងពានរង្វាន់មួយនេះ គឺដើម្បីត្រៀមខ្លួនទៅលេងព្រឹត្តិកាណ៍កីឡាសាកលវិទ្យាល័យអាស៊ាន និងកម្ពុជា ធ្វើជាម្ចាស់ផ្ទះ ឆ្នាំ២០២៩។
