ម្ចាស់ជើងឯកឆ្នាំចាស់ គឺក្រុមជម្រើសជាតិវៀតណាម រកបានជ័យជន្នះជើងទី១របស់ខ្លួន ក្រោយឈ្នះក្រុមម្ចាស់ផ្ទះម៉ាឡេស៊ី ដោយលទ្ធផលពេញ ៩០នាទី ០-២ នៃការប្រកួតពានរង្វាន់ប្រចាំតំបន់អាស៊ាន ASEAN Championship ឆ្នាំ២០២៦ នៅក្នុងកីឡដ្ឋាន Kuala Lumpur Stadium ស្ដិតក្នុងទីក្រុងគូឡាឡាំពួ ប្រទេសម៉ាឡេស៊ី ។
២គ្រាប់របស់វៀតណាម រកបានដោយកីឡាករចូលសញ្ជាតិ Nguyễn Xuân Son នៅនាទី ៤៥+៥ ខណៈគ្រាប់ទី២គឺជាគ្រាប់បាល់ដែលម៉ាឡេស៊ី ទាត់ចូលទីខ្លួនឯង នៅនាទី៨៥។
ដូចនេះក្រុមជម្រើសជាតិវៀតណាម ត្រូវបើកទ្វារកីឡដ្ឋាន Mỹ Đình National Stadium របស់ខ្លួនទទួលក្រុមជម្រើសជាតិម៉ាឡេស៊ី វិញម្តងនៅថ្ងៃទី១៩ ខែសីហា ខាងមុខ ដើម្បីប៉ះគ្នាជើងទី២ ខណៈការប្រកួតគឺនឹងចាប់ផ្តើមនៅម៉ោង ៨:០០ នាទីយប់ ។
ព្រឹត្តិកាណ៍ប្រកួតបាល់ទាត់បុរសជើងឯកអាស៊ាន ដែលប្ដូរឈ្មោះថ្មីតាមម្ចាស់ឧបត្ថម្ភ ASEAN Hyundai Cup ឆ្នាំ២០២៦ ចាប់ផ្ដើមពីថ្ងៃទី២៤ ខែកក្កដា រហូតដល់ថ្ងៃទី២៦ ខែសីហា ឆ្នាំ២០២៦ ពោលគឺចំពេលដែលលីគនៃប្រទេសក្នុងតំបន់អាស៊ានទាំង១១ សម្រាក។
គួររំលឹកថា ពាននេះជាទូទៅច្រើនធ្វើឡើងនៅចុងឆ្នាំ អំឡុងខែវិច្ឆិកា ដល់ខែធ្នូ ខណៈពីពេលនេះទៅ លេងពាក់កណ្ដាលឆ្នាំដ់ម្បីឱ្យស្របទៅនឹងប្រតិទិន FIFA Day ផងដែរ។
- វគ្គជម្រុះ៖ ថ្ងៃទី២៤ ខែកក្កដា ដល់ថ្ងៃទី៨ ខែសីហា ឆ្នាំ២០២៦
- Knockout Stage (វគ្គពាក់កណ្តាលផ្តាច់ព្រ័ត្រ និងក្រៅដី និងផ្តាច់ព្រ័ត្រ)៖ ថ្ងៃទី១៥ ដល់ ២៦ ខែសីហា ឆ្នាំ២០២៦
គួរបញ្ជាក់ថា ការប្រកួតកីឡាបាល់ទាត់ពានរង្វាន់ជើងឯកប្រចាំតំបន់ ASEAN Championship បង្កើតឡើងដំបូងនៅឆ្នាំ១៩៩៦ ធ្វើឡើងរៀងរាល់២ឆ្នាំម្ដង ថៃ គ្រងជើងឯកបានច្រើនជាងគេ ចំនួន ៧លើក (១៩៩៦, ២០០០, ២០០២, ២០១៤, ២០១៦, ២០២០, ២០២២) សិង្ហបុរី ចំនួន ៤លើក (១៩៩៨, ២០០៤, ២០០៧, ២០១២) និងវៀតណាម ចំនួន ៣លើក ២០០៨, ២០១៨, ២០២៤៕
