អង្គភាពស៊ើបអង្កេតពិសេសផ្នែកអន្តោប្រវេសន៍នៃការិយាល័យអន្តោប្រវេសន៍សេអ៊ូល ស្ថិតនៅក្រោមក្រសួងយុត្តិធម៌ បានប្រកាសថា ខ្លួនបានចាប់ខ្លួន និងបញ្ជូនខ្លួនបុគ្គលពីររូប (តំណាងដោយអក្សរ A និង B) ទៅកាន់ការិយាល័យព្រះរាជអាជ្ញាប្រចាំតំបន់កណ្តាលក្រុងសេអ៊ូល កាលពីចុងខែមេសា និងពាក់កណ្តាលខែមិថុនា រៀងៗខ្លួន ពីបទល្មើសរំលោភលើច្បាប់គ្រប់គ្រងអន្តោប្រវេសន៍។
ជនសង្ស័យទាំងពីររូបនេះ ត្រូវបានចោទប្រកាន់ថាបានរកចំណូលប្រមាណ ២០០ លានវ៉ុន ប្រមាណ១៥ម៉ឺនដុល្លារ (សម្រាប់បុគ្គល A) និង ៤០០ លានវ៉ុន ប្រមាណ៣០ម៉ឺនដុល្លារ (សម្រាប់បុគ្គល B) ពីការប្រកបរបរលក់ប្រវេសនីនៅក្នុងតំបន់នានា រួមទាំងក្រុងសេអ៊ូល និងប៊ូសាន ចាប់ពីខែមករា ឆ្នាំ២០២៤ ដល់ខែមិថុនា ឆ្នាំ២០២៦ ដោយគិតថ្លៃសេវាចន្លោះពី ១០០,០០០ វ៉ុន (៧៥ដុល្លារ) ទៅ ២១០,០០០ វ៉ុន (២០០ដុល្លារ) ក្នុងមួយលើក។
ពួកគេបានធ្វើដំណើរចូលមកក្នុងប្រទេសកូរ៉េខាងត្បូងតាំងពីឆ្នាំ២០២៣ ហើយបានបន្តស្នាក់នៅជាជនអន្តោប្រវេសន៍ខុសច្បាប់អស់រយៈពេលជាង ៣ ឆ្នាំ ដោយបានស្វែងរកម៉ូយ (អតិថិជន) តាមរយៈការបង្ហោះផ្សព្វផ្សាយពាណិជ្ជកម្មរៀបរាប់ពីភិនភាគរាងកាយរបស់ពួកគេនៅលើគេហទំព័រសម្រាប់ក្រុមអ្នកស្រឡាញ់ភេទដូចគ្នា (LGBTQ+) ឬតាមរយៈការបង្ហោះវីដេអូរួមភេទដែលថតដោយខ្លួនឯងនៅលើគណនីបណ្តាញសង្គមផ្ទាល់ខ្លួន។
ក្រៅពីនេះ ពួកគេក៏បានព្យាយាមគេចវេសពីការបង្រ្កាបរបស់ប៉ូលិស ដោយតម្រូវឱ្យអតិថិជនផ្ញើរូបថតបញ្ជាក់ពីការមកដល់របស់ពួកគេនៅក្បែរផ្ទះល្វែង (Studio apartment) ជាមុនសិន ទើបប្រាប់លេខបន្ទប់ពិតប្រាកដជាក្រោយ។
បច្ចុប្បន្ន អង្គភាពស៊ើបអង្កេតពិសេសផ្នែកអន្តោប្រវេសន៍ កំពុងបន្តតាមដានបណ្តាញសង្គម និងគេហទំព័រអាសអាភាសនានា ដោយសារមានការសង្ស័យថា អាចនឹងមានជនបរទេសផ្សេងទៀតដែលកំពុងប្រកបរបរលក់ប្រវេសនីដោយប្រើប្រាស់វិធីសាស្ត្រស្រដៀងគ្នានេះដែរ៕
