នាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ កាលពីពេលថ្មីៗនេះ បានបង្ហាញពីការការពារខ្លួនការទូទាត់ប្រាក់តាមរយ:ការស្កេន QR Code អោយបានត្រឹមត្រូវ និងសុវត្តិភាព ចៀសវាងមានការបាត់បង់ និងចាញ់ល្បិតរបស់ជនខិលខូច។
មុនដឹងអំពីសុវត្តិភាព មកដឹងពី QR Code (មកពីពាក្យពេញថា Quick Response Code ឬហៅថា «កូដឆ្លើយតបរហ័ស») គឺជាបាកូដពីរវិមាត្រ ដែលមានរាងជាការ៉េ ផ្ទុកទៅដោយចំនុចអុចៗពណ៌ខ្មៅ និងផ្ទៃពណ៌ស។ វាត្រូវបានបង្កើតឡើងដំបូងក្នុងឆ្នាំ ១៩៩៤ ដោយក្រុមហ៊ុន Denso Wave របស់ប្រទេសជប៉ុន ដើម្បីប្រើប្រាស់ក្នុងការតាមដានគ្រឿងបន្លាស់រថយន្ត។
បច្ចុប្បន្ន QR Code ត្រូវបានគេប្រើប្រាស់យ៉ាងទូលំទូលាយក្នុងជីវភាពរស់នៅប្រចាំថ្ងៃ ពិសេសពេញនិយមបំផុតនៅកម្ពុជា ដូចជាប្រព័ន្ធ KHQR តាមរយៈការប្រើកាមេរ៉ាទូរសព្ទឆ្លាតវៃ ដើម្បីស្កេន យកព័ត៌មានភ្លាមៗ និងទូទាត់ប្រាក់។
ដូចនេះអ្នកប្រើប្រាស់ មុនពេលស្កេន QR Code ឬ ធ្វើប្រតិបត្តិការទូទាត់ប្រាក់ដោយសុវតត្តិភាព សូមចំណាយពេលត្រឹមប៉ុន្មានវិនាទី ដើម្បីផ្ទៀងផ្ទាត់ព័ត៌មានឱ្យបានច្បាស់លាស់។ ជៀសវាងជនខិលខូចយកវាទៅប្រើក្នុងផ្លូវមិនល្អ (ហៅថា QR phishing ឬ Quishing)។
ដូចដែលនាយកដ្ឋានប្រឆាំងបទល្មើសបច្ចេកវិទ្យា បានដាស់តឿន មុននឹងស្កេន ឬផ្ទេរប្រាក់ សូមប្រុងប្រយ័ត្ន៖
- ពិនិត្យ និងផ្ទៀងផ្ទាត់ឈ្មោះ៖ មើលឈ្មោះគណនីអ្នកទទួលឱ្យបានច្បាស់លាស់ទាំងមុន និងក្រោយពេលស្កេន។
- ពិនិត្យចំនួនទឹកប្រាក់៖ ផ្ទៀងផ្ទាត់ចំនួនលេខ និងប្រភេទប្រាក់ (ដុល្លារ ឬរៀល) ឱ្យត្រឹមត្រូវមុនចុចបញ្ជាក់។
- កុំចែករំលែកលេខសម្ងាត់៖ ដាច់ខាតកុំប្រាប់លេខកូដសម្ងាត់ ឬលេខ OTP ទៅកាន់អ្នកដទៃ។
- ផ្អាកភ្លាមៗ៖ ប្រសិនបើស្កេនទៅឃើញលីងប្លែកៗ ឬមានភាពមិនប្រក្រតី សូមបញ្ឈប់ប្រតិបត្តិការភ្លាម៕
សូមបញ្ជាក់ថា សម្រាប់គុសម្បត្តិ និងគុណវិបត្តិរបស់ QR Code គឺមានដូចគ្នា គុសម្បត្តិនោះគឺ លឿន និងងាយស្រួល ផ្ទុកទិន្នន័យបានច្រើន កាត់បន្ថយការចមណាយពេលច្រើន។ ចំពោះគុណវិបត្តិ និងហានិភ័យ ប្រឈមការបោកប្រាស់ មើលមិនដឹងដោយភ្នែកទទេ មិនអាចដឹងថាវាមានសុវត្ថិភាព ឬអត់ទេ លុះត្រាតែស្កេន និងពឹងផ្អែកលើបច្ចេកវិទ្យា៕
