ភ្នំពេញ៖ លោក ទូច សុឃៈ អ្នកនាំពាក្យរងក្រសួងមហាផ្ទៃ បានលើកឡើងថា ការបន្ថយកម្រិតបម្រាមរបស់សាធារណរដ្ឋកូរ៉េ នៅពេលនេះគឺជាការយល់ត្រូវ និងជាការផ្ដល់យុត្តិធម៌ដល់កម្ពុជា ដែលធ្វើឱ្យភ្ញៀវបរទេសទាំងអស់ ជាពិសេសបងប្អូនមកពីកូរ៉េ ខាងត្បូង អ្នកវិនិយោគទុកទាំងអស់ ពិសេសមកពីកូរ៉េ លែងមានការសង្ស័យ ពីការផ្សព្វផ្សាយអវិជ្ជមានក្នុងចរិកមួលបង្កាច់ តាមរូបភាពផ្សេងៗមកលើកម្ពុជា។
ការលើកឡើងនេះ ធ្វើឡើងបន្ទាប់ពីសារព័ត៌មាន The Korea Times បានផ្សាយថា ក្រសួងការបរទេសសាធារណរដ្ឋកូរ៉េ បានបន្ថយកម្រិតការព្រមានធ្វើដំណើរសម្រាប់តំបន់ភ្នំបូកគោ ក្នុងខេត្តកំពត ក្រុងបាវិត ខេត្តស្វាយរៀង និងក្រុងប៉ោយប៉ែត ខេត្តបន្ទាយមានជ័យ ពីកម្រិតទី៤ (ហាមធ្វើដំណើរ) មកកម្រិតទី៣ (ណែនាំឱ្យចាកចេញពីតំបន់) បន្ទាប់ពីវាយតម្លៃឃើញថា ស្ថានភាពសន្តិសុខមានភាពប្រសើរឡើង។ ការហាមឃាត់នេះត្រូវបានដាក់អនុវត្តតាំងពីខែតុលា ឆ្នាំ២០២៥ ហើយត្រូវបានដកចេញក្រោយករណីបទល្មើសពាក់ព័ន្ធជនជាតិកូរ៉េនៅកម្ពុជា បានថយចុះរហូតដល់ ៩៤ភាគរយ ក្នុងឆមាសទី១ ឆ្នាំ២០២៦ បើធៀបនឹងរយៈពេលដូចគ្នាកាលពីឆ្នាំមុន។
នៅក្នុងសេចក្ដីថ្លែងការណ៍ជាសារសំឡេង នាថ្ងៃទី១៣ ខែកក្កដា ឆ្នាំ២០២៦ លោកបណ្ឌិត ទូច សុឃៈ បានចាត់ទុកការសម្រេចចិត្តរបស់ភាគីកូរ៉េថា ជាជំហានដ៏ត្រឹមត្រូវ ដែលផ្តល់យុត្តិធម៌ដល់កម្ពុជា និងឆ្លុះបញ្ចាំងពីការពិតអំពីស្ថានភាពសន្តិសុខនៅក្នុងប្រទេស។ លោកថា ការបន្ធូរកម្រិតការព្រមាននេះ នឹងជួយលុបបំបាត់ការយល់ច្រឡំដែលកើតឡើងពីព័ត៌មានអវិជ្ជមានមួយចំនួន និងរួមចំណែកបង្កើនទំនុកចិត្តរបស់ភ្ញៀវទេសចរ និងអ្នកវិនិយោគបរទេស ជាពិសេសប្រជាពលរដ្ឋកូរ៉េ ឱ្យមកទស្សនា និងវិនិយោគនៅកម្ពុជាកាន់តែច្រើន។
លោក ទូច សុឃៈ បានសង្កត់ធ្ងន់ថា ក្រសួងមហាផ្ទៃ ក្នុងនាមជាសេនាធិការ ជូនរាជរដ្ឋាភិបាល ដែលដឹកនាំដ៏ស្វាហាប់របស់សម្ដេចមហាបវធិបតី ហ៊ុន ម៉ាណែត សូមបញ្ជាក់ជូនបងប្អូនទាំងជាតិ និងអន្តរជាតិមេត្តាជ្រាបថា កម្ពុជា គ្រប់គ្រងសន្តិសុខសណ្ដាបធ្នាប់ សុវត្តិភាពសង្គមបានហើយកម្ពុជាពុំមែនជាជម្រក់ ឬក៏ជាឋានសួគ៌របស់ឧក្រិដ្ឋជននោះទេ ដូចដែលប្រសាសន៍របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានគូសបញ្ជាក់ជាបន្តបន្ទាប់រួចមកហើយដែរ។
បើតាមអ្នកនាំពាក្យរងក្រសួងមហាផ្ទៃ ការបន្ថយកម្រិតបំរាមពីសាធារណរដ្ឋកូរ៉េ គឺបង្ហាញពីការទទួលស្គាល់ប្រសិទ្ធិភាពសន្តិសុខ របស់កម្ពុជា ទាំងមូល និងទទួលស្គាល់ចំណាត់ការដ៏អង្គអាចស្វាហាប់ ប្រកបដោយឆន្ទ:ទទួលខុសត្រូវ ក្នុងការបង្ក្រាប បោសសម្អាត និងកំពុងបន្តវាយកម្ទេច ក្រុមឆបោកតាមប្រព័ន្ធបច្ចេកវិទ្យាដែលដឹកនាំជារួមដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងជាប្រធាន គណកម្មាការចំពោះកិច្ចប្រឆាំងនិងបទល្មើសឆបោកតាមប្រព័ន្ធបច្ចេកវិទ្យារបស់រាជរដ្ឋាភិបាល។
បើតាមអ្នកនាំពាក្យរងក្រសួងមហាផ្ទៃ ដើម្បីពង្រឹងប្រសិទ្ធភាពការងារ សមត្ថកិច្ចក្នុងក្របខណ្ឌក្រសួងមហាផ្ទៃ តែងតែអនុវត្តន៍តាមគោលនយោបាយរបស់រាជរដ្ឋាភិបាល និងតែងតែធ្វើការងារជាប្រចាំជាមួយភាគីកូរ៉េ ពោលគឺអគ្គស្នងការដ្ឋាននគរបាលជាតិចំណុះក្រសួងមហាផ្ទៃ ធ្វើកិច្ចការងារជាមួយសមត្ថកិច្ចរបស់សាធារណ:រដ្ឋកូរ៉េ ដោយបានបង្កើនូវក្រុមការងារចម្រុះមួយហៅថា (Task Force) សម្រាប់សហការបង្ក្រាបបទល្មើសបច្ចេកវិទ្យាជាប្រចាំ។
អ្នកនាំពាក្យរងក្រសួងមហាផ្ទៃ បានបន្ថែមថា ទន្ទឹមនឹងនេះ កម្ពុជាក៏បន្តពង្រឹងកិច្ចសហប្រតិបត្តិការយ៉ាងជិតស្និទ្ធជាមួយស្ថាប័នអនុវត្តច្បាប់អន្តរជាតិ រួមមាន FBI របស់សហរដ្ឋអាមេរិក នគរបាលសហព័ន្ធអូស្ត្រាលី ភាគីចិន និងបណ្ដាប្រទេសជាច្រើនទៀត តាមរយៈការផ្លាស់ប្ដូរព័ត៌មាន និងកិច្ចប្រជុំជំនាញជាប្រចាំ។
លោកបណ្ឌិត ទូច សុឃៈ បានបង្ហាញជំនឿថា ដោយផ្អែកលើប្រសិទ្ធភាពការងារ តម្លាភាព និងឆន្ទៈពិតប្រាកដរបស់រាជរដ្ឋាភិបាល ក្នុងការប្រយុទ្ធប្រឆាំងបទល្មើសឆ្លងដែន និងបទល្មើសបច្ចេកវិទ្យា កម្ពុជានឹងបន្តទទួលបានការជឿទុកចិត្ត និងការគាំទ្រកាន់តែខ្លាំងពីសហគមន៍អន្តរជាតិ ហើយការពិតអំពីស្ថានភាពសន្តិសុខនៅកម្ពុជា នឹងកាន់តែត្រូវបានទទួលស្គាល់នៅលើឆាកអន្តរជាតិ និងមានការជឿជាក់ថាការពិតនឹងផ្ដល់ឱ្យកម្ពុជាវិញ នៅពេលឆាប់ៗខាងមុខនេះ៕
